Read Poumei Naga 2 TIMOTHI 3 Bible Online

2 TIMOTHI 3 - Poumei Naga bible

2 TIMOTHI 3

¹Ana akhai teithetao hisü tatei shoyu pha-teile velai touyu sü süa bulo.

²Daiolouzü maikhe mainou haibülai süolouzü, lahye leshi baiyu, loküyu, aduzhai souyu, khaophu souyu, chi souyu, pfüpuo chi zübayu, soupei muh sümoyu, sheemoyu,

³leshilou sümoyu, maiye khaipeilou hoyu, maichi-maila paoshiyu, lahye tukhalou sümoyu, ssü shiyu, avei naye ngaorayu,

⁴khei-a ngaobamai mü boyu, le souyu, nou khouyu, Ramaiye leshiyu jünou pfüphao vayu naye leshiyu sükuyu sü palai;

⁵puletao nou vakouhiwo louzü Ramaiye lüyu zhai soulai, ana sünavei acheche khouko süwo louzü balai. Sübüyu maitao hinou tarei talo.

⁶Daiolouzü puletao hrohinou kamainou ki kihi taloua lah puletao vei mah vanou kou süa pfüa buyu ea ashiye züpayu tyaliye panou süthaia laiyu,

⁷maitali chi teisanou keinü-a buyu ana hatakia acheche naye sü sülou hoyu, lelou hoyu naotumai taoye sü puletao nou koloure.

⁸Janne ea Jambre nou Mosesye motouyu büa, tsü shitayu ea lü hinou ha-ka tayu mai haitao nou-a acheche naye sü motouwe.

⁹Ana puletaosü vei-a phasho takoulou laimoe, daiolouzü mai sühaibüa puletaosü daizhozhou vosa touyu sü maikhemai hrülainou ngaolai.

¹⁰Ana newo Avei doupeiyu, Azhaidou, alia Ahrühi soure tsüdo, Alü; Avei shameayu, Avei leshi, Avei teisanou shameayu,

¹¹mainou Eye souvea-souhoyu ea Avei veahoyu sütao veishi thaisü füloure. Antiok, Ikonia ea Lustra hinou Ahi dai pasa süolouzü daizhozhou ngaopi-a souveayu sü Enou shameasa touyu teiteisü nenou sükhaiwe! Ana Mapaowo nou sütao veishi hinou Eye vupapeie.

¹²Acheche nou Khrista Jisu ye koa rahrümai hinou hrüyu züpayu mai taye sü souvea-souholai;

¹³alia mai ashimai ea aveikho soumai taosü mai kukhe maiye la-a ea lah puletaoye-a la-a shikhai shikhai tabailai.

¹⁴Ana newo nenou sülouyu ea soutaosoua louche louyu hinou tobai soumoa bulouwo. Nenou neye dou-apeimai taosü thaohmaisa touyu sü süwe,

¹⁵alia kabüa nenou taibu kinou Khrista Jisu ye lülouyu vanou neye khailu peiyu hi süthaithou peiyu ratsüna peilou süyu sheeyu larübvü taosü sülouresa touyu sü nenou süwe.

¹⁶Sheeyu larübvü teiteihai Ramai nou süpeie ea süsü achechena doupeire donou, mahyu naye züpeire donou, kao-zümoyu sü souzü peire donou, alia cheche hrü hrüloure doupeire donou zhishoe,

¹⁷alia haibüa Ramai vei kuvah souyu maisü vahvei tali souloure donou liche-a souda chekhou loulai.