Read Poumei Naga EBRIAMAI 12 Bible Online

EBRIAMAI 12 - Poumei Naga bible

EBRIAMAI 12

¹Südonou Eletaoye dushoyu teihao büyu zhopaohmai taonou züpoa buyu donou, Eletaoye khua buyu teitei, alia Eletaoye lalapasoua phua buyu mah nasü polaiwu laikhe, alia Eletao nou shamea poa Eletao nghojü hi buyu tuvare nasü tulaikhe.

²Eletao nou Eletao lü soushupei raikaiyu ea sünaye sou liche peiyu Jisu hisü Eletao nou zhutei lou laikhe. Puhnou puh nghojünou khoa buyu asah süna donou kros vanou thaiyu süna donou ahrao loure ali-a hae tea choloua kros nasü shamealoue, alia chuwo puhsü Ramai Vebuh bahkha zhoulo vanou kou buloure.

³Neletao chathai-a le khaiho more donou mahmaitao bah hinou ngaoba-zhubayu tyali dao-a shamea louyu puhye sü chokhaio.

⁴Daiolouzü neletao nou mahye reihzüa buyu hisü chukoutea neletao nou neletao vei zhe kükoure koute numo hie.

⁵Ramai nou neletaoye puh nahmaitao tea paoyu le soudu peiyu chipao taosü neletao nou ngairewu? Süolouzü, “Anahna, Mapaowo nou tukhazü peiyu sü li lapawuso, alia puhnou neye züpeiyu kisü ne lekhaitawuso.

⁶Daiolouzü Mapaowo nou puhnou leshiyu mai hrülaiye sü tukhazü peiwe, alia puhnah soure maitaoye sü puhnou tudee peia salouwe.”

⁷Veahoyu sü tukhazü peibaie tea choloua shamealo. Neletao vei veahoyu sünanou Ramai nou neletaoye puh nahmai büa popeiwe touyu sü pongaowe; daiolouzü puonou tukhazü peimoyu nah poutu thaoh buwe?

⁸Maikhemai hrülai nou lou zha ngaozhoa buyu tukhazü peiyu nasü neletao nou ngaomoe toulouzü neletaosü nahche moa khanahtao bübaie.

⁹Süthebaimoa, Eletao hrülaiye tukhazü peiyu deiphao hi Eletao puo maitao bue ea Eletao nou puletaoye tsükhouwe. Sübüyu thaisü Eletao nou daizhozhou koua Eletao vei rako hilo Puo khehinou hrüa hrilai?

¹⁰Daiolouzü phajü donou deiphao hi Eletao puo khemai taonou Eletaoye puletao züpa soua tukhazü peiwe, ana Ramaiwo Eletaoye panou puhvei masheeyu nasü zha ngaozho loure donou süolouzü lah Eletao veiloure donou tukhazü peiwe.

¹¹Daiolouzü tukhazü peiyu teitei hai phajü donou louzü Eletaoye souva loure donou moa souvea peire bübaie. Ana thaikhai hinou sübüyu tukhazü peiyu hinou zülouyu maisü hrü acheche vei kaonayu shithou nasü shilouwe.

¹²Südonou noukeia buyu ne bahsü topalo ea lelouhoa buyu ne khoubousü soukhou pulo,

¹³alia phi shoyu nasü shiputa moa veiloure donou ludu züvei hinou talo.

¹⁴Maikhemai hrülaiye koa kaona-a hrüloure ea sheeyu hrü hrüloure telo, daiolouzü süsü loumoa maitalinoua Mapaoye ngaolaimoe.

¹⁵Ramai vei zhuvea hinou thaikhai talou more donou ea khataoyu matsülou loua paopa maiye soubvüa mai alaoye souzhaiwu more zhutoulo.

¹⁶Maitalia khulou vah soua moa tovaili vanou lah puhvei tsüzha zho touyu rahrüzhai hinou hrümoyu Esau bümore zhutoulo.

¹⁷Daiolouzü neletao nou süwe süolouzü thaikhai kisü puhnou puh puo vei hapeiyu nasü ngaolou nükhaia puhye sü bare, daiolouzü puhnou süsü nghidzü koua phoukhaia puhnou souyu süsü souda loure bolia phouhare.

¹⁸Daiolouzü neletaosü Israel maitao kua bahnou deilou veiyu, mei kei-a buyu, zhiteiyu ea maiteiyu teikhai-teirüshi buyu,

¹⁹be houngyu kho ea maikhe mainou chouloua chilia paopu khaiso tea khoyu lapai süna buyu Sinai Deichi sühi neletao tavemoe,

²⁰daiolouzü haibüa, “Khaosou tali koutenoua deichi süna sü ngheire toulouzü sünaye sü chuhnou deithea vuzülai,” tea chikha peiyu nasü puletao nou shamealou hore.

²¹Ngaoa buyu nasü ngaopiyule donou Moses nou haibüa paoe, “Ewo piyule-a nguhrührü baire!”

²²Ana neletaowo Zion Deichi ea hriyu Ramai vei nuhdu, rakivamai thethe buyu rakiva Jerusalem hi tave louloure.

²³Neletaowo rakihi zhih rüthouyu Ramai vei nah narai khemainou sasa-a vedzüyu sühi tave louloure. Neletaowo emai hrülai pei hi chiku-apeio Ramai ea sou liche peiwuyu achechemai rakotao hi tave louloure.

²⁴Neletao sü vo ashuna vei kolelou-apeio Jisu hi ea Abel zhe jünou zhuvea koushoa chipaoa buyu vurao khaitouyu zhe hi tave louloure.

²⁵Südonou leikeilo, alia chipao-a buyu puhye bayu souwuso. Daiolouzü deiphao hinou puletao hi Ramai chipao pove peiyu puhye puletao nou bayu ki puletao sü tupa louho louzü, raki hinou chi pao-a buyu puhye Eletao nou bayu kisü Eletao sü daizhozhou tateia tupa loulai!

²⁶Sükisü puh painou deiphaosü soungue, ana chuwo puhnou haibüa, “Enou chu-a deiphao thebaimoa raki-a soungulai,” tea apao peire.

²⁷“Chu-a” touyu chipao hainanou soukhai touyu nataosü sounguwulai ea potawulai, alia sübüa soungulou hoyu natao likhei bubailai touyu sü sheetoua pongaowe.

²⁸Südonou soungulou hoyu vedei nasü Eletao nou ngaolouyu vanou kalo paolaikhe, alia sübüa Eletao nou khuhaoyu ea piyu nou koa puh züpa zhaina hinou Ramaiye tholaikhe;

²⁹daiolouzü Eletao Ramaiwo chechenou hateitei souhalou süyu meie.