Read Poumei Naga CHIKUAPEI MAITAO 16 Bible Online

CHIKUAPEI MAITAO 16 - Poumei Naga bible

CHIKUAPEI MAITAO 16

¹Teithe ali Samson nou Philistin maivei Gaza nuhdu hisü tae, alia puhnou nuhdu sühinou khakhapfü ali daoloua honapai hisü puhnou talou züe.

²Gaza hi mainou “Samson veshe” touyu ko süloukhaie, puletao nou sühaoloua kheimathe zhimoa puhye robomü hinou daloure, alia haibüa puletao nou cho-e, “Etao zhou khei puhye kholoua dosho shona teithe payu phaki, puhye nüloua southawulai.”

³Ana Samson nou buh sühi khei touchü koute züa baie, khei touchü hinou puhsü kushu tare. Puhnou robomü khuyu kikhu ae süvei deka teitei noupu puh phao hinou poloua Hebron palova buyu deichi ali hi popa khaiwure.

⁴Phajütou thai, Samson nou Delilah teanou kuyu Sorek Deikho hinou hrüyu loumainah aliye jüpa loure.

⁵Philistin hi veo mai angou nou tave honapai hisü paoe, “Samson ye seijülo, alia puhvei khouko sü daikinou bue, ae kabüa Etao nou puh jünou veiloua puhye rainou phuloulai touyu sü noulo. Sükulouzü Etao mai alili nou neye shahu thelia kaihli (1100) peilai.”

⁶Südonou Delilah nou Samson hi paoe, “Nenou khoushoyu sü daivanou-e, alia neye kabüa mainou nüloua rai phuloure toulouzü nevei khouko ha bailai touyu sü zhuvea ahi-a paokhaio.”

⁷Samson nou honapai hisü paoe, “Mai tarali noua Eye kimoyu lourai anai nou phuloure toulouzü, Esü mai kukhemai ali büa avei khouko ha-a bailai.”

⁸Süthaisü Philistin hi veo maitao nou Delilah hisü kimoyu lourai anai pove peie, alia honapai nou süsü poloua Samsonye phuloure.

⁹Honapai nou mai taoli kikha ali hinou poku khaitoua bue, ae honapai nou Samson hisü paoe, “Samson! Philistin mainou neye nülai tea vere.” Ana puhnou lourai taosü meidei khaitouyu phapo ali büa tyade loure. Südonou puletao nou puhvei khouko sü daikinou bue touyu sülou more.

¹⁰Delilah nou Samson hi paoe, “Ne ahi checheyu chi paomoa Eye labaie. Kabüa neye mainou rai phuloulai touyu zhuvea ahi-a paokhaio.”

¹¹Samson nou honapai hisü paoe, “Mainou Eye khikhai moyu sheetouyu rai nou phuloure toulouzü avei khouko ha-a bailai.”

¹²Südonou Delilah nou puhye rai nou phuwua puh hi paoe, “Samson! Philistin mainou neye nülai tea vere!” Kide kukheli hinou puhye mainou da-a bue, ana puhye rai nou phukhai toua buyu sü phapo touli pfüdeyu büa pfüde paloure.

¹³Süthaisü Delilah nou Samson hi paoe, “Ne chukoute-a ahi checheyu paomoa Eye la-a baie. Mainou kabüa neye nülousüe touyu sü zhevea ahi paokhaio.” Samson nou honapai hisü paoe, “Nenou apeishu boulei anai soua phukhai touyu taosü khipaloua sah daoyu süü hi phumu louzü Esü kukhemai ali büa avei khouko habailai.”

¹⁴Südonou Samson nou zhi-a bukinou Delilah nou puh peishu boulei anai taosü khipaloua sah daoyu süü hi khikhaiwure, alia puh hi paoe, “Samson! Philistin mai vere!” Ana puhnou kaishuloua puh peishu khipa khaitouyu ae sah daoyu süü teitei noupu pfüloua tare.

¹⁵Süthaisü honapai nou Samson hi paoe, “Ne le sü ahinou hoshoa bulikhu, kabüa nenou ‘E neye leshiwe’ tea paoloue? Bakha asü nenou Eye lawure, alia nevei pfüchi sü daikinou bue touyu ahi paopei bae.”

¹⁶Honapai nou teithetsü noukou noukheyu donou puhsü honapaiye sa-a veale loure.

¹⁷Südonou puhnou akhai hisü cheche-a nou puhvei khouko sü daikinou bue touyu honapai hisü haibüa paore, “Apeishu hai bakhalia beikhai toumo hie, E apfüpou hi bukinou Eye panou Nazir mai ali soulai tea apfüpuo nou Ramai hi posheela peiwure. Apeishu beilouzü avei khouko sü ha-a bailai, ae mai kukhemai ali büa Esü khouko hata bailai.”

¹⁸Delilah nou zhouvuo puh hi checheyu chi sü Samson nou paopeire touyu süloukhaie, honapai nou Philistin veo maitao hi kopomaiye seiho paoe, “Haihi bakhali vepulaio, zhouvuo puhnou ahi checheyu chi paopeire.” Süthaisü veo maitao nou pousha taosü poloua honapai hi vere.

¹⁹Samsonye sü panou puh nake hinou zhitare, ae honapai nou maiye kuloua panou puhvei peishu boulei anai soua dalei khaitouyu sü beiwure. Süthaisü honapai nou puhye souchoro peie ae puhvei khouko sü hatare.

²⁰Süthaisü honapai nou shusoua “Philistin mai laire, Samson!” tea shapeie. Puhnou zhiyu hinou kailoua haibüa tsüchoe, “Raichoki büa Enou tyapaloua tutalou bailai.” MAPAO nou puhye thaowua tare touyu puhnou sülou more.

²¹Philistin mainou puhye nüloure alia puh nghithou sü reilapawure ae puhye Gaza nuhdu hi sapoa tare. Puhye hurai nou khiloua hukhaki hi thoukhaiwure alia sühinou puhye panou thouveiyu chuh sü pfüa veie.

²²Ana puh peishu sü chüpapu loure.

²³Chuo Philistin hi veo maitao nou asasoua puletao rah Dagon hi posheelalai tea tave jüloure, alia puletao nou haibüa paoe, “Etao vei rah nou Etaoye ngaobayu Samsonye Etao bah hi thoupeire.”

²⁴Maikhemai nou puhye ngaoloua puletao rahye paoshoa haibüa paoe, “Etaoye ngaobayupu, Etao teidei soushi peiyupu, Etao vei maitaoliye southayuna sü Etao vei rah nou Etao bah hi thoupeiwure.”

²⁵Puletao asasoua bukinou puletao nou paoe, “Samsonye kupaloua Etao panü soulaikhe.” Südonou puletao nou Samsonye hukhaki hinou sapaloua puletao nghoujü khailoure alia puhye panou panü soue. Puletao nou puhye panou deka ahai kohisü la-e.

²⁶Samson nou puh bah süthai sa-a laiyu nahlemai nahisü paoe, “Ki chüla-a buyu deka matsü nasü Eye panou deikhaio, ae sühi sünou Eye panou vüa buwo.”

²⁷Ki sühisü naotu-poutu ae Philistin hi veo maitao noupu koa bue, alia ki peide nahisü naotu-poutu mai thesü phali bue, puletao hai Samson nou panüsoua buyu sü zhua bue.

²⁸Süthaisü Samson nou MAPAO hi veachi paoe, “Oh Ramai MAPAO! Eye ngaipeiso, Eye zhouvu bakha alitou soukhoupu peilaio. Oh Ramai, sübüa anghithou ahai reilakhai touyu khüsü zhouvu bakha ali hinou phouloulai.”

²⁹Süthaisü Samson nou ki pfüla-a buyu deka toutsü ahai hisü kou bah deiloure, puh bah zhoulo vanou deka ali ae bah nalo vanou deka alilova sü deiloua puhvei khouko teitei nou thoua khaore.

³⁰Samson nou paoe, “Eye panou Philistin maitaoye koa thaibaio.” Puhnou puhvei khouko teitei nou thoua deka ahai sü khao khaie, sühi buyu veo maitao ae mai veishi pei hisü ki nou kaokou holoure. Sübüa puhnou thaire phaki hinou maiye southa louyu hai puh hria buki southa louyu jünou poure.

³¹Süthaisü puh thaihou-jürai maitao ae puh kikhamai nou ve puh thaiphao sü poloua pokhe Zorah ae Eshtaol kohi buyu puh puo Manoah khü hinou puhye vuh peie. Puhnou Israel maiye po kai khosa-a hrüpeie.