Read Poumei Naga 1 JOHAN 4 Bible Online

1 JOHAN 4 - Poumei Naga bible

1 JOHAN 4

¹Leshiyu Asakhemai, rako hrülaiye loucheso, ana rako sütaosü Ramai hinou vevemosa touyu sü zhuloure donou rakotaoye sü zhai zhukhaio. Daiolouzü madayu rachi paolamai alaosou deiphao hi veloure.

²Haibüyu vanou neletao nou Ramai vei Rakoho Rakomoe touyu sü süloulai süolouzü: Jisu Khrista hai vasou hilonou ve-e tea dua paopayu rako hrülaisü Ramai hinou ve-e.

³Ana Jisu vanou haisü dua paopa moyu rako hrülaisü Ramai hinou vemoe. Haisü Khristaye ngaobayu rakobaie, süsü velai tea süna vanou neletao nou chouloure, alia chuwo süsü deiphao hi velouloua bure.

⁴Ana Anah khe maitao, neletaowo Ramai hinou ve-e, alia puletaoye koloure, daiolouzü neletao lekhehi buyu Rako sünanou deiphao hi buyu rako süna jünou dukouhie.

⁵Puletao sü deiphao hinou ve-e, südonou puletao nou deiphao vei vanou chi paowe, alia deiphao mainou puletao chi keiwe daiolouzü puletaosü deiphao hinou ve.

⁶Ana Eletaowo Ramai hinou ve. Ramaiye süyu maitalinou Eh chi keipeiwe, alia Ramai hinou vemoyu maitalinou Eh chi keipei moe. Südonou hai vanou Eletao nou acheche vei Rako ea kao-zümoyu vei rakoye sü sükulouwe.

⁷Leshiyu sakhe maitao, Eletao alinou liye leshilou laikhe, daiolouzü leshi hai Ramai hinou ve. Maiye leshiyu puhsü Ramai hinou naloure ea Ramaiye süwe.

⁸Maiye leshi moyu puhsü Ramaiye sümoe, daiolouzü Ramaiwo leshina baie.

⁹Alia puh vanou Eletao hai hriloure donou Ramai nou puhvei likhuyu Nahpoutuye deiphao hi seikou peiwua, puh leshisü Eletao hi ngaopeiwure.

¹⁰Leshisü haire: haihai Ehnou Ramaiye leshiyu vanou moe, ana puhnou Eletaoye leshi peiyu vanoue ea Eletao mah khailu peiloure bo nasü souloure donou puh Nahpoutuye seive peire.

¹¹Leshiyu sakhemaitao, Ramai nou haibüa Eletaoye leshi louzü, süthaisü Eletao-a alinou liye leshi züe.

¹²Maitalinoua Ramaiye ngaokhai mohie, ana Eletao nou alinou liye leshi louzü, Ramai sü Eletao hi tobai soumoa bue ea puh leshisü Eletao hinou southou lichewure.

¹³Hai vanou Eletao nou süvuzüe süolouzü Eletao sü puh hinou tobai soumoa bue ea puhsü Eletao hinou tobai soumoa bue, daiolouzü puhnou Eletao hi lah puhvei Rakosü peiwure.

¹⁴Alia Eletao nou ngaoloua zhopaoh souwe süolouzü Puo nou puhnah Poutuye deiphao vei khailu-apeio soupeire donou seive.

¹⁵Maitalinou Jisu hai Ramai Nahpoutue tea dua paopa louzü, Ramai nou puh hi tobai soumoa bue, alia puhsü Ramai hi tobai soumoa bue.

¹⁶Südonou Eletao nou Ramai nou Eletaoye donou leshi buyu nasü süwe ea louchewe. Ramai hai leshina baie, alia leshi hinou tobai soumoa buyu puhsü Ramai hinou tobai soumoa bue, alia Ramai sü puh hi tobai soumoa bue.

¹⁷Eletao nou chikuyu Teitheki khuvei loure donou, leshi nasü Eletao hi southou liche peiwure; alia Eletao nou süsü ngaoloulai daiolouzü deiphao hainahi Eletao hrümai hai Khrista vei hrümai bübaie.

¹⁸Leshi hisü piyu hae; liche-a leshiyu sünanou piyu teiteiye sü hulaiwu baiwe. Südonou leshi hai pi-a buyu maitali hisü southou liche loumoe, daiolouzü piyu sü tudee ngaore bue.

¹⁹Eletao nou leshiwe daiolouzü puhnou Eletaoye rai-a leshipeie.

²⁰Maitalinou, “E Ramaiye leshie,” tea paokhai-a, puh thaihou jüraiye ngaora louzü, puhsü madayu maibaie. Daiolouzü puhnou ngaoa buyu puh thaihou jüraiye leshi molouzü, puhnou ngaomoyu Ramaiye leshi louhoe.

²¹Khrista nou Eletao hi peikhai touyu chikha nasü haire; Ramaiye leshiyu maitalinou puh thaihou jüraiye-a leshi vuzülai.