Read Poumei Naga CHIKUAPEI MAITAO 1 Bible Online

CHIKUAPEI MAITAO 1 - Poumei Naga bible

CHIKUAPEI MAITAO 1

¹Joshua thaitayu thai, Israel mainou Ramai hi noue, “Thao vei khü nou Kanaan maiye reih soulou railaige?”

²MAPAO nou chila peie, “Judah khü nou railai. Enou puletao bah hi teidei nasü thoupeiwure.”

³Judah maitao nou Simeon khü hisü paoe, “Eye donou depei khaitouyu teidei nasü poloure donou koa Kanaan maiye reih soupeio, sütoulouzü Etao-a neye koa sa-a nou reih soukha peilai.” Südonou Simeon maitao nou sa-a tapeie.

⁴Süthaisü Judah mainou reih soutae. MAPAO nou Kanaan mai ae Periz maiye puletao bah hi thoupeie; alia puletao nou homaitaoye mai thekirou hai Bezek hinou southaloue.

⁵Puletao nou Adonibezek pei hi Bezek hinou reih soue, alia Kanaan mai ae Periz mai hinou reih veiloue.

⁶Adonibezek hai buh sühinou tutare, ana puletao nou puhye thaingouho nüloure alia puh bahke ae phiteutu sü daode peie.

⁷Adonibezek nou paoe, “Enou vemai mai rainai ye puletao vei bahkrü ae phikrü daode peie, Enou souyu büa chuo Ramai nou ahia soupeire.” Puhye sü Jerusalem hi savere alia sühinou puhsü thaire.

⁸Judah mainou Jerusalem pei hi reih hulou poloure. Puletao nou sühi hrüa buyu maiye sü southawure alia nuh nasü mei deiwure.

⁹Süthaisü Judah mainou deichi hi buyu, Negeb nuhtao hinou buyu ae deina hinou hrüyu Kanaan maitao hisü reih soutare.

¹⁰Puletao nou Hebron nuhdu (Hebron zhih hai arai hiolouzü Kiriath-arba tiwe) hinou hrüyu Kanaan mai hisü reih soupoa koure, alia puletao nou Sheshai, Ahiman ae Talmai touyu maitya haitao hinou reih veiloue.

¹¹Sühi sünou Judah mainou Debir nuhdu hi reih souloue. Debir zhih hai arai hiolouzü Kiriath-sepher touwe.

¹²Kaleb tea kuyu mai alinou haibüa paoe, “Kiriath-sepher nuhdu hi reih souloua veilouyu mai naye sü Enou anah naotupai Aksah ye pei nalai.”

¹³Kaleb thaihou Kenaz nahpoutu Othniel nou nuhdu nasü poloure, südonou puh nahpai Aksah ye sü puhye panou naloure.

¹⁴Honapai nou puh ki veyu phaki, puh puo hinou dou ali kholo tea lere; ae honapai nou rheisüh phao hinou taokouyu phaki puh puo Kaleb nou noure, “Ne daili jüpawe?”

¹⁵Honapai nou chila peie, “Eye hali peio; nenou Eye dei peiyu nasü dzü hae, südonou dzüla noupu loua nou Eye peio.” Südonou Kaleb nou honapaiye reilova nou payu ae khelo vanou payu dzüla ahai kheinou peiwure.

¹⁶Moses paoh (puh chapfü puo) vei tyaonah maitao, Ken maitao hai-a Judah maitao koa Jeriko nuhdu, süolouzü hasüübe nuhdu hinou Arad nghia buyu Negeb hisü Judah maiye sa-a koa hrüre donou tare. Puletao hai sühinou Amalek maiye koa bure.

¹⁷Judah mainou puletao thaihou Simeon maiye koa satae, alia puletao nou Zephath hinou hrüyu Kanaan maiye reih soua veiloue, ae nuhdu sünasü sousasawua chaa peiwure, alia nuhdu süna zhihsü Hormah tea sapeie.

¹⁸Judah mainou Gaza teidei, Ashkelon teidei ae Ekron teidei taosü reih soua poloure.

¹⁹MAPAO nou Judah maiye soukha peia panou puletaoye deichi hinou buyu nuhdutao sü poloue, ana deikho hinou buyu maitaoye sü hulailou more, daiolouzü puletao hisü hunou souyu rheiluki khesü buloure.

²⁰Moses nou kharochi peiyu thaifüa Hebron sü Kaleb hi peie; alia puhnou Anak nahpoutu asü vei buh taosü hulailoue.

²¹Ana Benjamin maitao nou Jerusalem hinou hrüyu Jebus maiye hulai loumore. Südonou Jebus mainou chukoute Jerusalem hisü Benjamin maiye koa hrüa bue.

²²Ephraim ae Manasseh khü ahai nou Bethel mai pei hi reih soue, alia MAPAO nou soukha peia puletao nou reih veiloue.

²³Ephraim ae Manasseh mainou Bethel (arai hai Luz tea kue) hisü reikeih pomai seitae.

²⁴Reikeih pomai nou nuhdu hinou mai ali tapa-a ngaoe, alia puletao nou honapu hisü paoe, “Zhuvea Etaoye nuhdu hi talouyu ludu ngaopeio, sükulouzü Etao nou neye vupa peilai.”

²⁵Mai honapu nou puletaoye nuhdu hi louyu ludu sü ngaopeie, südonou puletao nou nuhdu hi hrüyu mai hrülaiye sü southa khaire, ana puletao nou mai honapu ae puh vei kihikha maiye southa moa phapeie.

²⁶Mai honapu nou Hitmai teidei hi tare ae sühinou nuhdu ali soushuloue, ae süna zhih sü Luz tea saloue; sübüa chukoute nuhdu süna zhih sü süwe.

²⁷Manasseh mainou Beth-shan, Taanak, Dor, Iblean, Medigo alia süpehao hi buyu nuhdutao hai hulai loumoe, südonou Kanaan mainou nuhdu sütao hisü koa hrüa buhie.

²⁸Israel mainou dusho palouyu phaki puletao nou Kanaan maiye saloua panou kilai soue, ana puletao ye sü hulai loumoe.

²⁹Ephraim mainou Gezer nuhdu hinou hrüyu Kanaan maiye hulai loumoe, südonou Kanaan mainou puletaoye koa sühinou hrüe.

³⁰Zebulun mainou Kitron ae Nahalol nuhdu hinou hrüyu Kanaan maiye hulai loumoe, südonou Kanaan mainou puletaoye koa hrüe, ae puletao kilai panou soua bue.

³¹Asher mainou Akko, Sidon, Ahlab, Akzib, Helbah, Aphik alia Rehob nuhdutao hinou hrüa buyu maitaoye hulai loumoe.

³²Ana Asher mainou Kanaan maiye koa nuhdu sütao hinou hrüa bue, daiolouzü puletao nou homaitaoye hulai loumoe.

³³Naphtali khünou Beth-shemesh ae Bethanath nuhdu ahai hi hrüyu maiye hulai loumoe, ana puletao nou Kanaan maiye koa hrüe ae puletaoye panou puletao kuvah soua hrüe.

³⁴Amor mainou Dan maitaoye sü panou deikho hi buba-a deichi hi hupa-a baire.

³⁵Amor mainou Har-heres, Aijalon ae Shaalbim nuhdutao hinou hrüa bue, ana Ephraim ae Manasseh khü nou puletao jünou veiloua puletaoye panou puletao kilai soua hrüe.

³⁶Amor mai deirai hai Akrabim phihinou Sela peilova khete-e.