Read Poumei Naga 1 TIMOTHI 3 Bible Online

1 TIMOTHI 3 - Poumei Naga bible

1 TIMOTHI 3

¹Paopei-a buyu chipao hainasü chechewe: Maita linou lüloumaime vei süthai-apeimai sounü louzü, puhsü veiveilai vahli züpa-a bure.

²Lüloumaime hi süthai-apeimai alihai hrümai zütouyu mai ali soulai; puh hai chapfü alikhei bubailai, alia puh hai kao-zü cholou süyu, lahye tukhalou süyu, khekai pfüyu; shevai-shesüye shetou peilou süyu ea puh hai maiye doutou peilou süyumai ali soulai.

³Puh hai zhaoh shozhiyu moa maiye tai-dava süyu maili soulaimoe, ana nataiyu ea maiye zü-veimoyu mai ali souvu zülai;

⁴puh hai lah puh kikha maiye zhotoulou süyu maili soulai ea puh nahmaitao hai hata hinou panou puh chi züa bulai.

⁵Daiolouzü maita linou lah puhvei kikhamaiye zhutoulou sümoa bulouzü, puhnou kabüa Ramai vei lüloumaimeye zhutou peiloulai.

⁶Puh hai lü hinou licheyu maili souvu zülai, molouzü puh-a lah khaophu souloua rashina büa mah dukhaiyu hi kaolou bailai.

⁷Alia puh hai vakoumainou tsükhouyu maili souvu zülai, sükulouzü puhsü ahrao ngaolaimoe ea rashina vei shohi delou laimoe.

⁸Sükua vahlümaitao-a khekai pfüvuzülai, mada laimoe, darkha zhaoh alaosou showu laimoe moa thou-sha vanou loküwu laimoe.

⁹Puletao sü sheeshayu lekhetsü hinou lüvei kheitsü nasü potou louyumai souvu zülai.

¹⁰Alia puletaoye rai-a zhai zhuwulai, süthainou sühinou chipayu hayu zhopaoh ngaolouyu shonou puletaoye panou vahlümai soulai.

¹¹Sübüa puletao vei chapfümaitao-a naotu khekaipfü souvu zülai, maichi-maila paoshi laimoe; ana kao-zü cholousü-a ha teitei hinou maiye panou louchelou veiyumai soulai.

¹²Vahlümai alihai chapfü alikhei bubailai, alia puh nahmaitao ea kikha maitaoye zhutoulou süyumai soulai.

¹³Vahlümai alisoua puletao vah veishoa sou bumaisü lah puletaoye donou khekai zhihsü kuloue ea Khrista Jisu hi buyu puletao vei lü vanou khuvei-a puletao nou chi paolou süe.

¹⁴E thala-a neye ve daoloure rei-a bue, ana Enou nehi seiko haina rüyuwo louzü,

¹⁵hakinou Enou thala-a vekhaimore toulouzü seiko hainanou kakuyu zhainou Eletao lahnou Ramai vei kikha hi süolouzü acheche vei kika ea kifü soua buyu hriyu Ramai vei lüloumaimehi tazüe touyu sü nehi paosü peilai.

¹⁶Alia Eletao rahrü zhaivei kheitsüna hai daizhozhou dusa touyu sü maitalinoua balouhoe; süolouzü: Puhsü emai zhu hinou ve ngaopeie, Rako hinou puhye sü souzüpeie, alia rakivamaitao nou puhye sü ngaoe. Puh vanou tahrüh khemai hrohi paodoue, deiphao buh liki hinou puhye sü loucheloue, alia puhye sü rakihi pokhere.