Read Poumei Naga 1 TIMOTHI 1 Bible Online

1 TIMOTHI 1 - Poumei Naga bible

1 TIMOTHI 1

¹Eletaoye khailu-apeio Ramai ea Eletao vei areih Khrista Jisu vei chikha hinou Khrista Jisu vei sei-atamai soua buyu Paul nou,

²lü hilonou chekhao-a Anahpoutu soua buyu Timothi hi rüwe: Puo Ramai ea Eletao Mapao Khrista Jisu nou nehi zhuvea, khu-leshi ea kaonayu peiyu sü souloutheo.

³Enou Makedonia hilo tayuki nehi paopeiyu büa Enou neye panou Ephesa hinou nai-a bunüwe. Daiolouzü mai kamainou amada lüzhai sü doupeia bure, alia puletaoye sübüa doupeiyu hinou bailoure nenou kharochi peikhaio.

⁴Chi saovayu likhei povepei baiyu madayu daomaikotao ea pai-paomai zhih alaosou rüthoupoa laiyu sütaosü thaowure donou puletao hi paopeikhaio; sütaonou lü vanou likhei sülou baiyu Ramai vei aroh naye sü kuvah soumoe.

⁵Ehvei kharochi hainavei ko matsüwo louzü ra-hazheiyu le hinou, lekhetsü aveina hinou ea kao-züyu lü sütao hinou payu leshi süna panou paloure donoue.

⁶Mai kamaisü sütao hinou tala taloua, hakoa chi veivayu hinou puletao ludusü motare.

⁷Puletao sü razhai dou-apeimai sounüwe, ana puletaosü lah puletao nou daichi paosa touyu moa puletao nou khuh veishoa pao-a laiyu sütao vanou halia sükhai moe.

⁸Chuo razhai hai maitalinou kao-zü hinou seiloure toulouzü veishoe touyu hai Eletao nou süa bue.

⁹Sütoukhaia Eletao nou licholou molouzü shie, süolouzü razhai hai maivei mai donou soupeimoe, ana zhai souphe-souphomai, paoyu zübamai, Ramai ha-a hrüyumai ea mahsoua laimai, sheemomai moa chechemomai, lah puletao pfüpuoye southeamai ea maiye datheamai,

¹⁰khakha chaozüyu mai, emai zhaimoa koa züyumai, mai vaoyumai, amadamai, mada-a chi lapeimai ea cheche lüzhai hinou moa aku zhai hinou vah soua laimai, süolouzü

¹¹Eye panou paodou peire Abah hi lüthou peikhai touyu adusho ea rako avei Ramai hinou veyu Ko Avei süna thaifüa tamoyu maitao donou razhai nasü rüpei khaitoue.

¹²Avah haina donou Ahi khouko peikhai touyu Eletao Mapao Jisu Khristaye Enou kalo paowe, daiolouzü puhnou Eye nou puhvei kuvah souzüe tea chopeia,

¹³Esü raiki teile hisü puhchi paoshi-a ea puhye souvea-souhrao peikhai-a Eye doloue. Ana Ramai nou Ahisü zhuvea peie daiolouzü Enou lü ha-a buyupha hinou sükhaimoa süsü soure.

¹⁴Alia Eletao Mapao nou puhvei phoutsü poa buyu zhuveasü Apei hi lakhai peie ea Khrista Jisu ye koa ali soulouyu hinou Eletao zha soua buyu lü ea leshi nasü puhnou Ahi peie.

¹⁵Paokhai touyu chipao hainasü chechewe ea teiteinou poloua louchelou veie, süolouzü mahmaitaoye khaipeire donou Khrista Jisu sü deiphao hi ve-e. Alia mah maitao hrülai hrohinou Enou shishilai nasüe;

¹⁶ana Khrista Jisu nou Ahi tapeiyu zhai süna vanou puh hai shishilai mahmai hi koute daizhozhou shamea peisa touyu sü maikhemai hrülaihi pongao peiwu-a kukhemai taoye-a panou süsü süloua tave puh hinou teisa ahri nasü ngaoloure donou Ramai nou Apei hi zhuvea peire.

¹⁷Teisa Veo, athai hayu ea nghithounou ngaomoyu, likhei baiyu Ramai puh hisü khuhaoyu ea teisanou adu-sho souyu nasü souloutheo, teisanou! Amen.

¹⁸Anahpoutu Timothi, rachi paola mainou raia ne vanou paokhai touyu chi sütao thaifüa chuo Enou ne bah hi chikha hainasü lüthou peiwe, süolouzü reih koloure donou chipao sütaosü bahsei büa seilo,

¹⁹alia nevei lü hinou soutaosoua bulo ea nevei lekhetsü nasü sheesha-a khailo. Mai kamainou puletao vei lekhetsüna paisü züpei bayu vanou puletao lü nasü souphe-souphore.

²⁰Puletao hrohisü Enou Saitan bah hi thoupeiyu Humenas ea Alekjandar puhaie; sübüa thoupeiyu hinou puhai nou Ramaiye paoshiyu hai shie touyu sü süloulai.