Read Poumei Naga JOSHUA 22 Bible Online

JOSHUA 22 - Poumei Naga bible

JOSHUA 22

¹Süthaisü Joshua nou Reuben, Gad ali teinghi palo buyu Manasseh maikhü dahli taoye kujüloua,

²haibüa paoe, “MAPAO kilai Moses nou neletao hi kharochi peikhai touyu taosü souche loure, alia Enou neletao hi kharochi peiyu pfüphoua neletao nou züloure.

³Neletao nou teile haizhou koute, nele thaihou-jürai maiye ngaipeimoe, ana lenou shoa MAPAO Ramai nou paopeiyutaosü soutao shoa züa bue.

⁴Chuo neletao MAPAO Ramai nou paohkhai touyu thaifüa neletao yesü panou kaona-a shoyu ngaoloulai. Südonou MAPAO kilai Moses nou nele hi peikhai touyu Jordan dapolova teidei hisü taho bulo.

⁵MAPAO kilai Moses nou neletao hi kharochi peikhai touyu taosü zütoulo: Ne MAPAO Ramai ye leshilo, puh jüpa soulo, puh vei kharochi zülo, alia nevei hrümai teitei nou peia nou puh vah sü soukhaio.”

⁶Sübüa nou Joshua nou puletao ye sü hapeia nou seitawure; alia puletao nou lahvei teidei hisü dakhai tare.

⁷Manasseh khü dahli tao ye Moses nou Bashan teidei hai peiwure, ana peiche loumoa buyu khü dahli tao hai Joshua nou teinghi loulo va buyu Jordan rei hinou peie. Joshua nou puletao ye hapeia seitayu phaki,

⁸haibüa paoe, “Neletao chuo toungi shoa kihi dakhai talaire; kikhaorüa taoli bure, sana, shahu, hu, sabanü, alia ngaobamai hinou polouyu na-a taoli bure, sütao hai kihi velouzü nele thaihou jürai mai hia zhipeio.”

⁹Süthaisü Reuben, Gad alia teinghi palo buyu Manasseh maitao hai puletao vei teidei hisü vetare. Puletao nou Israel maitya kukhe tao yesü Kanaan vei teidei Shiloh hi thaowua puletao vei teidei hilo, Gilead hisü tare, süsü MAPAO nou Moses hi paopeiyu thaifüa puletao nou poloue.

¹⁰Reuben, Gad alia Manasseh khü dahli taonou Jordan vei deiraih Geliloth hi velouyu thai, sühinou rathoyu buh ali souloue.

¹¹Israel mai kukhe tao hisü haibüa paoe, “Zhukhaio, Reuben, Gad alia Manasseh khü dahli taonou Israel mai dei, Jordan pe hinou buyu Geliloth hinou rathoyu buh sü souloure.”

¹²Israel mainou sühai süloukhaie, puletao hi reih soure donou Israel mai hrülai hai Shiloh hinou ve jüloure.

¹³Süthaisü Israel mainou Gilead hinou buyu Reuben, Gad alia Manasseh khü dahli tao hisü napao Eleazar nahpoutu Phinehas,

¹⁴alia puhye koa nou Israel maikhü tao hinou tsümai kirou yesü seitare.

¹⁵Puletao nou Gilead teidei hinou buyu Reuben, Gad alia Manasseh khü dahli tao hisü ve haibüa paoe,

¹⁶MAPAO vei maisou taonou haibüa paore, “Daisou nou zhou neletao Ramai MAPAO chi zümoa nou vah ashi soue? Neletao daivanou Ramai ye ngaophoumoa nou lah neletao vei rathouyu buh soulouwe?

¹⁷Peor hinou mah souyu hai khamohiwu? Sühi mah souyu donou MAPAO nou mai hrülai ye souvea peiyu hai, chu koutea soushee loumoa buhie.

¹⁸Neletao nou zhou MAPAO hinou tarei taloua puhye hraiwu louzü MAPAO nou doshowo Israel mai hrülai hisü rarou shulai.

¹⁹Südonou nemai vei teidei hai sheemoe toulouzü, chunou MAPAO vei dei hinou rathoki buyu nahisü dakhai velouo, alia Eh hinou ve dei dezhilo; ana neletao tyakua nou lahvei rathoki souloua nou MAPAO jüphei-rarou louzü soupeiwuso, mokhaia Etaoye sou hrai peiwuso.

²⁰Zerah nahpoutu Akan nou souhare natao hinou chilee moyu donou Israel mai hrülai nou chaa ngaomowu? Alia puhnou soumahyu donou puh lah likhei habai moe.”

²¹Süthaisü Reuben, Gad, alia Manasseh khü dahli taonou Israel mai ye süthai-apei maitao hisü haibüa chila peie,

²²“Khouko buyu Ramai MAPAO, khouko buyu Ramai MAPAO, puhnou süwe; alia Israel mai-a panou sülou nüwe, süolouzü Etao nou souyu nahai Puh chi zülai more teanou mokhai-a puhye hraire donou soubai louzü, zhounou Etao mai hrülaiye sü pa thaitheo.

²³Etao nou MAPAO chi züba-a rathoki nasü posheelare donou soulouzü, mokhai-a shina-mara poa kaonayu sheelayu thaio, MAPAO panou Etaoye tudee peitheo.

²⁴Etao süvanou soumoe, anou daivanou soue toulouzü haithai bonakha nou Etaoye (haibüa paore ngaopeiyu donou soue), ‘Neletao nou Israel maivei Ramai MAPAO hi daisoure bue?

²⁵Daiolouzü MAPAO nou Jordan rei hinou Etaoye deiraih dadepeiwure, südonou Reuben alia Gad maitao, neletao nou Ramai MAPAO donou halia soure hae.’ Sübüa nou nele tyaonah taonou Etao tyaonah ye panou Rah thoba shulai.

²⁶Südonou Etao nou rathoyu buh nasü soua baie, süna hi Etao nou meidei-a pothore donou mokhai-a sheelare donou soumoe,

²⁷ana sünasü panou neletao alia Etao kohi, alia eletao tyaonah taoye panou shee ali soupeiloure donou soua baie, Etao-a neletao ye rai-a nou MAPAO yesü tho-we alia puh nghoujü nou meidei-a pothowe alia Vo soua sheelawe touyu nasü shee ali soupeire donou soua baie, sükumolouzü haithai bonahkhanou Etao tyaonah hie, ‘MAPAO-e thoyu hi neletao zha hae,’ tea nou paore ngaopiyu donou baie.

²⁸Etao nou choue, haithai Etao hi moa etao tyaonah hi sübüa neletao nou paolouzü, Etao nou haikua chila peilai, ‘Zhukhaio, Etao puopao mai-a MAPAO ye thoyu ki ali soukhai touwe. Sünasü meidei-a pothore donou alia sheelare donou moe, ana süsü neletao alia Etao kohi shee ali sou ngaore donou baie.’

²⁹Etao nou MAPAO ye khaitya-a dure donou moe, mokhai-a Etao nou rathoki nasü souloua Israel Ramai MAPAO ye thomoa rakukhe liye thotare donou moe. Etao nou sahpao pahinou Ramai MAPAO nou buyu ratho ki moa nou rathoki kukhe ali-a soukhai laimoe.”

³⁰Sübüa nou Reuben, Gad alia teinghi palo buyu Manasseh khü dahli taonou paoyu chipao süloukhaie, napao Phinehas alia puhye salaiyu Israel maikhü hinou tsümaitao-a aetoure.

³¹Alia napao Eleazar nahpoutu Phinehas nou Reuben, Gad alia Manasseh maitao hisü paoe, “Zhouo MAPAO Ramai-a Etao hi bue touyu süloure, daiolouzü neletao nou MAPAO ye khaitya-a dumoe, südonou chuo neletao nou Israel maiye MAPAO vei rarou-lekha hinou vupa peiwure.”

³²Süthaisü Phinehas alia puhye salaiyu tsümai taohai Reuben alia Gad maiye Gilead teidei hisü thaowu-a Kanaan teidei hi Israel mainou buyu hisü dakhai vetare, alia puletao hi haibüyu chipao taosü ve paopeire.

³³Israel mainou puletao chipao sü chouloua leva shore, alia puletao nou Ramai ye paoshoe. Puletao chuo Reuben alia Gad maiye reih soure tsüchomore.

³⁴Reuben alia Gad mainou paoe, “Rathoki hainanou Etao hi, MAPAO hai Ramai-e touyu shee soulai, alia sünavei ‘sheesou-apeio’ teanou kuloulai.”