Read Poumei Naga 1 PITAR 1 Bible Online

1 PITAR 1 - Poumei Naga bible

1 PITAR 1

¹Jisu Khrista vei Sei-atamai Pitar nou Pontas, Galatia, Kappadokia, Asia ea Bithunia hinou shetumai soua raroua hrüa buyu Ramai nou dolouyu maitaohi rüwe.

²Neletaoye Puo, Ramai puhvei aroh thaifüa doloure, alia Jisu Khrista chi panou züloure donou ea puh zhenou soushee peiloure donou neletaoye puhvei Rakonou sheeyu maitao soupeire. Zhuvea ea kaonayu alaosou neletao pei hi buyu sü souloukhaio.

³Eletao Mapao Jisu Khrista Puo ea Ramai puhye paosho laikhe! Daiolouzü puhvei dushoyu zhuvea vanou Jisu Khristaye panou athai hinou hrishuloua puhnou Eletao hi hrü ashusü peiwure. Hainanou Eletao lekhe hisü hriyu areih nanou pothou phoupeire,

⁴alia südonou Eletao nou Ramai nou puhmaitaoye donou khaidapei khaitouyu kaa taosü zhida-a bue. Puhnou kaa sütaosü neletaoye donou rakihi khaipei khaitoue, alia sühisü sütaosü hakhai laimoe, soushiwu laimoe moa raitakhai laimoe.

⁵Kaa sütaosü akhai teithehi pongao peire donou souda-a buyu khailu peiyu süna donou lü vanou Ramai khoukonou pokutoupei khaitouyu neletaoye donoue.

⁶Neletao nou chu phajü neletao hi vedao-a buyu veahoyu tyali haitao donou veashoa bukhai-a süna vanou salo.

⁷Veahoyu sütaosü neletao vei lühai cheche-e touyu popa ngaopeire donou baie. Souhalou veiyu sana koute-a mei hinou pothou dei-a zhai zhue; alia sübüa sana jünou koushoa muhteiyu neletao vei lü-a teisa panou buloure donou zhai zhuvu zülai. Süthaisü Jisu Khristaye ngaopeiyu teithe kisü neletaosü paoshoyu, kathe ea tsükhouyu sü ngaoloulai.

⁸Puhye ngaolou mokhai-a neletao nou puhye leshiwe, alia chu neletao nou puhye ngaomokhai-a neletao nou puhye louchewe ea paoshalou hoa savawe,

⁹daiolouzü neletao nou puhye lüa buyu süna vanou neletao nou neletao rako khailu louyu sü ngaoloure.

¹⁰Khailu peiyu haina vanou rachi paolamaitao nou soutaosoua phoua zhue ea puletao nou Ramai nou neletao hi peilaiyu zhuvea haina vanou rai-a paopa peire.

¹¹Puletao nou teilesü dukinou laisa ea süsü kabüa velaisa tea te-a phoue. Pha hainasü Khrista vei Rakonou puletao hi louloua Khrista hai veahoyu shamea vuzülai ea süshonou puhvei kathesü ngaolai tea rai-a paopa peiyu teile süsüe.

¹²Ramai nou rachi paolamai haitao hisü puletao vei vah hai lah puletao zhiloure donou moe ana neletao donou baie tea pongao peie, süolouzü chu neletao nou rakinou seikouyu Rako Mashi khouko vanou Ko Avei paosü peiyu rachi paopei maitao hinou choulouyu chi sütao vanou puletao nou raia paopeire. Rakivamai koutenoua chi haitao sü sülou nüshoa bue.

¹³Südonou vah souloure neletao lehai souda khailo. Tsü pfüloua Jisu Khristaye ngaopeiyuki neletao hi peilaiyu zhuvea süna hisü neletao reitei-a bulo.

¹⁴Paoyu züyu nahmaitao kua raiki neletao vei avoyu pfüphao züpa süna thaifüa tawuso,

¹⁵ana neletaoye kulouyu puhnou sheeyu kua neletao nou tayu zhai teitei hinou neletao lah shee-a bulo.

¹⁶Sheeyu larübvü hinou paoe, “Neletao nou shee-a bulai, daiolouzü Ewo sheewe.”

¹⁷Mai ali linou souyu thaifüa maikhemai hrülaiye zhai ali hinou chikuyu Ramai hi neletao nou veachi paoyuki puhye sü Puo tea kulouzü, deiphao hi hrübuki neletao hrümaisü puhye khuhao-a hrülo.

¹⁸Daiolouzü neletaoye neletao puopao hinou ngaolouyu raohayu hrümai hinou kakuyu muhnou khapei-a mado soupeiresa touyu sü neletao nou süwe. Muh süsü hakalou veiyu süolouzü husha moa sana hatalinou moe;

¹⁹ana chaalia hayu moa sheetouyu zhaotu büyu muhtei shoyu Khrista vei zhenou hrüloue.

²⁰Deiphao soumo jühinou Ramai nou puhye sü doloure, alia neletaoye donou akhai teithe haitao hinou pongao peire.

²¹Puh vanou neletao nou puhye athai hinou souhrishu peiyu ea puhye kathe soupeiyu Ramaiye louchewe; alia südonou neletao vei lü ea areih nasü Ramai hi bue.

²²Chuwo neletao nou neletao thaihou jürai maitaoye soutaosoua leshi loure acheche hinou paoyu züa neletao rakosü soushee louyu donou, neletao le teiteinou rako loushoa alinou liye leshia bulo.

²³Daiolouzü hriyu ea teisa halou hoyu Ramai chipao vanou neletaosü hakalou veiyu thoutai hilonou moa hakoulou hoyu thoutai hilonou nashu loure;

²⁴daiolouzü, “Emai hrülaisü pouhou kubaie, alia puletao vei kathe teiteisü rekouhi poupa kubaie, Pouhoutao-a vütabaie, alia poupatao-a raitabaie,

²⁵ana Mapao vei chipaowo louzü teisanou bubaie.” Neletao hi paongao peiyu chipao haina hai Ko Avei nasüe.