Read Poumei Naga 2 PITAR 1 Bible Online

2 PITAR 1 - Poumei Naga bible

2 PITAR 1

¹Jisu Khrista vei kilai ea Sei-atana Simon Pitar hinou — Eletao Ramai ea khailu-apeio Jisu Khrista vei achechena vanou Eletao vei muh teishoyu lü sübüa peikhai touyu puletao hi seiwe:

²Neletao nou Ramaiye ea Eletao Mapao Jisu ye süyu süna vanou neletao pei hi zhuvea ea kaonayu alaosou buyu sü souloukhaio.

³Eletao nou lah puhvei khouko ava ea avei veilai nasü koa zha ngaozhore donou Eletaoye kulouyu puhye sülouyu Eletao vei tsü süna vanou Eletao nou acheche hrü hrüloure moshilaiyu teiteisü Ramai nou Eletao hi puhvei ramai hilo vei khouko nou süsü Eletao hi peiwure.

⁴Haikua, puhnou apaopei khaitouyu dushoyu ea muhtei shoyu sapeina taosü Eletao hi peiwure, süolouzü sapeina haitao vanou, ke-zhe züpa vanou veyu deiphao hi buyu ashi süna hinou neletao nou tupaloua Ramai vei zhai nasü koa zha ngaozho loulai.

⁵Qo haina donou, neletao vei lü hisü avei nanou thoupu loure soutaosoua telo; alia neletao vei aveina hisü tsü thoupulo;

⁶alia neletao vei tsüna hisü lahnou lahye tukhayu sünanou ea lahnou lahye tukhayu hisü shameayu sünanou thoupulo; alia neletao vei shameayu sühisü rahrümai sünanou thoupulo;

⁷alia rahrümai hisü thaihou jüraimaiye leshiyu sünanou ea thaihou jüraiye leshiyu sühisü leshi nanou thoupulo.

⁸Daiolouzü, tsüdo haitao hai neletao veie toulouzü ea neletao hi alaosoua bulouzü, sütaonou Eletao Mapao Jisu Khristaye neletao nou sü-a buyu hisü panou chih-a ea veipua vah souloulai.

⁹Ana tsüdo haitao hayu mai talisü nghichamai moa nghi ngaotoulou momai kue ea raichoki puhvei mah hinou puhye sü soushee peire touyu sü ngaiwure.

¹⁰Südonou, Athaihou jürai khemai, neletaoye kulouyu ea dolouyu sü teisanou chih-a laloure donou lenou pulo, daiolouzü neletao nou haisü soua bulouzü, neletaosü hakia kaota louhoe.

¹¹Haibüa neletao hisü Eletao Mapao ea khailu-apeio Jisu Khrista vei teisa halouho Vedei hi velou loure zü teiteisü peiwulai.

¹²Südonou neletao nou sütao hai sütoua ea neletao nou ngaolouyu achechena hinou latoua bukhaia Enou neletaoye haitao vanou teisa nou panou lichoa bulounüe.

¹³Enou hribu sasü, haitao vanou neletaoye paothou liche peizüe tea Enou chowe.

¹⁴Enou süwe, süolouzü Eletao Mapao Jisu Khrista nou Ahi sheesha-a paopeiyu donou Esü thala-a Apfüphao haina hai thaowua talaire.

¹⁵Südonou Enou thaitayu thai teisanou neletaoye panou haitaosü licho loure donou luduli phoupeire Enou soutaosou telai.

¹⁶Daiolouzü, Ehnou neletao hi Eletao Mapao Jisu Khrista nou adusho hinou khaive laiyu ko süna paongao peiyu kisü, daomaiko talinou sei-a paongao moe, ana lah Eh nghithou vuzünou puhvei adushosü ngaoe.

¹⁷Puo, Ramai hinou puhnou tsükhouyu ea khouko ava ngaoyu kisü, alia Aku Kulaio Ramai hinou pai linou shakoua puh hi, “Haina hai lah Enou leshiyu Anah Poutue, puh pei hisü Enou khraso peire!” tea paoyu kisü Eletao-a sühisü bue.

¹⁸Eletao nou puhye koa mashi deichi vanou buyuki hinou, lah Eletao nou raki vanou pai hainasü shakouyu choue.

¹⁹Südonou Ehnou rachi paola mainou paoyu chipaosü louche putare. Neletao nou haina hisü le peitou louzü veilai, daiolouzü haina hai teithe louloua shona teivuh vei avanou neletao lekhehi vapeimo koute teizhi buh hinou va-a buyu meibvü süna kue.

²⁰Sütoukhaia, ha teitei jünou neletao nou haihai sülou vuzülai, süolouzü sheeyu larübvü hinou paokhai touyu rachi hai maitalinoua lah puh mado nou dapa loumoe.

²¹Daiolouzü rachi talihai emai leli hinou vekhai mohie, ana Ramai hinou veyu chipaosü puletao nou paoyu kisü Rako Mashinou maikhe maiye sü süpei baie.