Read Poumei Naga CHIKUAPEI MAITAO 12 Bible Online

CHIKUAPEI MAITAO 12 - Poumei Naga bible

CHIKUAPEI MAITAO 12

¹Ephraim mainou soureih soumaiye kuve jüloua reih soure donou puletao hai Jordan rei kacholoua Zaphon talakou Jephthah hi paoe, “Daisounou neletao Eh teidei kachopoa kou Ammon maiye soureih souyu hie Ehye kumoge? Neletao ki sü Ehnou mei dei peilai!”

²Jephthah nou puletao hisü paoe, “E ae amaitao nou Ammon maiye sü züva loure. Enou neletaoye kuyu phaki, neletao nou Ehye puletao bah hinou vupa peimode.

³Neletao nou Etaoye soukha laimoyu sü ngaolou khaie, E thaiyuma thailai tea tachokou Ammon maiye reih soue, ae MAPAO nou puletaoye sü abah hi thoupeie. Chuo daisounou neletao Eye soureih soulai touwe?”

⁴Süthaisü Jephthah nou Gilead mai hrülaiye save jüloua Ephraim maiye reih soue. Gilead mai jünou reih veiloure. (Ephraim mainou haibüa paoe, “Ephraim ae Manasseh hi Gilead mai, neletao hai Ephraim thaokhaiwua tutayu mai baie.”)

⁵Ephraim mainou kacholou süyu Jordan rei buh teitei hisü Gilead mainou daloude. Tutayu Ephraim mainou “Eye panou rei kacholo” tea khoyu phaki, Gilead mainou puh hisü haibüa nouwe, “Ne Ephraim maiwu?” Puhnou “E Ephraim mai moe” tea paoyu phaki,

⁶Puletao nou puh hisü haibüa paoe, “Sütoulouzü Shibboleth tea paokhaio.” Ana puhnou “Sibboleth” tea paoa baiwe, daiolouzü puletao nou sünasü satou lousü moe. Sübüa nou puletao nou puhye nüloua Jordan rei kacho laiyu hinou southa baiwe. Sübüa puletao nou Ephraim maiye mai theraidaihai (42,000) southaloue.

⁷Jephthah nou Israel maiye po arou khosa-a chiku peie. Süthaisü Gilead puona Jephthah sü thaire, alia puhye sü Gilead nuhdu hinou poa vuh peie.

⁸Puh thaiyu thai, Bethlehem hinou Ebzan tea kuyu mai nanou Israel maiye khosa-a chiku peie.

⁹Puh hai nahpoutu shirou ae naotumai shirou bue. Puhvei nahnaotu khesü puh khü moyu vakou maiki khaipeie, alia vakou nou loumainah shirou sü puh nahpoutu maitao panou naloue. Puhnou Israel maiye khoyu hai po anai-e.

¹⁰Süthaisü Ibzan thaitare alia puhye Bethlehem hinou vuh peie.

¹¹Puh thaiyu thai Zebun hinou hrüyu Elon nou po kirou hai Israel mai peikhoa chiku peie.

¹²Süthaisü puh sü thaire, alia puhye Aijalon hinou vuh peie.

¹³Elon thaiyu thai, Pirathon puona Hillel nahpoutu Abdon nou Israel maiye khosa-a chiku peie.

¹⁴Puh hai nahpoutu raidai bue ae tyaomai shirou bue. Puhnou Israel maiye po acha khosa-a chiku peie.

¹⁵Süthaisü puh sü thaitare, alia puh thaiphao sü Amalek maivei deichi, Ephraim mai teidei Pirathon touyu hinou poa vuh peie.