Read Poumei Naga CHIKUAPEI MAITAO 13 Bible Online

CHIKUAPEI MAITAO 13 - Poumei Naga bible

CHIKUAPEI MAITAO 13

¹Israel mainou MAPAO nghoujü nou vah ashi sü soupu takhaire, südonou MAPAO nou puletaoye sü Philistin mai bah hinou po raidai panou hrüe.

²Zorah teidei hinou hrüyu Dan maipuoli Manoah tea bue. Puh chapfü hai nahapfü ali soua nahmai ali-a hrüpei moe.

³MAPAO vei rakivamai ali nou naotupai hisü ve zhungaoloua paoe, “Zhukhaio, ne nahapfü ali soua nahmai hae, ana chuo ne nahmai hrüloulai, alia nahpoutu ali naloulai.

⁴Südonou chuo ne soutaosou reihlo, zhaoh solai moe ae sheemoyu touso toulai moe.

⁵Nenou nahtou nasü nalouyu thai, puh pei bikhai toulai moe, daiolouzü nahpoutu naye nalouyu teithe hinou Ramai bah hi thaothoua panou Nazir mai ali soutalai; alia puhnou Israel maiye Philistin mai bah hinou khailupa peilai.”

⁶Süthaisü naotupai nou taho puh cha hisü paoe, “Ramai vei mai ali ahi ve-e, puh zhu hai rakivamai büa ngaopi shoe. Puh daiki nou vewe touyu Enou noulou more, alia puh zhih-a ahi paopei moe.

⁷Ana puhnou ahi paoe, ‘Zhukhaio, ne nahmai hrüloulai, alia nahpoutu ali naloulai. Südonou ne soutaosou reihlo, zhaoh solai moe, ae sheemoyu touso toulai moe, daiolouzü nahtouye nalouyu teithe hinou Ramai bah hi thaothoua panou Nazir mai ali soutalai.’ ”

⁸Süthaisü Manoah nou MAPAO hi veachi paoe, “Oh MAPAO, E ne hi veachi paoe, nenou achapfü hi seiveyu mai nasü seivepu peiraio, panou kabüa nalaiyu nahtou nasü kiko loulai touyu sü paodoupu peilaio.”

⁹Ramai nou Manoah nou khoyu paisü noupeie, ae rakivamai nasü naotupai nou dou hinou chaobu phakinou vepue, ana honapai cha Manoah sü honapaiye koa bumoe.

¹⁰Südonou honapai nou tuve puh cha hisü paoe, “Raiki ahi veyu mai nasü chua vepu khaire.”

¹¹Manoah nou kushuloua puh chapfü thaifü tare, alia veyu mai nahi sü paoe, “Naotupaiye chayu nasü newu?” Puhnou chila peie, “Oungai, Enou-e.”

¹²Süthaisü Manoah nou paoe, “Ne chipao thaifüa nahtou nalouzü, nahtou nasü kabüa panou hrülai, ae puhnou daisoulai?”

¹³MAPAO vei rakivamai nanou Manoah hi paoe, “Enou ne chapfü hi paopei khaitouyu teitei sü panou soutaosou soutoulo.

¹⁴Honapai panou darkhabe hinou payu hataralia panou touso, moa honapaiye panou zhaoh shoso, sheemoyu touso toulai moe, alia Enou honapai hi paopeiyu teitei sü panou soulo.”

¹⁵Manoah nou MAPAO vei rakivamai na hisü paoe, “Zhuvea tapei souraio, Enou neye donou nghitu ali dathaloua khopeilai.”

¹⁶MAPAO vei rakivamai nanou paoe, “Nenou Eye nuchao khaitouyuma Enou nevei touso sü toulai moe. Ana nenou soupeilai toulouzü, süsü mei deiloua MAPAO ye posheela peio.” (Manoah nou puh hai MAPAO vei rakivamai-e touyu sülou moe.)

¹⁷Manoah nou MAPAO vei rakivamai na hi paoe, “Ne zhih thaotouwe? Nenou paokhai touyu navei chipao taosü vete loure toulouzü, Enou neye tsükhou loure donou ne zhih paopeio.”

¹⁸MAPAO vei rakivamai nanou paoe, “Ne daisounou azhih sü nouwe? Azhih sü khupayu zhih-e.”

¹⁹Südonou Manoah nou nghitu ae thou daotou poloua khupa souyu MAPAO ye chuh nou soukhai touyu sheelabu hinou posheela peiwure.

²⁰Sheelabu hinou meikhao sü raki hi khaokheyu phaki, MAPAO vei rakivamai nasü Manoah ae puh chapfü nou zhua bukinou meikhao hisü louloua raki hi khetare; ae puhai nou deiphi pei pfüa nakou khurüe.

²¹MAPAO vei rakivamai nanou Manoah ae puh chapfü hisü vepu more. Süthai nou Manoah nou puh hai MAPAO vei rakivamai-e touyu süloue.

²²Manoah nou puh chapfü hisü paoe, “Ahai thaivuzü baishulai, daiolouzü ahai nou Ramai ye ngaowure.”

²³Ana puh chapfü nou puh hi paoe, “MAPAO nou ahaiye southalai toulouzü, puhnou ahai vei posheelayu nasü popei laimoe, moa haibüa ahai hi paoyu chi khesü paolai moe.”

²⁴Naotupai nou nahpoutu ali naloure, alia puh zhih sü Samson tea saloure; ae nahtou nasü vipa loure, alia MAPAO nou shiha peie.

²⁵Puhnou Zorah ae Eshtaol kohi buyu Mahanehdan nuh hinou buyu kinou MAPAO vei rako nou puhye sü soukhou peitare.