Read Poumei Naga CHIKUAPEI MAITAO 17 Bible Online

CHIKUAPEI MAITAO 17 - Poumei Naga bible

CHIKUAPEI MAITAO 17

¹Ephraim maivei teidei deichi nuh ali hinou hrüyu mai ali bue, puh zhih sü Mikah toue.

²Puhnou puh pfü hi paoe, “Shahu thelia kaihli (1100) ne hinou vaolouyu donou nenou vaomai naye chaa peiyu E-a süe. Pousha sütao ahi bue, Enou süsü poloure.” Puh pfü nou paoe, “Anahna! MAPAO ye panou neye shiha peitheo.”

³Puhnou pousha taosü puh pfü hi dakhai peire, alia puh pfü nou paoe, “Chaa nasü panou anah hi vemore donou pousha taosü Enou Ramai hi shee-a posheela peiwulai, ae sünasü panou poloua bashara ali souloua ne hi dakhai peilai.”

⁴Südonou puhnou pousha taosü puh pfü hi dakhai peie, alia puh pfü nou shahu kaih-hai poloua shahukumai hisü peire, puhnou shahu sütao poloua bashara soupeire alia süsü poa Mikah ki hi khailoure.

⁵Mikah hai la puh ki hinou rathobu ali bue. Puhnou bashara ae dai vepalai touyu rako zhuyu Ephod soukhailoua puh nahpoutu aliye panou süsü zhure donou napao soue.

⁶Süpha teile hi Israel mai hai veo mai ha-e, mai teitei nou lahlah jüpayu sü soua bubaie.

⁷Sübüa buyu phaki, nahlemai ali Judah teidei hi buyu Bethlehem nuh hinou Levi mai ali nuh sühi vei ve-e.

⁸Nahle puona nasü Judah teidei Bethlehem nuh thaokhaiwua puhnou hrüre buh phoua laiyu phaki hinou Ephraim deichi vanou buyu nuh Mikah ki hi velou loue.

⁹Mikah nou puh hi paoe, “Ne buh daikinou ve-e?” Puhnou Mikah hi paoe, “E Judah teidei Bethlehem nuh hinou veyu Levi mai alie. E daikinou hrülai hai tea buh phoua lai-e.”

¹⁰Mikah nou puh hi paoe, “Eye koa bubaio. Neye panou avei paodou-apeio ae napao soulai. Enou neye potei ali hi shahu kirou, sabanü ae touso soupeilai.”

¹¹Levi puona sünou Mikah ye koa bulai tea ae-ao souloure. Ae nahle puona sü puh nahmai ali büa puh hi bure.

¹²Mikah nou Levi puona ye sü panou napao soua puh ki bure.

¹³Süthaisü Mikah nou paoe, “Chuo MAPAO nou Eye soukha peishu laire, daiolouzü Enou chuo Levi mai aliye panou avei napao souloure.”