Read Poumei Naga CHIKUAPEI MAITAO 15 Bible Online

CHIKUAPEI MAITAO 15 - Poumei Naga bible

CHIKUAPEI MAITAO 15

¹Phajütou thai, southou vayu teile phaki, Samson nou puh chapfü hi holai tea nghitu ali nüpoa tae, ae puhnou puh paoh hi ve paoe, “Eye panou achapfü kide hisü louwo.” Ana honapai puo nou puhye sü panou loubare.

²Honapai puo nou puh hisü paoe, “Ne honapaiye jüpa moyu phare tea Enou choloua puhye sü ne samai hi peiwure. Honapai jünou puh thaihou napai-a hüveipu hie, südonou honapai nou naloua baio.”

³Samson nou puletao hi paoe, “Zhouvuo Enou Philistin mai hi vah ashi souyuma amah hadao!”

⁴Südonou Samson nou taho lakhao kaihsü nüloure alia lakhao ahaihai nou mi sü soucholoua sühi mei taoloua khaipeire.

⁵Mei saoloua khaitouyu lakhaotaoye sü puhnou Philistin maivei dou hi phapeia panou vajü khaitouyu routhou ae dou hinou valou moa buyu routhou alia oliv kipei ae darkha peida teitei sü deiwure.

⁶Süthaisü Philistin mainou “Thaonou haibüa souwe” tea noutare. Puletao nou haisü Samson nou souwe, daivanou toulouzü puh paoh nou puh chapfüye puh samai ali hi peiyu vanou-e tea süloure. Südonou Philistin mainou tave honapai ae honapai puo ki noupu koa mei nou deithawure.

⁷Samson nou puletao hi paoe, “Neletao nou haibüa soulai toulouzü, E neletao hisü khüphou vuzülai, khü phouloumo koute E baikhai toulai moe.”

⁸Puhnou rarou sholoua maitaoli southawure. Süthaisü puhnou taho Etam teidei hinou lyaqulu ali hi butare.

⁹Süthaisü Philistin mainou Judah teidei hinou fühao souloua buloure, alia Lehi nuhdu hisü reih souloue.

¹⁰Judah mainou puletao hisü noue, “Neletao daisounou Eh pei hi reih hulouwe?” Puletao nou chila peie, “Etao Samsonye nüloulai tea reih hulouwe, puhnou Etao hi soupeiyu büa Etao-a puhye soupeilai.”

¹¹Südonou Judah hi mai thesü nou taho Etam hi Samson nou buyu lyaqulu na hisü veloua puh hi paoe, “Philistin mainou Ehye tukhasa-a bue touyu ne sümovu? Ne daisounou haibüa vah souwe?” Puhnou puletao hisü paoe, “Puletao nou ahi soupeiyu büa E-a puletao hi soupeia baie.”

¹²Puletao nou puh hi paoe, “Etao neye rainou phuloua Philistin mai hi peire donou vewe.” Samson nou puletao hi paoe, “Neletao lah Eye southalai moe touyu ahi paohpeio.”

¹³Puletao nou puh hi paoe, “Nenou paoyu sü aetoue, Etao neye rainou phuloua puletao bah hi thoupeia bailai, Etao neye southalai moe.” Südonou puletao nou rai ashu ahai nou puhye phuloua lyaqulu hinou sapa loure.

¹⁴Puhye sa-a Lehi nuhdu hi kouyu phaki Philistin mainou shusoua puh hi tukoue. Süpha teilebü hinou MAPAO vei rako nou puh hi louloua puhye phukhai touyu rai sü meidei khaitouyu rai büa puhnou tyade paloure.

¹⁵Süthaisü puhnou rheisüh khourao ali poloua sünanou mai theli dathaloue.

¹⁶Südonou Samson nou haibüa lousoue, “Rheisüh khourao ali nou poa Enou mai theli southaloue; Rheisüh khourao ali nou poa Enou puletaoye dathathou khotao khaipeie.”

¹⁷Puhnou haibüa paocheyu thai, rheisüh khourao nasü khilaiwure. Füdei sünasü Ramath Lehi tea sapeie.

¹⁸Süthaisü Samson hai reisho loure, südonou puhnou MAPAO hi paoe, “Nenou haibüa ne kilai Eye veilouyu peie; ana chuo Eye panou haibüa reithawu laiwu, ae sheemoyu Philistin maiye panou nüloua bailaiwu?”

¹⁹Süthaisü Ramai nou Lehi deithou ali hinou dzü sü panou küpa peie. Samson nou dzü sü ke louyu thai puh khouko sü ngaopu loue. Südonou dzüla süna zhih sü En-hakkore tea sapeie. Haihai chukoute-a Lehi hi bue.

²⁰Philistin mainou Israel maiye khasa-a hrüyu teile phaki, Samson nou Israel maiye po kai hai khosa-a hrüpeie.