Read Poumei Naga JOSHUA 24 Bible Online

JOSHUA 24 - Poumei Naga bible

JOSHUA 24

¹Süthaisü Joshua nou Israel mai hrülaiye sü Shechem hinou save jüloue, alia puhnou Israel mai hi tsüsoua buyu maitao, chiku-apei maitao, alia vahdumai taoye kuve jüloue; süthai puletao nou Ramai nghoujü hisü kouloue.

²Joshua nou puletao mai hrülai hisü paoe, “Israel Ramai MAPAO nou paoe, ‘Neletao puopao mai-wo Euphratis rei holova nou hrüe, sühi sünou Abraham alia Nahor puo Terah laimaio rah kukhe-e thoa hrüe.

³Sühinou nele puopao Abraham ye Enou kupaloua Kanaan teidei teitei hi satae, alia puhye tyaonah taoli peie. Enou puhye nahpoutu Isaak peie;

⁴Isaak hisü Enou Jakob alia Esau ye peie. Enou Esau ye deichi hi buyu Seir nuhdu nahai peie, ana Jakob vei tyaonah taonou Ejipt hi kouh hrütare.

⁵Süthai Enou sühi Moses alia Aaron ye seivepeie, alia Ejipt maiye hatyali hinou souveasho peia neletao ye sühinou sapaloue.

⁶Süthaisü Enou neletao puopao ye sü Ejipt teidei hinou sapaloue, alia neletao puopao maitao nou Zai pehi kouyu phaki; Ejipt mainou rheiluki pfüloua nele puopao yesü Zai Ho hisü hukhoure.

⁷Puletao nou MAPAO hisü kra-a soukha khoyu phaki, MAPAO nou puletao alia Ejipt mai kohisü zhitei touloua panou zai dzünou pa Ejipt mai yesü maoloue; Enou Ejipt mai hi souyu vahsovei tao hai nele nghithou vuzünou ngaowe. “‘Alia teile taoli neletao nou rekounou hrüe.

⁸Süthaisü Enou neletao ye Jordan rei sa-a talah paloua nou Amor teidei hi save thoupeie. Puletao nou nele ye reih souwe, ana Enou puletao ye neletao bah hi thoupeie, alia neletao nou puletao vei teidei sü poloue, alia Enou puletao ye nele nghoujü nou souha peie.

⁹Süthai Zipper nahpoutu Balak, Moab hi veo nou neletao ye reih souwe, alia puhnou neletao ye pa chaa peire donou Beor nahpoutu Balaam ye kulouwe,

¹⁰ana Balaam nou paolaiyu hai Enou keipei laimoe touyu puhnou süloua neletao ye hapeie; sübüa Enou neletao yesü puh bah hinou vupa peie.

¹¹Südonou neletao nou Jordan talah loua Jeriko hisü veloue, alia Jeriko hi buyu mainou neletao ye reih souwe, alia Amor mai, Perizz mai, Girgash mai, Hit mai, Kanaan mai, Hiv mai, ae Jebus mai nou neletao ye reih souwe, ana Enou puletao yesü nele bah hi peie.

¹²Süthai neletao nou takouyu phaki, neletao jünou rai-a Enou Laikhidu seita peie, südonou Amor hi veo ahai yesü hulailoue; haisü neletao vei khoche alia reihlou nou veilou moe.

¹³Neletao vei haso lia loumoa nou teidei sü Enou peia baie, alia neletao nou soushu khaimoyu nuhdu taosü pa Enou neletao ye buloua baie, neletao nou shokhai toumoyu darkhabe alia oliv kipei hinou marashithou hraitoua baie.’

¹⁴“Südonou chuo neletaoa MAPAO ye ngaopilo, alia puh vah sü chilee chechea soulo; nele puopao taonou rei holova buki alia Ejipt hi bubuki thoyu rah nasü thaowo, sükua nou MAPAO vei vah sü soua baio.

¹⁵Neletao nou MAPAO vei vah sü sounü molouzü zhounou thao vah soulai touyu dolouwo, nele puopao taonou rei holova buki thoyu rah nou laiho, neletao nou hrüa buyu Amor maivei rah nou laige; E alia Ahvei kihikhamai-o louzü MAPAO vei vah soua bailai.”

¹⁶Süthaisü mai khemai taonou chila peie, “Etao MAPAO ye thaowua rah kukhe livei vah sü souta khaitou laimoe.

¹⁷Daiolouzü Etao Ramai MAPAO nou Etao puopao alia Etaoye sü Ejipt teidei hinou, hukhaki hinou sapapeie, alia Etao nghingao hinou puhnou dushoyu shee hai Etao nou tayu ludu veishi hisü soupeie, alia Etao nou talah tayu tyahrü hrülai hinou puhnou eye sü kiko sa-a vetepeie.

¹⁸Alia MAPAO nou etao nghoujü nou Amor mai hrülaiye sü hulai peie; südonou etao-a MAPAO vei vah sü soua bailai, daiolouzü Puh hai Etao vei Ramai-e.”

¹⁹Ana Joshua nou puletao hisü paoe, “Neletao nou MAPAO vei vah sü soulou hoe; daiolouzü puh hai sheeshoyu Ramai-e; Puh hai rah kukheye ngaora shoyu Ramai-e. Puh hai neletao nou soumah-soumo khaitouyu sü khaipei laimoe.

²⁰Neletao nou MAPAO ye thaowu-a rah kukhe livei vah soutalouzü, puhnou raiki neletao hi vah aveih soupeiyu büa, neletao yesü soushi souha khaitouwu bailai.”

²¹Puletao nou Joshua hi paoe, “Moe, Ewo MAPAO vei vah soua bailai.”

²²Joshua nou puletao hi paoe, “Neletao nou MAPAO vei vah soua bailai teanou dolouyu hai neletao lahnou lahvei chila louyu baido.” Süthai puletao nou paoe, “Ovai, Etao lahkuku vei chila louyu baie.”

²³Puhnou paoe, “Sükulouzü neletao hrohinou buyu rah kukhe taoye sü polaio, alia neletao vei hrümai hai Israel Ramai MAPAO hi peio.”

²⁴Süthaisü Joshua hi puletao nou paoe, “Etao nou Ramai MAPAO vei vah sü soulai, alia puh chi sü zülai.”

²⁵Süthai, Joshua nou süzhou teithe hinou mai hrülaiye sü sa-a Shechem hinou Vo soulouwe, alia kabüa hrülai touyu chikha tao alia kharochi tao hai peie.

²⁶Joshua nou chipao sütao hai Ramai vei chikha larübvü hi rüthoulouwe; alia puhnou sühinou chuh ali poloua MAPAO vei rathoki buyu süübe phihi nou shokhai louwe.

²⁷Alia Joshua nou mai hrülai hisü paoe, “Zhukhaio, chuh haina nou etao vei shee soulai, daiolouzü MAPAO nou Etao hi paopei khaitouyu chipao teitei hai choukhai touwe, südonou hai nanou Etao vei shee (shaki) soua bulai, sükumo louzü neletao nou nele Ramai MAPAO hi dawushulai.”

²⁸Sükua nou paowua Joshua nou maisoutao yesü lahkuku vei teidei hisü seitawure.

²⁹Süthaisü, MAPAO vei kilai Nun nahpoutu Joshua hai thaitare, puh vei mapo kaihlia kirou pa-a nou thaire.

³⁰Puletao nou puhye sü lah puhvei dei, Timnath Serah touyu hinou, süsü Ephraim maivei teidei, Gaash deichi reilonou buyu hinou daovu peie.

³¹Israel mainou Joshua hria bukisa alia MAPAO nou Israel maiye donou vah aveih soupei khaitouyu ngaoa buyu tsümaitao hria bukisa puletao nou MAPAO vei kuvah sü souwe.

³²Israel mainou Ejipt hinou poshia payu Josef vei rao hai Jakob nou Shechem nahpoutu Hamar nahmaitao hinou shahu kaih peia hrülouyu Shechem dei hisünou daovu peie; süna hai Josef tyaonah taovei kaalo soua peie.

³³Alia Aaron nahpoutu Eleazar-a thaitare, puhvei thaiphao hai Ephraim mai deichi hi buyu puhvei nahpoutu Phinehas ye depeiyu Gibeah nuhdu hinou vupeie.