Read Poumei Naga EBRIAMAI 13 Bible Online

EBRIAMAI 13 - Poumei Naga bible

EBRIAMAI 13

¹Thaihou jüraiye leshiyu hai tobai soumoa bulouwo.

²Shevai-shesüye sasa-a shepeiyu sü ngaikhaiso, daiolouzü sübüa souyu hinou mai kamainou sükhaimoa rakivamaiye sheloue.

³Hukhahi bumaitao ye neletaoa puletaoye koa buyu büa licho peikhaio; alia mainou soushi soukha peiyu maitaoye neletao-a koa veahoyu büa licho peikhaio.

⁴Sheenghiyu hai maikhemai hrülainou tsükhoulai, alia sheenghiyu vei zühnasü souzhaiwuso; daiolouzü Ramai nou khakha chaozüyu ea maipfü maipuo sapayu maiye chikulai.

⁵Neletao hrümaisü pousha züpayu hinou dosoulo, alia neletao vei bubuyu sünanou khralou baio. Daiolouzü Ramai nou haibüa paoe, “E nehinou takhai laimoe; moa Enou neye thao khai laimoe.”

⁶Südonou Eletao nou haibüa khuveia paolousüe: “Mapaowo hai Eye soukha-apeio nasüe, E pilai moe. Mainou Ahi dai souloulai?”

⁷Raiki neletao hi Ramai chipao pao peiyu neletao vei süthai-apei maitaoye licho khaio. Puletao nou kabüa hrüsa ea thaisa touyu sü chokhaio, alia puletao vei lü dosü doulo.

⁸Jisu Khrista hai doa, zhoua ea teisa nou kheihao baie.

⁹Neletaoye tya kukuyu ea dosüku zhai hinou doupeiyu sütaoye panou süthaipoa tawuso, daiolouzü touso vei naanou reiyu nanou moa nou Ramai vei zhuvea nanou lekhe soukhou peiyu hai veishoe; naanou sütao reiyu maitaoye sütaonou soukha peimoe.

¹⁰Eletao vei sheelabuh ali bue, sühi posheela khaitouyu hatalia sahpao hinou kuvah soua buyu maitao nou touyu zülia hae.

¹¹Napao Peicha nanou khaosoutao zhesü mah donou posheela-a popeire donou Mashi Shilaibuh hi polouwe; ana khao soutao vei pfüphaowo louzü fühao vakou nou popa mei deiwu baiwe.

¹²Sükuyu donou Jisu-a lah puh zhenou maikhe maiye mah hinou soushee peire donou nuhdu vakounou thaie,

¹³südonou, Eletao-a fühao vakouhi tapa puh hi taveloua puhvei ahraoyu hisü zha ngaozho laikhe.

¹⁴Daiolouzü Eletaoye donou deiphao hai hisü teisa vei nuhdu hae, ana Eletaowo vere nuhdu nasü phoua laiwe.

¹⁵Sükuyu thaisü, Eletao nou Jisu vanou Ramai hisü tobai soumoa paoshoyu vei posheelayu süolouzü puhye nou Mapaowo süe tea münou dua paopayu sü popei laikhe.

¹⁶Avei vah souyu ea alinou liye soukhayu nasü ngaiwuso, daiolouzü sütaosü Ramai nou züpayu posheelayu taoe.

¹⁷Neletao vei süthai-apeimaitao chi zülo ea puletao khakhe hinou hrülo. Puletao nou neletao rakosü tobai soumoa khoa bue, daiolouzü puletao nou puletao vei vah peisü Ramai hi, chongao vuzülai. Neletao nou puletao chi zülouzü puletao nou puletao vahsü sasa-a soulai; sükumo louzü puletao sü le vealai, alia süsünou neletaoye donou ha zhiyu alia ngaolaimoe.

¹⁸Eletaoye donou tobai soumoa veachi paopeikhaio, Eh vei lekhetsü hai sheetoua bue touyu sü Ehnou süvuzü daiolouzü phabusa nou Ehnou cheche vah nasü sounüwe,

¹⁹alia Ramai nou thala-a Eye sü neletao hi seidakhai peire donou veachi paopeire Enou neletao hi khowe.

²⁰Puhvei posheelayu athai süna vanou teisa vei vo sünaye paoshee souyu, zhaotao vei Zhaokho-apeio Aduna, Eletao Mapao Jisu ye sü Ramai nou athai hinou souhrishu peire.

²¹Kaonayu Ramai nou nelelao hisü puhnou lichoyu souloure donou neletao nou moshilaiyu na avei teitei peiyu sü souloukhaio, alia Jisu Khrista vanou puhye panou puhnou züpa vahsü Eletao hinou soulou khaio. Alia Khrista hisü teisanou adusho paoyu sü souloukhaio! Amen.

²²Athaihou jürai khemai, le soudu peiyu chipao haitaosü shamea touloua keipeikhaio tea Enou neletao hi khowe; daiolouzü Enou neletao hi rüpeiyu seiko hainasü jübou baie.

²³Enou neletaoye panou sülounüwe, süolouzü Eletao thaihou jürai Timothiye hukha hinou phapeire. Puhnou thala-a velouzü puhye koa Enou neletaoye ve daolai.

²⁴Ehvei sasa-a khurüyu chidoh sü neletaoye süthai-apeimai ea sheeyumai hrülaihi peikhaio. Itali hi buyu thaihou jürai taonou neletao hi puletao vei sasa-a khurüyu chidoh seivewe.

²⁵Ramai zhuvea nou neletao hrülaiye koa buyu sü souloutheo. Amen.