Read Poumei Naga JOSHUA 14 Bible Online

JOSHUA 14 - Poumei Naga bible

JOSHUA 14

¹Napao Eleazar, Nun nahpoutu Joshua alia Israel mai khü pei hinou khoa buyu maitao nou Kanaan teidei tao Israel mai ye zhipeiyu sü haitaoe.

²MAPAO nou Moses hi kharochi peiyu thaifüa khü akü-a dahli hi rako nou zhua kaalosü zhipeie.

³Daiolouzü Moses nou khü ahai-a dah tao hai teinghi palovatha buyu Jordan sü peiwure; ana Levi mai yesü kaalo peimohie.

⁴Daiolouzü Josef khü hinou chuo khü ahai pare, sühai sü Manasseh alia Ephraim ye; Levi mai yesü teidei ali-a peimoe, ana hriloure donou nuhdu alia puletao vei chokhaorü ye panou buloure donou heiphao sü peie.

⁵MAPAO nou Moses hi kharochi peiyu büa Israel mainou teidei haitao hai zhiloue.

⁶Süthaisü Gilgal hinou Judah mainou tave Joshua ye daoe; Keniz kihikha hinou Jephunneh nahpoutu Keleb nou puh hi paoe, “MAPAO nou Kadeshbarnea hinou Moses hi kabüa ne alia Eye donou paoyu ne-a süe.

⁷MAPAO kilai Moses nou Eye Kadeshbarnea hinou reikeih poloure donou seitayu phaki E hai mapo raidai pare; alia Enou puh hisü checheyu ko aveih nou ve paopeie.

⁸Ana Eye koa satamaio louzü dakhai ve ko ashi nou maisou le souvea peie; ana Ewo louzü ahrümai teitei nou peia MAPAO Ramai ye lülouche-e.

⁹Moses nou süzhou haibüa nou chaachou soua paoe, ‘Nenou talou phiheayu teideitao hai teisa nou nevei alia ne tyaonahtao vei kaalo souwulai, daiolouzü nenou hrümai teitei nou peia MAPAO Ramai ye lüyu vanou.’

¹⁰Südonou chuo, ne-a zhukhaio, MAPAO nou paohpei khaitouyu vanou E-a hria bu hie, sühai Israel mainou rekounou ta-a bukinou MAPAO nou Moses hi paokhaiyu mapo raidai-ngou pare; alia zhou-wo E hai mapo raicha-angou pare, alia haihi bure.

¹¹Chu koutea raichoki Moses nou Eye seitayu phaki avei khouko buyu büa buhie, avei pfühchi hai chua raiki büa reih soulaiyuma mokhaia hatarali soulaiyuma khouko buhie.

¹²Südonou chuo MAPAO nou paohkhai touyu thaifüa deichi hi buyu nuh taosü Eye peio; daiolouzü Anakim mainou kabüa bue touyu ne-a süwe, puletao nou nuh fühao hai veishoa soukhaitouyu, ana MAPAO nou Etaoye kozo peishulai, sütoulouzü Eh nou puletaoye sü hulailou süe.”

¹³Süthaisü Joshua nou puh yesü ha peiwure, alia puhnou Hebron teidei taohai Jephunneh nahpoutu Keleb hi peiwure.

¹⁴Hebron teidei hai Kenizz mai Jephunneh nahpoutu Keleb hisü kaalo soua peiwure, daiolouzü puhnou Israel Ramai MAPAO ye hrümai teitei nou peia thaifü louyu vanoue.

¹⁵Hebron zhih hai raikio louzü Kiriath-arba touwe, Arba hai Anakim mai hrohinou dukhayu na-e. Süthaihai teidei sütao hinou reih soumoa sode.