Read Poumei Naga EBRIAMAI 3 Bible Online

EBRIAMAI 3 - Poumei Naga bible

EBRIAMAI 3

¹Südonou raki hilonou kulouyu hi koa louzha ngaozho louyu, sheeyu thaihou jürai khemai, Eletao nou füa laiyu lü haina vei sei-atana ea Napao Peichana Jisu ye lichokhaio.

²Moses nou Ramai ki hinou cheche-a vah souyu sübütoua, puh-a puhye vah haina soure donou dopeiyu Ramai hisü cheche-a tapeie.

³Ki souyu mai aliye ki süna jünou tsükhou kouyu sübüa Jisu ye hai Moses jünou koushoa tsükhou peizüe.

⁴Daiolouzü ki veishisü maikamai linou soue, ana ha teitei soupeiyu puhwo louzü Ramai baie.

⁵Moses hai kilai alikua Ramai ki hinou cheche-a hrüe, alia Ramai nou thaikhai hi paore sütao vanou puhnou zhopaoh peia chipaoe.

⁶Ana Khristawo Nah Poutu alikua cheche-a Ramai vei kisü khoe. Eletao nou rei-a buyu hisü khuveia ea louche touloua bulouzü Eletao sü puh kie.

⁷Südonou Rako Mashi nou paoyukua, “Neletao nou zhou Ramai pai chouloure toulouzü

⁸daoraichoki neletao puo-pao maitao nou rekounou Ramaiye zhai zhua puh pei hi motouyu sükibüa, neletao lesü khoushoyu souwuso.

⁹Sühinou puletao nou Avei vahsü po raidaipha ngaoloukhaia, puletao nou Eye la-a Azhai zhue.

¹⁰Südonou Enou maikha süna pei hisü raroua paoe, ‘Puletao sü teisanou paoyu zübae; alia puletao nou Aludu sü sülou moe.’

¹¹Enou rarouloua haibüa cha-chou soue; ‘Puletao nou Asobuh hisü, hakia velou laimoe!’ ”

¹²Südonou thaihou jürai khemai, leikeilo, molouzü neletao hrohinou maitalinou ashi ea louche moyu le nasü pfüloua neletaoye hriyu Ramai hinou sataloua panou kaoduta bailai.

¹³Ana neletao maitaliye-a panou mah vei do ashi nanou laloua le khoutalou more donou sheeyu larübvü hi “Zhou” touyu chipao nasü Eletaoye donou bubu kinou teithetsü nou neletao alinou liye soukha peia buvuzülo.

¹⁴Daiolouzü Eletao nou shurai hinou louche-a buyu sü akhai koute potouloua buloure toulouzü Eletao hrülai sü Khristaye koa vah souyu maitaoe.

¹⁵Haisü sheeyu larübvü hinou paokhaitoue: “Neletao zhou Ramai pai chouloure toulouzü, neletao puo-paomai taonou rekounou Ramai pei hi motouyu süki kua neletao lesü khoushoyu souwuso.”

¹⁶Ramai pai chouloua puh pei hi motouyu maitaosü thaoh maitaoe? Sümaitao sü Moses nou Ejipt teidei hinou sapoa tapayu puletao hrülai mowu?

¹⁷Alia Ramai nou thaoh pei hi po raidai rarouwe? Süsü rekounou puletao pfüphaosü kaodua thaitayu mah souyu maikhe maitaoye mowu?

¹⁸Alia paoyu zübayu maitao hi moa nou thaohmaiye panou puhvei soyu buh hi hakia loulaimoe tea Ramai nou cha-chou souwe?

¹⁹Südonou louche moyu vanou puletao sü sobuh sühi loulou hore touyu sü Eletao nou ngaowe.