Read Poumei Naga 1 PITAR 2 Bible Online

1 PITAR 2 - Poumei Naga bible

1 PITAR 2

¹Südonou neletao nou ashi teitei, amada teitei, aveikho souyu teitei, maiye ngaoraiyu teitei moa maiye sou-ahraoyu chi paoyu teiteisü thaokhaiwuwo.

²Nah-pumaitou kua neletao-a dushu paloua khailu loure donou teisanou rako vei naodzü sü züpalo;

³daiolouzü neletao nou Mapao vei zhuvea peilou süyu sü süloure.

⁴Emainou bakhai-a Ramai nou muhteishoe tea dolouyu hriyu chuh Mapao hisü tavelo.

⁵Hriyu chuhtao kua tavelo, alia neletao nou sheeyu napaomaitao kua Jisu Khrista vanou Ramai hi rako hilo ea polou veiyu posheelayu natao popei-a kuvah soure buh rako vei rathoki soushupa loure donou neletaoye panou seilo.

⁶Daiolouzü sheeyu larübvü nou paoe, “Zhukhaio, Enou Zion hisü dolouyu ea muhteiyu ki kainghou chuh ali shukhaitoue, alia puhye loucheyumai taliye sü panou ahraokhai laimoe.”

⁷Louche louyu neletao donou chuh hainasü muh teishoe, ana louche moyu puletao donou louzü: “Ki souyu mainou lulaiyu chuh nasü ki kainghouhi matsü tsülai chuhna daloure.”

⁸Alia kukhe sheeyu larübvü buh ali hinou paoe, “Maikhe maiye panou phi sülou laiyu chuh nasü hainae, puletaoye panou kaodu laiyu chuhdu nasü hainae.” Puletao sü phi süloure daiolouzü puletao nou chipao nasü louche moe; sükuyu hai puletaoye donou Ramai nou lichoyu nasüe.

⁹Ana neletaowo dopawuyu maitya nasüe, Veo kihi napao maitaoe, sheeyu tahrüh-e, lah Ramai vei maitaoe, süolouzü neletaoye teizhi hinou lah puhvei khupayu avahi kupa louyu Ramai puhnou puhvei khupa vahtao paongao peire donou neletaoye doloure.

¹⁰Teile ali hiwo neletaowo Ramai vei maitaomoe, ana chuwo neletaowo puhmai souloure; teile ali hiwo neletaowo Ramai zhuvea sümoe, ana chuwo neletao nou puhvei zhuvea ngaoloure.

¹¹Asa khemaitao, deiphao hinou shesü-shetumai ali kua Enou neletao hi khowe. Neletao rakoye teisanou reih züa buyu pfüphao vei züpa nasü thaowuwo.

¹²Neletao zhaihrü sü tahrüh kukhe maitao hrohinou veitoua talo, sükua puletao nou neletaoye ashi souyumai tea mah dukhaiyu kisü, puletao nou neletao vei vah aveitaosü ngaoloua Ramaiye puhnou veyu teithe kihi paosholai.

¹³Mapaowo donou neletao lah teidei khoyu maitao hrülai khakhe hi bulo; adudulai soua buyu Veo khakhe hi,

¹⁴moa ashi souyu maitaoye tukha peire ea avei souyu maitaoye paosho peire donou puhnou seive peiyu teidei paopu maitao khakhehi bulo.

¹⁵Daiolouzü neletao nou kaozüa souyu vah avei taonou tsühayu avomaiye panou paikhaimoa buyu sü Ramai nou züpae.

¹⁶Mado soulouyu mai kua hrülo; sütoukhaia ashi taliye pokuloure donou neletao vei amado nasü seiwuso, ana Ramai vei kilaitao kua hrülo.

¹⁷Mai hrülaiye tsükhoulo, lülouyu thaihou jüraimai taoye leshilo. Ramaiye pilo ea veo adunaye tsükhoulo.

¹⁸Kilaitao, neletao nou lah neletao vei zhuvea peilousü ea le nataiyu paopu maitao khehi likhei baimoa, veimoyu paopu maitao khehi-a puletaoye tsükhou shoyu noupu soutaosoua bulo.

¹⁹Neletao nou ngaozü moyu avea nasü shamea louzü, süna vanou Ramai nou neletaoye hapeilai, daiolouzü puhvei lichoyu sü neletao nou süa bue.

²⁰Daiolouzü soumahyu vanou neletaoye dapeiwu-a süda sünasü neletao nou shameawu louzü sühisü dai paoshore bue? Ana neletao nou kaozü-a soulouyu vanou neletaoye souveayu sü shamea louzü, süna vanou Ramai nou neletaoye hapeilai.

²¹Daiolouzü haina vanou Ramai nou neletaoye kuloure, daiolouzü neletaoye panou puh phihea thaoloure Khrista nou neletaoye donou veaho peiwu-a neletao hi puhzhai douloure do nasü thaodai peiwure.

²²Puhwo mah lia soukhai moe, alia puh tai-lü hinou madayu chi hakia choukhai mohie.

²³Puhye ngheihyu kisü, puhnou puletao hi reive ngheihda moe; puhnou veahoyu kisü, puhnou soupi-a chi paomoe, ana puhnou cheche-a chiku peiyu puhye sü louchewe.

²⁴Eletaoye panou mah hilonou thailoua acheche hilonou hriloure donou Khrista lahnou puh pfüzhonou Eletao mahsü kros vanou pfüpeire. Puhvei zheemütaonou neletaoye souvei peiwure.

²⁵Daiolouzü neletaosü motayu zhaotao kheihao baie, anou chuwo zhaokhowo ea neletao rako khopeiyu puh thaisü panou füloure donou neletaoye podakhai vere.