Read Poumei Naga EBRIAMAI 1 Bible Online

EBRIAMAI 1 - Poumei Naga bible

EBRIAMAI 1

¹Raiki teilehi Ramai nou Eh pou-pao maitao hi rachipaola maitao vanou bo akuku hilonou vuh taoli chipao peie,

²ana akhai teithe haitao hisü puhnou Eletao hi puhnah Poutu vanou chi paopeire. Puh vanou Ramai nou teideiphao sü souloue ea puhye süna teitei vei kaalo nasü panou akhaiki thaoloure donou Ramai nou doloure.

³Puhnou Ramai vei khouko ava nasü phungaopeie ea puhvei chipao khouko nou teideiphaoye moupeia puhnou Ramai vei zhaihrü acheche nasü pfüa bue. Puhnou emai mah khüshee peiyu vei vah soucheyu thaisü; puhsü Raki hi buyu Aku Kulai Ramai bah zhoulo vahinou kou buloure.

⁴Nahpoutu nou zhih ngaolouyu sünanou rakivamai vei jünou dukou shoyu kua; puhnou puletao jünou dukousho loure.

⁵Daiolouzü Ramai nou puhvei rakiva maitao talihia haikua paokhai mohie, “Ne sü Anah Poutue; Zhou Esü Nepuo souloure.” Moa Ramai nou rakivamai tali vanou haikua paokhai moe, “Esü puh Puo soulai, alia puhsü Anah Poutu soulai.”

⁶Ana Ramai nou puhnah Poutu narai naye deiphao hi seikoureki haibüa paoe, “Ramai vei rakivamai hrülai nou puhye sü khurü vuzükhaio.”

⁷Ana rakivamaitao vanou Ramai nou paoe, “Ramai nou puhvei rakiva mai taoye sü teikhai kua alia puhvei kilaitaoye sü meikei kua soupeie.”

⁸Ana Nah Poutu vanou Ramai nou haibüa paoe: “Nevei vedeiwo, Oh Ramai, khainou khaikoute bulai! Nenou nemaitaoye sü acheche sünou tukha-a hrüwe.

⁹Newo acheche naye sü leshiwe ea kao-zümoyu naye sü ngaorawe. Sükuyu donou Ramai, ne Ramai nou neye doloure alia ne hisü ne samaitao hi peikhai touyu jünou dukou shoyu, mainou tsükhouyu vei asah nasü peikhaitoue.”

¹⁰Alia puhnou haibüa paokhaie, “Mapao, nenou soushurainou deiphao soupeie, alia lah ne bahnou ratei taosü soupeie.

¹¹Rateitao sü hata bailai, ana newo teisanou bulai; sütaosü sahba kua pahü-hüta bailai.

¹²Nenou sütaoye sü zaodu alikua pokhei khaiwu bailai, alia sütaosü sahbali kua databailai. Ana newo teisanou khei haobaie, alia ne hrümaiwo hakia akhai hae.”

¹³Ramai nou hakia puhvei rakivamai talihia haibüa paomoe: “Enou ne ngaobamaitaoye sü ne phitai soupeimo koute sü Abah zhoulo vanou kou buwo.”

¹⁴Sükuyu thaisü, rakivamaitao sü daisouyu maie? Puletao sü Ramai kuvah souyu ea khailu peiyu ngaoloure maitaoye soukha peiloure donou puhnou seive peiyu rakotao baie.