Read Poumei Naga EBRIAMAI 8 Bible Online

EBRIAMAI 8 - Poumei Naga bible

EBRIAMAI 8

¹Chuwo Eletao nou pao-a buyu ko teitei nasüwo louzü Eletao vei raki hi adusho vei vebuh bahkha zhoulo vanou chobua buyu haikuyu napao peicha nasü bue.

²Puhnou napao peichana soua Mashi Shilaibuh süolouzü emainou moanou Mapaowo nou soushu pakhai touyu acheche sahpaona hinou kuvah soua bue.

³Daiolouzü napao peichamai liye sü Ramai hi sapeina pothore ea kikhaorüh sheelare donou dothoupei khaitoue, alia sükuyu donou Eletao Napao Peichana-a pothore hali buvuzülai.

⁴Puh hai deiphao hi buyushowo, puhsü hakia napao soukhai laimoe; daiolouzü sühisü razhai thaifüa sapeina pothore napaomaitao bue.

⁵Puletao nou napaomaitao soua vah souyu hai chechenou raki hi buyu süna zhairai ea khu baie; daiolouzü Moses nou sahpao sünasü soushu parebü hinou Ramai nou puh hi haibüa paopeie, “Deichi hinou ne hi ngaopeiyu zhaido süna thaifüa ha teitei souloure donou ne soutousoua zhulo.”

⁶Ana chuwo Jisu nou Ramai ea puhvei maitao kolehi souda khaiyu vo sünanou veikouyu donou puh hisü napao kukhe maitao vei jünou veikouyu napao vei vah nasü peire, daiolouzü süsü veikouyu apaopei khaitouyutao vanou soushupa khaitoue.

⁷Daiolouzü vo araina hi mahyu hayukowo, ahai chena donou phoure matsülia hae.

⁸Ana Ramai nou puhmaitao hinou mah phoupaloua haikua paoe, “Mapaowo nou paoe, Israel ea Judah kikhamaitaoye koa Enou vo ashu soushu laiyu teithe taosü velai.

⁹Süsü Enou puletao vei puo-pao maitaoye baokao süthailoua Ejipt teidei hinou sapayu teithe zhou puletaoye koa soukhai touyu vo süna railaimoe. Daiolouzü puletao sü Avei vo hisü tobai soumoa bupeimoe, alia südonou Enou puletaoye chopeikhai more, tea Mapao nou paoe.

¹⁰Chuwo, velaiyu teithetao hinou Enou Israel maitaoye koa soulaiyu vo nasü hainare, tea Mapao nou paoe: Enou Avei razhai nasü puletao tsü lekhe hi pothoukhai peilai ea sütaosü puletao lethou pei hi rüthoukhai peilai. Esü puletao Ramai soulai, alia puletao sü Amai soulai.

¹¹Alia puletao maitalinoua lah puh kinapa hi moa puh thaihou jürai mai hi ‘Mapaoye sülo’ tea doupei laimoe. Daiolouzü puletao tainou dukoute Eye sükhailai.

¹²Enou puletao mahsü khaipeilai ea puletao vei kaozü moyu sü lichopu peilai moe.”

¹³Ramai nou vo ashuna vanou chi pao-a puhnou arai naye sü panou aku na souwure; alia kutayu ea ratayu na talisü thala-a hata bailai.