Read Poumei Naga 1 TIMOTHI 6 Bible Online

1 TIMOTHI 6 - Poumei Naga bible

1 TIMOTHI 6

¹Ramai zhih ea Eletao nou doupeiyu nasü panou paoshiwu more donou qila soua buyu puletao nou puletao paopu maiye tsükhou züdoue tea chovu zülai.

²Lüloucheyu paopu buyu qila taonou puletao vei paopu maiye hai thaihou jürai alibaie tea puletaoye ngaophou moyu souwuso. Süjüwo, puletao nou paopumai taoye veikoua kuvah soupeizüe daiolouzü puletao vei vah hinou zhiyu ngaolouyu paopumai taosü puletao nou leshiyu lüloumaitaoe. Nenou chi haitaosü doua doupeio ea paodoupei vuzükhaio.

³Maitalinou kukhe lüzhai tyakuli doupeia Eletao Mapao Jisu Khrista vei cheche chipao taosü aetoumoa ea Eletao vei rahrüzhai vei doupeiyu thaifüa tamolouzü

⁴puhsü khaophu souyu nou phouloure ea halia sükhaimoe. Puh hisü veimoyu züpa süolouzü chipao vanou veivanüyu ea züvanüyu nasü bue, alia sünanou avei zhai ngaobayu, züvayu, maiye sou ahrao peiyu, ashi hilonou letsüyu,

⁵alia tsü cholou sümoyu ea acheche naye thaowuyu maikhemai taoye koa tobai soumoa chi veiva-a laiyu sükhe maitao pove peiwe. Sübüyu maitao nou rahrüzhai hai kini buloure ludu ali baie tea chowe.

⁶Ovai, maitalinou puhnou bu-buyu nanou khra-a bulouzü rahrüzhai nanou mai aliye souni peiwe.

⁷Daiolouzü Eletao nou deiphao hi halia povemoe, alia Eletao nou deiphao hinou halia pota louhoe.

⁸Sübüyu thaisü, Eletao vei touso ea sabanüh bulouzü sünanou Eletaoye donou khabaizüe.

⁹Ana kini bunüyu maitaosü athaohi dulou baiwe ea alaosou avoyu ea zhulou veiyu züpa süolouzü puletaoye souhare ea ha-kare sho-rüh nahi loubaiwe.

¹⁰Daiolouzü pousha züpayu hai ashi teitei vei maa nasüe. Mai kamainou sünasü ngaolou nüshoa phoutayu vanou puletaosü lü hinou doushoa tare ea puletao lesü veahoyu tyalinou souphe-soukhore.

¹¹Ana oh Ramai vei mainare, newo haitao teiteisü thaowu-o, alia acheche hrü, rahrüzhai, lü, leshi, shameayu, alia nataiyu haitaoye donou telo.

¹²Lüvei reih nasü soutaosoua zülo; alia teisa ahri nasü lah neye donou kolo; daiolouzü nenou zhopaohmai taoli nghojünou nevei lü nasü dua paopayuki Ramai nou neye kulouyu sü hrü haina hisüe.

¹³Na teiteiye ahri peiyu Ramai ea Pontia Pilat nghojünou puhvei lü nasü dukhea-a paopayu Khrista Jisu nghojünou,

¹⁴chikha sünasü Eletao Mapao Jisu Khrista khaivemo koutesü chaalia taomoa ea sheetoua reiloure donou Enou nehi chikha peiwe.

¹⁵Rako avei ea likhu baiyu Aku Kulai, süolouzü vemaipei Veo ea paopumaipei Mapaowo puh veresü teile kao avei hinou Ramai nou povepeilai.

¹⁶Puh likhei teisanou hribaie; puh hai maitalinoua tavelou hoyu avana hinou hrüwe. Maita linoua puhye ngaokhai mohie moa maita linoua puhye ngaolou hoe. Puh hisü tsükhouyu ea adu-sho sü teisanou buyu souloutheo! Amen.

¹⁷Deiphao hrü haina hinou hania buyu maitaohi khaophu souwuso tea chikha peikhaio, ana puletao vei areih nahai vuh sümoyu deiphao kini nahi panou khaimoa Eletao valoure donou Eletao hi hatali sasa-a pei-a buyu Ramai hi panou khailoukhaio.

¹⁸Puletaoye nou vahvei souloure, vahvei souyu nou hani loure, maiye pakhaimoa peiyu ea kukhe maiye koa zhitou loure donou le roloure chikha peikhaio.

¹⁹Haibüa puletao nou lah puletaoye donou avei kifü kini nasü thaikhai donou podzükhai loulai. Alia süthaisü puletao nou ahri süolouzü ahri cheche nasü ngaoloulai.

²⁰Oh Timothi, nebah hi lüthou peikhai touyu taosü khotoulo. Ahraopachi ea mai kamainou kaokhai molai-a “Tsü” tea kuyu vo-a chi veivayu sütao hinou tareilo.

²¹Daiolouzü kamainou sübüyu tsü nasü bue tea po-a laiyu hinou puletaosü lüvei luduna hinou tala-tacho tare. Ramai zhuvea nou neletao hrülaiye koa buyu sü souloutheo.