Read Poumei Naga PHILEMON 1 Bible Online

PHILEMON 1 - Poumei Naga bible

PHILEMON 1

¹Jisu Khrista donou hukhahi loua buyu Paul alia Eletao thaihou jürai Timothi hinou — Eh sa ea koa vah souyu Philemon,

²alia neki hinou tavedzüa buyu lüloumaime, alia Eh tu Apphia ea Eh sa reihmai Arkippa hi rüwe.

³Eletao Puo Ramai ea Mapao Jisu Khrista nou zhuvea ea kaonayu hai neletao hi peiyu souloutheo.

⁴Eh thaihou jürai Philemon, Enou veachi paosa hai neye lichoa Aramai hi kalo paoa bue.

⁵Daiolouzü nenou sheeyu maitaoye leshiyu ea Mapao Jisu hi lü buyu hai Enou choue.

⁶alia Khrista hinou Eletao vei soua buyu avei teitei vei tsü nahai, maiye koa zha ngaochiyu nevei lü süna vanou panou dushu loure donou Enou veachi paowe.

⁷Leshiyu Achina Philemon, nevei leshina vanou Eye sou sasho peire ea le soudu peire, daiolouzü lülou maitao le hai ne vanou soukai peire.

⁸Südonou Khrista hinou nevei thaihou jürai ali büa Enou khuveia dai souzüe touyu hai paopeilou süe.

⁹Ana Enou neye leshiyu vanou, Paul, Ehai Jisu Khrista vei süh-seitana khaia ea chuo puh donou hukhahi bumai ali khaia Enou nehinou khoyu züpae.

¹⁰Hukha hinou ve puh puo soulouyu Enou Khrista hinou lah Anahpoutu soua buyu Onesimas donou khowe.

¹¹Raiki louzü neye donou puh hai halia koyu hae, ana chuwo chekhaoa puh hai ne donoua ea Eye donoua kosho loure.

¹²Enou chuwo Ale teiteinou koa puhye nehi sei dakhai vewe.

¹³Enou Ko Aveina donou hukhahi bubuki ne süh soua Eye soukha peire puhye panou Eye koa buyu hai Enou züpae.

¹⁴Sütoukhaia nenou lüpeiyu loumoa Enou halia souyu züpa moe, daiolouzü lah nedo hinou moa nou moshilaiyu hinou neye panou Eye soukhapei nümoe.

¹⁵Daiolouzü Onesimas nou ne nghojünou phajü donou tayu hai nenou puhye sada khaive teisanou nehi khailoure donou baia malae.

¹⁶Alia chuwo puh hai qila likhei baimore, ana qila ali jünou koushore: puh hai Khrista hinou leshiyu thaihou jürai ali souloure. Daizhozhou puh hai Eye donou koshosa! Ana koulih soua puh hai pfüphao hilonou ea Mapao hinou daizhozhou neye donou veikousa.

¹⁷Südonou nenou Eye hai koa vah soumai alie tea licho peilouzü, nenou Eye sapei laiyu büa puhye sapei khaio.

¹⁸Hakinou puhnou nepei hi kaozü moyu soukhaire toulouzü, moa nepao hata pfülouzü, sünahai Avei thousha pei hi chokhai peikhaio

¹⁹Haihai Paul Enou Abah vuzünou rüe: Enou sünahai khadapei khailai. (Ne hrümai koutea Apao pfüa bue touyu hai Enou paopayu phamoe).

²⁰Südonou Achina, Mapao zhih hinou leshia haisü Eye donou soupei khaio. Khrista hinou thaihou jüraili soua Ale hai sousa peikhaio!

²¹Enou haina hai rülukhu louchewe süolouzü Enou khoyu hai nenou soupei shulai, alia chechekhaoa nenou süjünou koua soupei shulai touyu hai Enou süe.

²²Süpeinou, Eye donou kideli souda peikhaio, daiolouzü neletao hrülai vei veachi hai Ramai nou popei loua Eye hai neletao hi peidakhai shulai touyuhai Enou louche-a bue.

²³Jisu Khrista donou Eye koa hukha pfüzhoyu Epaphras alia Eye koa vah souzhoyu Mark, Aristarkha, Demas ea Luk nou ne hi khurüyu chidoh seiwe.

²⁵Mapao Jisu Khrista zhuvea nou neletao hrülaiye koa buyu sü souloutheo.