Read Poumei Naga EBRIAMAI 2 Bible Online

EBRIAMAI 2 - Poumei Naga bible

EBRIAMAI 2

¹Südonou Eletaoye lapasou hüpoa talou more donou Eletao nou choulouyu acheehe nasü Eletao nou khoupushoa polou vuzülai.

²Daiolouzü rakivamai taonou paopei khaitouyu chipao nasü chechewe toulouzü, alia süna thaifüa tamoyu moa süsü zümoyu mai taliye puhnou ngaozüyu tudee nasü peibaiwe toulouzü,

³Eletao nou haibüyu dushoyu khailu peiyu nasü ngaophou molouzü kakua Eletao sü tupaloulai? Rairaikaia Mapaowo lahnou khailu peiyu hainasü paosüpeie, alia puh chi choulouyu puletao nou süsü chechewe tea Eletao hi zhopaoh peie.

⁴Sükuyu pha hinou Ramaia sühisü sheetaonou khupa vah tyalinou soua ea puhnou lichoyu thaifüa Rako Mashivei sapeina taonou pozhihpeia zhopaoh soungaopeie.

⁵Daiolouzü Eletao nou paoa buyu vere deiphao ashu naye sü rakivamaiye panou tukha loure Ramai nou buh peimoe.

⁶Ana sheeyu larübvü buh ali hinou haibüa paokhaitoue: “Oh Ramai, nenou puhye donou lichopeia buyu emaisü daie; moa nenou puhye donou zhupeia buyu emainah Poutu sü daie?

⁷Nenou puhye sü phajü donou rakivamaitao jünou daotu naphoua soupeie; Nenou puhye sü khouko avanou ea tsükhouyu noupu veo peirü rüpeire,

⁸alia puhye panou ha teitei pei hi kholoure.” Haibüa nou paoe, süolouzü Ramai nou Emaiye panou “Ha teitei pei hi kholoure;” sühisü sheesha-a ha teitei paothou khaire. Sütoukhaia, emai nou ha teitei pei hi khoa buyu sü chu Eletao nou ngaomoe.

⁹Ana teile phajü donou rakivamaitao jünou naphoua soupeikhai touyu, alia sükua Ramai vei zhuvea vanou maikhemai hrülai donou thaipei loure Jisu ye sü chuwo Eletao nou puhnou athai vei veahoyu süna daolouyu vanou khouko avanou ea tsükhouyu sünanou veo peirü rüpei khaitouyu sü ngaoe.

¹⁰Daiolouzü ha teiteiye soupeiyu ea sütaoye zhupeia buyu Ramai puhye donou maikhe maitaoliye save puhvei adusho nasü zha ngaozho loure donou panou veahoyu vanou Jisu ye southou liche peiyu sü kaozüshoe. Daiolouzü puletaoye khailu peiyu hi süthai save peiyu sü Jisu puhbaie.

¹¹Jisu nou maikhe maiye puletao vei mah hinou soushee peie, alia puh ea soushee louyu khemaitao hrülaisü puo ali hinou vebaie. Sükuyu donou puletaoye puh thaihou jürai khemai tea kuyu sü Jisu nou ahrao moe.

¹²Puhnou Ramai hi paoe, “Enou ne zhih sü Athaihou jürai maitao hi paongao peilai, Puletao nou vedzüa buyu hrohinou Enou neye paosholai.”

¹³Alia puhnou paokhaie, “Enou Avei lü sü Ramai hi pokhailai.” Alia puhnou paopukhaie, “Ramai nou Ahi peikhai touyu nahmaitaoye koa Esü haihi bue.”

¹⁴Puhnou “Nahmaitao” tea kuyu puletao sü kezhe pfüyu maikhemai baiyu donou Jisu lah-a puletao kuloua puletao vei zhai hrüsü zha ngaozho loure. Puhnou haikua souyu sü puhvei athai vanou athai pei hi khouko buyu Rashinaye souha loure donoue,

¹⁵alia haiküa athai naye piyu donou puletao hrüphao nou qila soupoa kouyu sümaitaoye do sou peire.

¹⁶Daiolouzü puhnou soukhayu hai cheche vuzünou rakivamai taoye moe, ana Abraham taonah maitaoye baie.

¹⁷Südonou puhnou Ramai vei kuvah souyuhi puletao vei acheche ea zhuvea peilou süyu Napao Peichana souloua maikhe maivei mah taosü khailu peiloure donou ha tali hinou puhye panou puh thaihou jürai maitao kheihao vuzülai.

¹⁸Alia chuo puhnou athao daoloua veahoyu sü shamea louyu vanou athao daoyu maitaoye sü puhnou soukha peilou süre.