Read Poumei Naga CHIKUAPEI MAITAO 10 Bible Online

CHIKUAPEI MAITAO 10 - Poumei Naga bible

CHIKUAPEI MAITAO 10

¹Abimelek thaitayu thai, Dodo tyao, Puah nahpoutu Tola nou Israel maiye vupa peire donou ve-e. Puh hai Issakar mai khüe alia Ephraim maivei deichi hi Shamir tea kuyu nuh hinou puhnou hrüe.

²Puhnou Israel maiye khosa-a po kaisü hrüe. Süthaisü puh thaitare alia puhye Shamir nuh hinou vuh peie.

³Tola thaiyu thai, Gilead hinou Jair tea kuyu maipou nanou Israel maiye po kaihai khosa-a chiku peie.

⁴Puh hai nahpoutu shirou bue, alia rheisüh-a shirou bue. Gilead hi puletao vei nuhdu-a shirou bue, ae sütaosü chukoute Jair vei nuhtao tea kuwe.

⁵Süthaisü puh hai thaitare alia puhvei thaiphao sü Kamon hinou poa vuh peie.

⁶Israel mainou MAPAO nghoujü hinou vah ashi sü soupu takhaire, alia Sairia, Sidon, Moab, Ammon ae Philitin maivei rah Baal ae Ashtaroth ye thotare, alia puletao nou MAPAO ye sü thaowure ae Puhye tho more.

⁷Israel mai hisü MAPAO vei lekha rarou sü vere, alia puhnou puletaoye Philistin ae Ammon mai bah hi zhothou peiwure.

⁸Po kiacha lihai puletao nou Jordan rei tachopa buyu Amor mai dei, süolouzü Gilead tea kuyu teidei hi hrüa buyu Israel maiye souvea taideisa-a hrüe.

⁹Amor mainou Jordan rei tachopa Judah, Benjamin ae Ephraim khütao pei hisü reihsoua Israel maiye souvea shopeie.

¹⁰Süthaisü Israel mainou MAPAO hi kra-a paoe, “Etao hai ne nghoujü hinou mahwure, daiolouzü Eh nou Etao Ramai ye thaowure, alia Baal rahye sü thotare.”

¹¹MAPAO nou Israel mai hi paoe, “Enou neletao ye Ejipt mai, Amor mai, Ammon mai ae Philistin mai bah hinou vupa peimowu?

¹²Sidon mai, Amalek mai, ae Maon mai nou neletaoye souchoroyu phaki, neletao nou ahinou soukha khoa Enou neletaoye puletao bah hinou khailupa peie.

¹³Ana neletao nou Eye thaowua rah kukheye thotare; südonou E chuo neletao ye vupa peipu khailai more.

¹⁴Neletao nou tho-a buyu rahtao hinou soukha kholo ae neletao nou veayu phaki puletaoye panou soukha peio.”

¹⁵Ana Israel mainou MAPAO hisü paoe, “Eh nou mah sü souwure; nenou Etao pei hi sounü nasü soulo, ana zhouvu louzü Etaoye khailupa peio.”

¹⁶Südonou puletao nou puletao hrohinou buyu rah khesü thaowure ae MAPAO ye thotare; Israel mainou veayu sü ngaoloua Ramai-a zhuvea shore.

¹⁷Süthaisü Ammon mainou reih soure donou Gilead hi velou buloure, alia Israel mai-a velou Mizpah hinou fühao souloua bure.

¹⁸Israel maiye süthai sa-a laiyu maitao sü alinou alihi paoe, “Ammon maiye reih soure hisü thaonou süthai peilai? Reih haina süthai sa-a soupeiyu mai naye sü panou Etao hrülai pei hi khasa-a hrülai.”