Read Poumei Naga 1 TIMOTHI 2 Bible Online

1 TIMOTHI 2 - Poumei Naga bible

1 TIMOTHI 2

¹Südonou, raikai-a maikhemai hrülai donou Ramai hi khore, veachi paore, maisühsou khopeire, alia kalo paopeire donou;

²alia vemaitao ea kukhe teidei khomaitao donou khopeiresü Enou süpeiwe, sükuyu vanou Eletao nou Ramaiye khuhao-a ea maikhemai hi ha teitei hinou zhai aveinou ta-a pai-rao ha-a ea kaona-a hrülousüe.

³Sübüa souyu sü veishoe ea sünanou Eletaoye khailu-apeio Ramai puh züpa souwe,

⁴daiolouzü maikhemai hrülainou khailu louresü ea acheche vei tsü süna süloure sü puhnou züpawe.

⁵Daiolouzü sühisü Ramai ea emai kohi kolelou-apeio ali bue, mai sünasü Khrista Jisue.

⁶Puhnou lah puhye sü maikhemai hrülaiye khailupa peire donou posheela peie. Sünanou Ramai nou emai hrülaiye panou khailulou nüwe touyu sü teile zhou avei hinou zhopaoh souwe.

⁷Alia sübüyu donou lü ea acheche vei chipao süna paosüngao peire donou tahrüh kukhemaivei sei-atamai ea dou-apeimai alibüa Eye seitawe. Enou da-a paomoe, acheche nasü paobaie!

⁸Südonou poutumainou buh liki hinou lekha-rarouyu moa zü-veiyu ha-a puletao vei sheeyu bahnou laposhu Ramai hi veachi paoyu sü Enou züpawe.

⁹Alia sübüa naotumaitao-a mainou zhuposhu tsükhouyu ea khizü-nouzüyu sahnü taonou noulai, puletao vei peishuhai phu khaiwu laimoe moa sana touhnou moa zhaivei sana chuhnou moa muhteiyu sahnü taonou tupfüwu laimoe,

¹⁰ana vah veinou tuloulai, daiolouzü rahrüzhai tayu naotumaitaoe tea pao-a laiyu puletaoye donou süsü züshoe.

¹¹Naotumaitao nou pai pakhaimoa ea natai-a douloulai.

¹²Enou naotumai taoyenou panou doupeiyu moa poutu maitao pei hi paopu soua panou buyu sü aetou moe; puletaosü nasha-a buvu zülai.

¹³Daiolouzü Adamye raikai-a soupeie, alia süshonou Efye soupeie.

¹⁴Alia Adamye athao nanou laloumoe; ana athao nanou naotupai sünaye laloua razhai nasü soukhore.

¹⁵Ana naotupai puhnou lü hinou avei zhai-hrü noupu koa thaokhaimoa hrüa bulouzü puhye sü tou-nah hrüyu hinou khaipa peilai.