Read Poumei Naga 2 THESSALONIMAI 2 Bible Online

2 THESSALONIMAI 2 - Poumei Naga bible

2 THESSALONIMAI 2

¹Thaihou jürai khemai, chuo Eletao Mapao Jisu Khrista veyu ea puhye ve daore donou Eletaoye pove dzüloure süna vanou Ehnou nele hinou khowe,

²süolouzü neletao tsühai lapasoua Mapao teithe nasü veloure tea paoyu süna vanou tsübo phouhayu moa khupayu souwuso. Neletao nou süna vanou maikhe mainou zho ngaoshe ea rachi paolashe moa Eh hinou seiko seiveshe tea paoyu choukhaia puletaoye louchewuso.

³Hatali hinou maiye panou neleye lawuso; daiolouzü meizaihi thouvuzü laiyu Mai Ashina nou taveloua raia akhai vei reih nasü soubvüro moyu koutesü teithe sünasü velaimoe.

⁴Puhnou maikhe mainou tho-a buyu ra veishi moa na taye balai, alia puh lahnou sütao teitei pei hi adukhana soulai. Alia puhnou Rathoki hi koute talou buloua lah puh hai Ramai baie tea paolai.

⁵Enou neletaoye koa bubukinou haina hai Enou neletao hi paongao peire touyu sü neletao li-chomowu?

⁶Alia hainaye panou chu paloure dainou puhye nua busa touyu sü neletao nou süwe; daiolouzü puhsü lah puhye donou khadakhai touyu teile sühinou vebailai.

⁷Kheikhei souyu ashi vah nasü souta-a bure, ana sünaye nuchao-a buyu puhye ludu süna hinou potapeimo koutesü palaiyu sütaosü palai mohie.

⁸Alia süthaisü Mai Ashi nasü velai, ana Mapao Jisu nou veyu kisü puhnou puhye sü puh mü hinou payu puhvei ssünou southealai ea puhvei peivavayu zhu sünanou puletaoye sü souhalai.

⁹Mai Ashi nasü Saitan vei khouko nou koa velai ea madayu shee ea khupavah tyali soulai,

¹⁰alia halaiyu maitao pei hisü puhnou madayu ashi vah tyali soulai. Puletao sü sübüa habailai daiolouzü puletao nou acheche naye sü leshi bae ea sübüa khailulou bae.

¹¹Südonou puletaoye panou madayu nasü louche loure donou Ramai nou puletao pei hisü soumah loure khouko aduli seikoupeie.

¹²Sübüa acheche naye sü louchemoa mah hinou vashoa hrüa buyu maitao hrülaiye mah-e tea chikukou peiwulai.

¹³Ramai nou leshiyu thaihou jürai khemai, Ehnou neletaoye donou teisanou Ramai hi kalo paovu zülai. Daiolouzü shurai hinou neletaoye soushee peiyu Rako hinou ea neletao nou louche louyu achechena hinou khailu louyu sü ngaoloure donou Ramai nou neletaoye sü doloure.

¹⁴Neletaoye panou Eletao Mapao Jisu Khrista vei adusho nahi koa zha ngaozholoure donou Ehnou nelehi paodou peiyu Ko Aveina süna vanou Ramai nou neleye hrü ashu hainahi kuve thoupeire.

¹⁵Südonou thaihou jürai khemai, soutaosou la-a bulo ea Ehnou münou ea seiko hinou nelehi paodou peikhai touyu acheche sütaosü soutaosou po-a bulo.

¹⁶Alia Eletao Mapao Jisu Khrista puhnou ea Eletaoye leshia puhvei zhuvea hinou Eletao hi kaolou hoyu khu-avei ea khoushoyu areih peikhai touyu Ramai Eletao Puo puhnou

¹⁷neletao lesü souvasho peiyu sü souloutheo ea neletaoye panou teisanou avei nasü souloure ea paoloure donou soutsü peitheo.