Read Poumei Naga JOSHUA 5 Bible Online

JOSHUA 5 - Poumei Naga bible

JOSHUA 5

¹Jordan vei teinghi loulo buyu Amor vemai hrülai, alia zai pehinou buyu Kanaan vemai hrülai hai MAPAO nou Jordan reidzü southe peia Israel maiye panou Jordan rei kacho koukhai loure touyu ko süloua, puletao nou Israel maiye ngaopi sholoure, alia khuveia dulai touyu tsüa puletao hi hazhi toure.

²Sükuyu phaki hinou MAPAO nou Joshua hi paoe, “Hei veiyu koutu souloua Israel mai hrülaiye vu ahai na soua hee rodewo.”

³Paoyu thaifüa Joshua nou heivei shoyu koutu souloue, alia Gibeath-haaraloth hinou Israel mai hrülaiye hee rodere.

⁴Daivanou Joshua nou Israel maiye hee rodewe toulouzü: Ejipt hinou tapa louyu mai hrülai alia reihmai teitei hai, rekounou ta-a bukinou thaita khaire.

⁵Ejipt teidei hinou tapayu phakio mai hrülai nou hee rodekhai toue, ana Ejipt hinou tapayu thai, ludu ta-a buki rekounou nalouyu maitao hai hee rodemo hie.

⁶Israel mainou vaohronou tayu hai po raidai lou-e, daivanou toulouzü Ejipt hinou tapayu tahrüh hrülai, alia reihmai teitei hai MAPAO vei chi zülou moyu donou ludu hinou thaita khaimo koute, puletaoye panou talou puletao puopao hi peikhai touyu teidei nasü, chonaodzü alia voudzü nou küa buyu teidei nasü ngaokhailai moe teanou MAPAO nou chaachou souwure.

⁷Süvanou Joshua nou hee rodeyu hai, puhnou homaitao thaosoua kipa khaitouyu nahmaitao-e, daiolouzü puletao hai ludu hi ta-a buki puletao vei hee rodemoe.

⁸Puletao hee rodeyu zhimü veiche loumo koute tyahrü hrülainou buh sühinou chao-a bue.

⁹MAPAO nou Joshua hi paoe, “Zhou teithe Ejipt teidei hinou vea-a neletao nou maivei qila soua buyu nasü Enou polai peiwure.” Süvanou zhodao koutea buh sünasü Gilgal teanou kuhie.

¹⁰Israel mainou Gilgal hi ve fühao sou-a buki puh mainou Jeriko deikho hinou khoungao kiadai zhou koukhe, Tachopa Nüh nüe.

¹¹Tachopa Nüh nülouyu thainesho, süzhou teithe hinou puletao nou Kanaan deih hinou payu shina-mara, thou sakhai touyu tya alia kheih thoumoyu raokhao sü toutare.

¹²Puletao nou deih süna hinou payu shina-mara tou tayu teithe hinou manna sü peipu more, süthai Israel mainou manna toupu more; puletao nou süzhou teithe nou Kanaan hinou pa-a buyu shina-mara nou toutare.

¹³Joshua nou Jeriko hi buyu phaki, puhnou mai ali khoche poa zhingaoe; Joshua nou puh hisü takouloua noue, “Ne Ehye donou ho ngaobamai donouge?”

¹⁴Puhnou chila peie, “Maimai donoua moe, ana MAPAO vei reihmai peikhowo soua E chu haihi vewe.” Süthai Joshua nou dei hi kaokou loua puhye sü khurüe, alia puh hisü paoe, “A MAPAOwo, ne kilai ahi dai kharochi peire bue?”

¹⁵MAPAO vei reihmai hi peikhowo nou Joshua hisü paoe, “Ne phikha sü ne phi hinou phawuo, daiolouzü nenou lah-a buyu dei nasü sheeyu dei-e.” Puhnou paoyu thaifüa Joshua nou sou-e.