Read Poumei Naga 1 PITAR 4 Bible Online

1 PITAR 4 - Poumei Naga bible

1 PITAR 4

¹Südonou Khrista nou puh pfüzhonou veapeiyu vanou, lah neletao-a puhnou souyu zhai sükua soutsülo; daiolouzü pfüzho hinou veahoyu mai talisü mah hi bupukhai more.

²Südonou, chuwo neletao vei deiphao hrümai hai vasou züpa soumoa Ramai leli soua hrü vuzülai.

³Neletaosü Ramaiye sümoyu maitao nou sounüyu vah süna soua süolouzü, khulou souyu, vasou züpa souyu, zhaoh shozhiyu, avomai hrü hrüyu, meme soua zhaoh shoyu, alia ngaorayu basharaye thoa raikinou teile alao souhare.

⁴Alia haikuyu ashi ea chaochao souyu hrü haina hinou neletao nou chuwo puletaoye koa lou zhopeimo khaie puletao sü khupa loua neletaoye paoshiwe.

⁵Ana puletaosü hrimai ea thaimaiye chikure donou souda-a buyu Ramai hi lah puletao vei soupfücho nasü peilai.

⁶Qo haina vanou maita mailiye chikuyu kua puletao vei pfüphao hribuki hi chikuwuyu puletaoye panou Ramai kua rako hilonou hriloure donou Ko Avei nasü thaimai hi-a paodoue.

⁷Na veishi vei akhai teilesü ngheire. Südonou neletao veachi pao-a buloure donou lahnou lahye tukha-a ea leikei-a bulo.

⁸Ha pfüphou jünou alinou liye lenoushoa leshilo, daiolouzü leshinou mah alaoye hongipeiwe.

⁹Noyu soukhaimoa neletao alinou liye shepeio.

¹⁰Neletao maili linou Ramai vei sapeina chekhei ngaolouyu donou, Ramai vei tyaku kuyu zhuvea vei avei peipha peimai soua süsü alinou ali donou po-a seilo.

¹¹Maita linou ko paodou louzü süsü Ramai chipaonou paodoulai, maita linou kuvah soulouzü süsü Ramai nou puh hi peikhai touyu khoukonou poa kuvah soulai, sükua Jisu Khrista vanou Ramaiye ha pfüphou hinou paosho loure soulai. Kathe ea adusho sü Jisu Khrista veie teisanou. Amen.

¹²Leshi Asakhemai, neletaoye zhai zhure donou neletao pei hi vedao-a buyu veaho shoyu süna donou ha sütholi neletao hi vewe tea khupayu souwuso.

¹³Ana neletao nou Khrista vei khouko ava pongaoyuki lichekhoua lesa loure donou Khrista vei veahoyu hi zha ngaozhoyu hisü lesashoa bulo.

¹⁴Neletaoye Khrista zhih donou sou ahrao peilouzü rakoveie, daiolouzü khouko avavei ea Ramai vei Rakonou neletao pei hisü bue.

¹⁵Neletao maitalia maiye datheamai moa avaomai moa vahshi soumai moa mai kukhe vahnou lah vah souyu hinou veahoyu souwuso.

¹⁶Anou maitalinou Khristamai ali souyu donou veahoe toulouzü, süna vanou ahraowuso, ana puhsü Khrista zhih pfüe tea Ramaiye paosholo.

¹⁷Chiku shure teilesü veloure, alia lah Ramai vei maitaoye nou chiku railai. Haisü Eletao hinou kushurai louzü, Ramai chipao avei louche moyu maitao hisü kakua akhai soulaisa?

¹⁸Sheeyu larübvü hinou paoyu kua, “Achecheyu mai khailu louyu hai tateisho louzü, Ramaiye sümoyu mahmaitao hisü dai palaisa?”

¹⁹Südonou Ramai leli thaifüa veahoyu maitao nou puletao vei rako hai louchelou veiyu puletao vei soupei Mapao bah hi peithouwua tobai soumoa vah avei souloukhaio.