Read Poumei Naga CHIKUAPEI MAITAO 11 Bible Online

CHIKUAPEI MAITAO 11 - Poumei Naga bible

CHIKUAPEI MAITAO 11

¹Jephthah hai Gilead hinou hrüyu, soureih souvei shoyu mailie. Puh hai khakhapfü ali nah baie. Puh puo zhih sü Gilead toue.

²Gilead vei chapfü nou puhye nahpoutu kukhe-a hrüpeie, alia puletao nou dupayu phaki Jephthah hisü haibüa paoloua hutawure, “Neye panou Etao puo vei kaa ali-a ngaolai moe, daiolouzü ne hai naotumai kukhe ali nah baie.”

³Süthaisü Jephthah hai puh thaihou-jürai maitao hinou tutare, alia tuve Tob tea kuyu teidei hinou hrüe. Buh sühinou puhnou haodou loumoyu ae hrü veimoyu maitaoli saloua panou puh thaifüe.

⁴Phajütou thaisü Ammon mainou Israel maiye reih soutare.

⁵Ammon mainou Israel maiye reih soutayu phaki, Gilead hi tsümaitao nou Tob teidei hi ve Jephthahye sadakhai loure donou tare.

⁶Puletao nou Jephthah hi ve paoe, “Tave Etaoye süthai peio, sükulouzü Etao nou Ammon maiye reih soulou süe.”

⁷Ana Jephthah nou Gilead hinou veyu tsümaitao hisü paoe, “Neletao nou Eye ngaora shoa panou apuo ki hi bumoa hulaimowu? Daisounou chuo neletao veayu thainou ahi vewe?”

⁸Puletao nou Jephthah hi paoe, “Etao nou ne hi veyu hai neye panou Gilead hinou hrüyu Etaoye khore donou ae Ammon maiye soureih soure donoue.”

⁹Jephthah nou Gilead tsümaitao hisü paoe, “Neletao nou Eye ki hi sa-a dakhai ve Ammon maiye reih soua MAPAO nou Eye reih veilouyu peilouzü, Enou neletao pei hi khowo soulai.”

¹⁰Puletao nou Jephthah hisü chila peie, “MAPAO nou Etao ko hisü shakie, nenou paoyu sü Etao-a aetouwe.”

¹¹Südonou Jephthah nou Gilead hinou veyu tsümaitao ye koa tare, alia maikhe mainou puhye panou peikhowo ae süthai-apeio soure, alia puhnou Mizpah hinou MAPAO nghoujü nou puhvei chipao sü paopa peie

¹²Süthaisü Jephthah nou Ammon maivei veo hisü haibüa chi paotae, “Etao pei hi ne daie vamoyu buge? Daisounou ne Etao teidei hi reih soulouwe?”

¹³Ammon hi veo nou Jephthah vei chila haibüa peie, “Israel mainou Ejipt hinou khaiveyu phaki, puletao nou avei teidei Arnon rei hinou Jabbok rei koute ae Jordan rei loua nou poloure. Süsü chuo kaona-a nou Ehye khaipeio.”

¹⁴Jephthah nou ko pomaiye Ammon veo hisü seita dakhaie,

¹⁵alia puh hi Jephthah nou haibüa paotae, “Israel mainou Moab maivei teidei moa Ammon maivei teidei shaolou moe.

¹⁶Israel mainou kabüa tapae toulouzü - Israel mainou Ejipt teidei thaokhaiwua tapayu phaki, Israel mainou rekou nou tapoa radeiki ae Hoyu Zai tachokou Kadesh hi veloue.

¹⁷Süthaisü Israel mainou Edom veo hi ko pomaiye haibüa paoseitae, ‘Ehye panou zhuvea nevei teidei sü tacholo.’ Ana Edom veo nou aetou peimore. Süthaisü Israel mainou Moab maivei veo hi panou puletao vei teidei tacholou veishiyu noue, ana puhnou bare. Südonou Israel mai hai Kadesh hinou chaore.

¹⁸Süthaisü Israel mainou radeiki hinou tapoa Edom ae Moab maivei teidei tasühao-a Moab maivei teidei teinghi palova veloua Arnon rei alilo vathai nou sahpao haoloua bure, ana Israel mainou Moab maivei teidei hi talou moe, daiolouzü Arnon hai Moab maivei deirai-e.

¹⁹Israel mainou Heshbon hinou buyu Amor maivei veo Sihon hi haibüa ko pomaiye paosei tae, ‘Zhuvea nou Ehye panou neletao vei teidei tachopoa Etao vei teidei hi loulo.’

²⁰Ana Israel maiye panou puletao vei teidei tachore sü Sihon veo nou puhvei reihmai teiteiye save jüloua Jahaz hinou fühao souloua Israel maiye reih soure.

²¹Ana Israel maivei Ramai MAPAO nou Sihon veo ae puhvei mai hrülaiye sü Israel mai bah hi thaothou peiwua panou Israel maiye teidei sühi buyu Amor maivei teidei teitei sü poloue.

²²Israel mainou Amor maivei teidei polouyu hai reilo Arnon hinou khelokou Jabbok ae teinghi palo buyu radeiki hinou teinghi loulo Jordan rei koute-e.

²³Israel maivei Ramai MAPAO nou Israel maiye donou Amor maiye sü hulai peie.

²⁴Süsü nenou podakhai loulai tea chowu? Neletao rah Kemos nou neletaoye peiyu taosü neletao la pokhai louwo, ana Etao Ramai MAPAO nou peikhai touyu teitei sü Etao vei soua poloulai.

²⁵Ne Moab hi veo Zippor nahpoutu Balak jünou veipuhio? Puhnou Israel maiye züveiwu moa soureih souwu?

²⁶Po kaihsü (300) lihai Israel mainou Heshbon, Aroer, ae süpehao hi buyu nuhdutao, alia Arnon reipe hi buyu nuhdu teitei hinou hrüa bue. Daisounou ne süphaki nou podakhai loumoe?

²⁷Eh nou ne hi halia soumah moe, ana nenou Eh pei hi reih souyu hai mah-e. Chiku-apeio MAPAO panou zhou teithe Israel mai ae Ammon mai ko hisü chiku peio.”

²⁸Ana Ammon mai veo nou Jephthah vei ko pomaiye sü ngaophou peimore.

²⁹Süthaisü MAPAO vei rako nou Jephthah hisü velou loure, alia puhnou Gilead ae Manasseh tachopoa Gilead hi buyu Mizpah nuh hisü vere, alia Gilead hinou buyu Mizpah hinou tapoa ve Ammon maivei teidei hisü ve-e.

³⁰Jephthah nou MAPAO hi haibüa chachao soue - “MAPAOwo Eye panou Ammon mai jünou reih veilouyu peilouzü,

³¹Ammon mai hinou reih veiloua khaiveyu phaki, akikha hinou tapa Eye daorai kayu nasü neye poa sheela peilai, alia puhye sü Enou meidei-a neye sheela peilai.”

³²Südonou Jephthah nou Ammon maiye reih soure donou rei sü tachopa loure, alia MAPAO nou puhye reih veilouyu peie.

³³Puhnou Aroer hinou poa Minnith nghiyu teitei, süsü nuhdu kaili, alia Abel Keramin koute hai reih soua mai southasho peie, sübüa Israel mainou Ammon mai jünou reih veiloue.

³⁴Jephthah nou puh ki Mizpah hi dakhai veyu phaki, puh nah naotupai nou dosoupoa ae khubvü dapoa puhye daore donou laire, honapai hai puhnah naotu likhu baie.

³⁵Puhnou honapaiye ngaolou khaie puhvei sabanü sü paipha-a paoe, “Oh anah paire! Nenou ale sü souphewure! Daiolouzü Enou MAPAO hisü chaachou souwure, alia süsü chuo souda khailou hore.”

³⁶Honapai nou puo hisü paoe, “Apuo, nenou MAPAO hi chaachou soukhai toulouzü, nenou soukhai touyu nasü soulo, daiolouzü neye ngaobayu Ammon mai jünou veilouyu hai MAPAO nou peiwure.”

³⁷Ana honapai nou puh puo hisü noue, “Apuo Eye panou hali soulo, sülouzü khouh ahai lihai Eye panou samaiye saloua deichi hinou pa loumainah ali soua thaire vei dongai sü soulo.”

³⁸Puo nou paoe, “Tawo.” Honapaiye sü khouh ahai donou seitawure, alia honapai nou samaiye saloua deichi hinou loumainah ali soua thaire vei dongai pfüe.

³⁹Khouh ahai cheyu thaisü, honapai nou puo hisü dakhai vere. Ae puo nou chaachou soukhai touyu thaifüa soure. Honapai hai loumainah ali soua shanghi soulou moa thaire. Haihai Israel maivei zhai soua

⁴⁰po ali hi teithe adai hai Gilead puona Jephthah nah naotupaiye licho loure donou po pachü Israel maipfü loumainah nou souwe.