Read Poumei Naga 2 PITAR 3 Bible Online

2 PITAR 3 - Poumei Naga bible

2 PITAR 3

¹Leshiyu Asakhemai, chuwo haina hai Enou neletao hi rüwuyu Seiko ahai chena süe. Seiko haihai hinou neletao hi chi haitao paopeia panou neletao lekhehi tsü avei paloure Enou tewe.

²Sheeyu rachi paolamai taonou dao rainou paopa khaitouyu chipaotao ea neletao vei Sei-atamaitao nou neletao hi peikhai touyu Mapao ea khailu-apeio vei chikhatao hai Enou neletaoye panou licholou nüwe.

³Raikai-a, neletao nou sülou vuzü molouzü shie, süolouzü, akhai teithetao hisü, lah puletao vei ke-zhe züpa thaifüa hrüyu mai kamai velai, puletao nou neletaoye konüa,

⁴haikua paolai, “Puhnou velai tea apaopei khaitoue, puhnou apaopei mowu? Puh kahi bue? Eh puopao maisü thaita khaire, ana deiphao soushu-arai kua chu koutesü ha teitei hai kheihao-a bubaie!”

⁵Dao raiki hinou Ramai nou chikha pei-a rakitao ea deiphao hai soupeie touyu vei acheche nasü puletao nou süh-a bulukhu chopei bae. Deiphao hai dzü hinou ea dzü vanou soupeie,

⁶alia dzü vanou süolouzü dzüdu veloua dao raiki deiphao nasü souhare.

⁷Ana chu buyu rakitao ea deiphao hainawo louzü panou meinou souhawure donou Ramai vei chikha sünanou pokhaiwure. Sütaosü ramai loumoyu maikhe maitaoye chikuyu ea souhawumo teithe koute donou pokhaire.

⁸Ana leshiyu Asakhemai, haina hai ngaipeiso! Süolouzü, Mapao nghojühiwo nai teithe ea po theli hai takuyu hae; puhye donou hai haisü kheihao baie.

⁹Kamainou shosho soubaie tea chokhai-a, Mapaowo louzü puhnou apaopei khaitouyu soupeire hisü shosho soumoe. Süjüwo, puhnou neletaoye koa shamea peiwe, daiolouzü puhnou maitaliye hai panou souhawuyu sü züpa moe, ana maikhemai hrülaiye panou puletao mah hinou le dalouyu sü züpawe.

¹⁰Ana Mapao vei Teithe hai avaomai kua velai. Teithe sükisü rakitaosü kho chihshoyu alinou koa habailai, ratei hi buyu nataosü meisou hinou chahalai, alia deiphao ea sühi buyu nateitei habailai.

¹¹Na haitao veishi hai haibüa souha laiyu donou, neletaosü kakuyu mai soulaisa? Neletao vei hrümaisü shee vuzülai ea Ramai hi popeilai,

¹²sübüa neletao nou Ramai teithesü kholai ea süsü panou thala-a vere donou neletao nou soutaosoua telai, daiolouzü sükisü rateitaosü meinou dei-a souhawulai, alia rateihi nataosü meisou nou chahawulai.

¹³Ana Eletaowo Ramai nou apaopei khaitouyu süolouzü: acheche hrümaiye koa hrülaiyu ratei ashu ea deiphao ashu sünaye khoa bue.

¹⁴Südonou, Asakhemai, neletao nou Teithe sünasü khoa buyu hisü, Ramai nghojünou sheetoua ea chaalia ha-a ea puhye koa kaona-a buloure donou soutaosou telo.

¹⁵Eletao Mapaowo nou shamea peiyuhai puhnou neletaoye khailu loure donou teile kao avei peiwe tea cholo. Sübüa Eletao nou leshiyu Eh thaihou jürai Paul nou-a Ramai nou puh hi peikhai touyu ratsü süna thaifüa neletao hi rüpeie.

¹⁶Puhvei seiko pfüphou hisü chipao haitao pao-a, kheihaobüa rüe. Puhvei seikotao hisü süre tateiyu taoli louwe, sütaosü tsühamai ea lichemo maitao nou kukhe sheeyu larübvütao hia souyu kua kao-zü moa paodou peiwe. Südonou puletao nou lah puletao pei hi ha-kare povewe.

¹⁷Ana Asakhemai, neletaowo haisü rai-a süloure. Südonou neletaoye zhai hayu maitao vei kao-zü moyu sünanou süthaipoa talou more donou ea chu neletao vei khailu louyu buh haina hinou kaotalou more donou, neletao leikei-a bulo.

¹⁸Ana Eletao Mapao ea khailu-apeio Jisu Khrista vei zhuvea ea tsü hinou tobai soumoa dushulo. Puh hisü chua, akhainou khaikoute-a adushosü souloutheo! Amen.