Read Poumei Naga 2 THESSALONIMAI 3 Bible Online

2 THESSALONIMAI 3 - Poumei Naga bible

2 THESSALONIMAI 3

¹Akhai hinou, thaihou jürai khemai, Mapao vei chipao hai thashoa paodouta loure donou ea neletao hrohi velouyuki büa süsü panou tsükhoua poloure Ehye donou veachi paopeio.

²Alia Ramaiye panou Ehye vah ashi soumai ea mai ashimai bah hinou vupa peiloure donoua veachi paopeio; daiolouzü maikhemai hrülai nou chipao nasü louche peimoe.

³Ana Mapaowo louzü louchelou veie, alia puhnou neletaoye soutsü peilai ea neletaoye maishimai bah hinou khopeilai.

⁴Ehnou nelehi paopeikhai touyu taosü nelenou soua souwe ea thaokhaimoa soua bupei shulai tea Ehnou nele vanou Mapao hi louche-a bue.

⁵Mapao nou neletao lesü Ramai leshi ea Khrista hinou veyu shamealou süyu hilova süve peiyu soulouwo.

⁶Thaihou jürai khemai, chuo Ehnou neleye Eletao Mapao Jisu Khrista zhih hinou chikha peiwe, süolouzü neletao hai hi-a buyu ea Ehnou nelehi paodou peikhai touyu zhai süna thaifüa tamoyu thaihou jürai maitao hinou tarei talo.

⁷Daiolouzü Ehnou souwuyu sübütoua nele-a souzüe touyu sü neletao-a sütoua bue. Ehnou neleye koa bubu kisü Ehsü hi-a bukhaimoe.

⁸Ehnou maitali hia muh peikhaimoa tou-shomoe, ana neletao maitaliye souvea more donou Ehnou khei-hea sokhaimoa te-a vah soue.

⁹Sübüa souyu hai nele hinou Ehye soukha peire khoyu zü ali-a hae touyu vanou moe, ana kabüa neleye panou Eh zhai doulou laisa touyu donou soubaie.

¹⁰Daiolouzü Ehnou neleye koa bubuki hinou nelehi chikha hainasü peie, süolouzü, “Maita linou vah souba louzü, puhye sü panou touwuso.”

¹¹Ehnou daidonou sübüa paowe toulouzü neletao hrohinou mai kamaisü hikeih-a ea vahlia soukhaimoa mai kukhemai vah hinou pei thaithoua teile souha-a bubaiwe tea Ehnou chouwe.

¹²Chuo sükuyumai sütao hisü Ehnou Mapao Jisu Khrista zhih hinou chikha peiyu noupu kaona-a puletao vah soua buloure ea lah puletao touso kutou loure donou süpeiwe.

¹³Ana thaihou jürai khemai, neletaowo vahvei souyu hisü shawu laimoe.

¹⁴Maitalinou Ehnou nelehi seiveyu seiko hainavei chipaohai zübawe toulouzü, sübüyu mai sünaye sü zhutoulo ea lah puhye panou ahrao ngaoloure donou puh hinou tarei talo.

¹⁵Sütoukhaia puhye sü ngaobamai alibüa popeiwuso, ana thaihou jüraimai alibüa puhye sü tukha züpeio.

¹⁶Chuo kaonayu vei Mapao puhnou teisanou ea ludu teitei hinou neletao hi kaonayu peiyu sü soulouwo. Mapao nou neletao hrülaiye koa buyu sü souloukhaio.

¹⁷Paul hinou khurüyu vei chidoh seivewe. Haisü lah, Abah vuzünou rüwe. Avei seiko teitei hisü haibüyu zhaido hinou Enou paoshee souwe; Ewo haibüyu zhai hinou rübaiwe.

¹⁸Eletao Mapao Jisu Khrista zhuvea nou neletao hrülaiye koa buyu sü souloutheo.