Read Poumei Naga 1 JOHAN 5 Bible Online

1 JOHAN 5 - Poumei Naga bible

1 JOHAN 5

¹Jisu hai Khristae tea loucheyu mai hrülaisü Ramai nah-e, alia puoye leshiyu maitalinou puh nahye-a leshiwe.

²Eletao nou Ramaiye leshiyu ea puh chikhatao züa buyu vanou Eletao nou Eletao hai Ramai nahtaoye leshiwe touyu sü süwe.

³Daiolouzü Eletao nou Ramaiye leshiyu süvei kowo louzü puh chikhatao züyu süsüe. Alia puh chikhataohai Eletaoye donou tatei leyu süna moe,

⁴daiolouzü Ramai hinou nalouyu mai hrülainou deiphaoye koloue. Alia Eletao lü vanou Eletao nou deiphaoye kolouwe.

⁵Deiphaoye thaohnou kolousüe? Jisu hai Ramai Nahpoutue tea loucheyu mai süna likheinou kolousüe.

⁶Jisu Khrista hai puhvei dzükhao dayu dzü ea puh athai vei zhe sünaye koa ve. Puhsü dzü likheiye koa vebai moe, ana dzü ea zhe ahaiye koa ve. Alia lah Rakonou-a haisü chekhaoe tea zhopaoh souwe, daiolouzü Rako hai cheche baie.

⁷Zhopaoh mai asü bue;

⁸Rako, dzü ea zhe sütaoe; alia haitao asünou kheihao-a zhopaoh souwe.

⁹Eletao nou emai vei zhopaohsü louchewe; ana Ramai vei zhopaoh nanou chihkou shohie, alia puhnou zhopaoh hainasü puhnah Poutu vanou peie.

¹⁰Südonou Ramai Nah Poutuye loucheyu mai talisü lah puh lekhehi zhopaoh hainasü bue; ana Ramaiye louche moyu mai talinou puhye sü dayumai soupeire, daiolouzü Ramai nou puhnah Poutuwo vanou paoyu sü puhnou louche peimoe.

¹¹Alia zhopaoh nasü haire: Ramai nou Eletao hi teisa ahri peire, alia ahri hainasü puhnah Poutuwo hinou ve-e.

¹²Nah Poutuye polouyu puh hisü ahri haina bue; Ramainah Poutuye polou moyu maitali hisü ahri hae.

¹³Neletao nou neletao hai teisa ahri bue touyu süloure donou Enou haisü Ramainah Poutu zhih hi louche-a buyu neletao hi rüwe.

¹⁴Eletao sü Ramai nghojünou khuvei-a bue, daiolouzü Eletao nou süvuzüe süolouzü puh leli thaifüa hatali Eletao nou puh hinou kholouzü puhnou Eletaoye keipeie.

¹⁵Eletao nou puh hi khoyutsü hisü puhnou Eletaoye keipeie; alia haisü cheche-e touyu sü Eletao nou sü-a buyu donou, Eletao nou puh hinou khoyu sü puhnou Eletao hi peie touyu süsü-a Eletao nou süwe.

¹⁶Ne thaihou jüraimai alinou thailou veiyu mah moyu mahli soua buyu sü nenou ngaolouzü, nenou Ramai hi veachi paopeilai, alia puhnou puh hi ahrisü peilai. Haisü thailou veiyu mah soumoyu puletaoye donou paobaie. Ana thailou veiyu mah bue, alia süvanou nenou Ramai hi veachi paolai tea Enou paomoe.

¹⁷Soumahyu teitei hai mah-e, ana thailou veiyu mah moyu-a bue.

¹⁸Eletao nou süwe süolouzü Ramai hinou nalouyu maitalinou mah soua bumoe; daiolouzü Ramai Nah Poutuwo nou puhye sü khotoupeia bue, alia ashi nanou puhye sü soushi louhoe.

¹⁹Eletao hai Ramai veie touyu sü Ehnou süwe, alia deiphao teiteiwo Ashinavei khakhe hinou bue.

²⁰Eletao nou süwe süolouzü Ramai Nah Poutusü velou loure ea Eletao nou checheyu Ramaiye sü süloure donou Eletao hi süloure tsü nasü peiwure. Alia Eletao sü checheyu Ramai puhye koa buloure, süolouzü Puhnah Poutu Jisu Khristaye koa alisoua buloure. Puhsü checheyu Ramai ea teisa ahri nasüe.

²¹Leshiyu Anah khe maitao, neletao lahnou bashara hinou tarei talo!