Read Poumei Naga JOSHUA 7 Bible Online

JOSHUA 7 - Poumei Naga bible

JOSHUA 7

¹Ana Israel mainou souhawure hi peithou khaitouyu natao hisünou soumahwure; daiolouzü Zerah vei pfümounah hinou veyu Zabdi tyao Karmi nahpoutu Akan nou souhawure hi peithou khaitouyu na daotu vaoloure, süvanou MAPAO vei lekha-rarou sü Israel mai hi vere.

²Joshua nou Jeriko hinou reihkei poloure donou maiye seitaho Ai mai teidei zhue, süsü Bethel vei teinghi palo Bethaven ngheia bue. Reihkei poyu maitao nou taho reihkei sü polou-e.

³Puletao nou Joshua hi dakhaive reihkei taosü paore, “Mai hrülaiye panou tamoa veie, daiolouzü Ai mai hai mai daotu baie, südonou mai thehai moa thesü phalinou puhmaiye dulousüe, mai teiteiye panou taho veasouo.”

⁴Südonou puletao nou mai thehsü phali seita-a baie, ana puletao nou Ai mai jünou reih veilou hoa tuta baire.

⁵Ai mainou puletaoye mai shiarou phali southawure, alia puletaoye robomü hinou shia Shebarim hi koute ngouve peie. Süthaisü puletao hai khuveiyua hatare alia ngaopi shoa bure.

⁶Süthaisü Joshua alia Israel mai hi tsümaitao nou levea sholoua puletao vei sabanü sü daopha sawure alia puletao pei hisü vounai bosho khailoua nou MAPAO vei Vo Sübvü nghoujü nou teizhimo koute kaokouh bure.

⁷Alia Joshua nou paoe, “Daitoulai! Oh Ramai MAPAO, daisounou Ne etaoye Jordan hailova sapawe, etaoye sapa Amor mai bah hinou souhawulai tuvu? Etaoye daisounou Jordan rei holova panou bubai moe?

⁸Oh MAPAO, Israel mai hai ngaobamai hinou tutare toulouzü, chuo E daie paolai.

⁹Daiolouzü Kanaan alia teidei hai hinou hrüa buyu mai teitei nou haisü chouloua etaoye ve sühaoloua nou, alia etaoye souha khaiwu louzü; nevei zhih aveih adu naye donou Ne daie soulai?”

¹⁰MAPAO nou Joshua hi paoe, “Kushulo! Daisounou ne pah sü pfükua nou bue?

¹¹Israel mainou mah souwure; Enou sousouwo teanou vo soukhai touyu nasü neletao nou pfüphewure; neletao nou souhawure hi peithou khaitouyu nasü vaoloure, süsü poloua nou lah neletao vei chingi soure donou khailoure.

¹²Südonou Israel mainou ngaobamai nghoujünou veilou hore; daiolouzü neletao nou souhawure natao hisü peithouyu vanou, neletao hai ngaobamai nghoujü nou tutare.

¹³Tashulo, maikhe maiye sü sousheelo, alia haibüa paowo. Dosho neletao veishi nou lah lahye sousheelo; daiolouzü Israel maivei Ramai MAPAO nou paore, ‘Neletao hrohinou souhawure hi peithou khaitouyu na bure, O Israel maitaore; souhawure hi peiyu natao hai nele hrohinou popa laiwumo koute, neletao nou hata lisoua neletao hai ngaobamai jünou veilou hoe.’

¹⁴Südonou dosho shona neletao nou khü-khü nou khaoh khaoa MAPAO hi savelai; MAPAO nou dolouyu khüsü, pfümounah tukhou loua nou savelai, alia MAPAO nou dolouyu pfümounah sü, kiphao alili nou MAPAO hichi savelai, alia MAPAO nou dolouyu kihikha sü mai alili nou MAPAO hi savelai.

¹⁵Souhawure hi peithou khaitouyu na polouyu mai nasü puhvei na veishi nou koa meinou deiwulai, daiolouzü puhnou MAPAO nou Vo soukhai touyu nasü pfüthowure alia Israel maiye hrao soupeiwure.”

¹⁶Joshua nou thainesho shohna nou kushu zhilou-a Israel mai khü-khü nou save-e, alia Judah khüye sü doloure;

¹⁷puhnou Judah khü vei pfümounah alili nou sakouyu phaki, Zerah vei pfümounah ye dopaloue, alia puhnou Zerah vei pfümounah sakouyu phaki, Zabdi kihikhaye sü doloure.

¹⁸Süthai puhnou kihikhamai ye mai alili nou sakouyu phaki, Judah khü hinou Zerah nahpoutu Zadbi, Zadbi nahpoutu Karmi, Karmi nahpoutu Akan yesü dopaloure.

¹⁹Süthaisü Joshua nou Akan hi paoe, “Anahna, Israel maivei Ramai MAPAO ye kathe soupeio, alia Puhye paosholo; ne dai-e soure touyu ahi paokhaio; süsü ahi da-a nou pokukhaiwu souo.”

²⁰Akan nou Joshua hi chila peie, “Ovai Enou Israel maivei Ramai MAPAO nghoujü nou mah souwure, alia Enou haibüa nou souwe:

²¹Soushi khaitouyu natao hrohinou hüvei shoyu sah ali, shahu sühcho ahai pha, alia sana kehli, süsü shekel raingou phali ngaolou khaie, Enou thaisho loua poloure; na sütao hai avei sahpao hinou heku khaitoue.”

²²Süthaisü Joshua nou kopomaiye seitaho panou zhue, alia puletao nou sahpao hinou na sütao hai shahu alia sana koa deikhe nou heku khaitoua ngaoloue.

²³Süsü puletao nou sahpao hinou vakou popaloue alia poshia Joshua alia mai hrülai hi pove; alia na sütao hai pove MAPAO nghoujü hi khaiwure.

²⁴Joshua alia Israel mai hrülai nou Zerah nahpoutu Akan ye sü kijü sapaloue, puhye koa shahu ae sana, puhvei nahpoutu ae nahnaotutao, alia puhvei chode, rheisüh, zhaotu, ae puhvei na buyu teitei; puletao nou poshia pa Achor deikho hi khaiwure.

²⁵Joshua nou paoe, “Ne dai souyu donou etao pei hi veayu pove peiwe? MAPAO nou ne hia zhou veayu pove pei baie.” Süthai Israel mai hrülai nou puhye sü chuhnou khyathawude; puletao nou na veishi sü meinou deiwure.

²⁶Puletao nou puh pei hi chuh nou khokhai touyu hai zhou koutea bue; süthaisü MAPAO vei lekha sü khaitare. Südonou zhou koute buh süna zhih hai Achor (veayu) deikho teanou kuwe. Süthaisü MAPAO nou raroupu more.