Read Poumei Naga CHIKUAPEI MAITAO 2 Bible Online

CHIKUAPEI MAITAO 2 - Poumei Naga bible

CHIKUAPEI MAITAO 2

¹MAPAO vei rakivamai nanou Gilgal hinou Bokim hi takouloua nou haibüa paoe, “Enou neletaoye Ejipt hinou sapapeie, alia neletao puopaoh hi apaokhai touyu teidei na hisü save thoupeie. Enou paoe, ‘Vo soukhai touyu nasü Enou hasou chileea souphe khailai moe.

²Neletaoye panou teidei haihi hrüa buyu maitaoye koa vo soulai moe, neletao nou puletao vei bashara khesü soushi souphe peilai.’ Ana neletao hai Enou paoyu büa soumore. Enou souso tea paoyu nasü soua baire.

³Südonou chuo Enou paowe, Enou puletaoye sü neletaoye donou hulai peilai more; ana puletaoye panou neletaoye ngaobayu mai panou soulaire, alia puletao vei bashara khesü panou neletaoye muhloulai.”

⁴MAPAO vei rakivamai nanou haihai Israel maisou hi paopeiyu phaki, mai hrülai nou shusoua krare.

⁵Südonou buh süna zhih sü Bokim tea saloue. Puletao nou buh sühinou MAPAO ye posheela-a rathoe.

⁶Joshua nou Israel maitaoye sü lahkuku vei zha depei khaitouyu teidei sü thaoloure donou seitawure.

⁷Joshua hria bukisa sü Israel mainou MAPAO vei kuvah souwe, alia MAPAO nou Israel maiye donou khupayu vahso soupeiyu teitei ngaoyu süthai-apei maitao bukisa hai Israel mainou MAPAO ye thoe.

⁸MAPAO vei kilai, Nun nahpoutu Joshua, puh hai po 110 mailoua thaire.

⁹Puhye Gaash deichi reilo nou buyu Ephraim mai deichi hi buyu Timna-heres hinou poa vuhpeie.

¹⁰Maiphao süna thaita khaiyu thai, bonakha phao hisü MAPAO nou Israel maiye donou khupayu vah soupei khaitouyu khesü ngaiwure.

¹¹Süthaisü Israel mainou MAPAO nghoujü hinou vah ashi sü soutare, alia Baal rahye sü thotare.

¹²Puletao nou puletao vei paipaoh Ramai MAPAO, puletaoye Ejipt hinou sapa peiyu nasü thomoa puletao pehao hinou buyu rah kukheye sü thotare, ae puletao nou MAPAO vei lekha rarou sü soupa peie.

¹³Puletao nou MAPAO ye thaowua Baal ae Ashtaroth rahsü thotare.

¹⁴Südonou Israel mai hisü MAPAO nou rarou loua maivei saotou saosoyu maiye panou puletao vei kini khesü saoloure. Ae puhnou puletao pehao hinou hrüyu ngaobamai bah hisü zhothou peire, südonou puletao hai puletaoye ngaobamai nghoujü hinou lalou hore.

¹⁵Puletao nou soureih soutayu sasü, puletao nou vah ashi souyu vanou MAPAO nou puletaoye kozho peimore. Südonou puletao hai veasho tare.

¹⁶Süthaisü MAPAO nou puletaoye souvea souhoyu mai bah hinou vupa peire donou chiku-apeimaiye seive peie.

¹⁷Ana Israel mainou puletaoye süthai-apeimai chi sü zübare, daiolouzü puletao nou khakhapfü ali büa MAPAO hinou bumoa rah kukheye sü thotare. Puletao hai puletao vei paipaoh nou tayu razhai hinou tamoa ludu tarei tare.

¹⁸MAPAO nou puletaoye donou chikupeimai seive peiyu phaki, MAPAO nou chikupeimaiye salai peiwe, ae chikupeimai nou hria bukisa sü puletaoye ngaobamai bah hinou MAPAO nou vupapeiwe, daiolouzü ngaobamai nou puletaoye souvea-a tudee buyu nasü MAPAO nou ngaoloua zhuvea-e.

¹⁹Ana chikupeimai thaita khaie, puletao hai puletao paipaoh mai jünou shipu ta-a baiwe, ae rah kukheye thota baiwe. Puletao hai zhaidou ashi nasü thaobae.

²⁰Südonou MAPAO nou Israel mai pei hi raroua haibüa paoe, “Enou puletao puopaoh hi vo soukhai touyu nasü mai haitao nou züba-a souphewure. Puletao nou achi zübayu vanou

²¹Joshua nou thaitayu phaki shokhai toua buyu tyahrü khesü Enou puletaoye donou hulai peilai more.

²²Enou puletaoye sü poa Israel maiye kabülaisa touyu zhulai, puletao hai puletao vei paipaoh mai büa MAPAO vei jüpa hinou talaiho talai mosa touyu zhulai.”

²³Südonou MAPAO nou süpehao hi hrüyu tyahrü khesü hulai moa shokhai peie, ae puhnou puletaoye sü Joshua bah hia thoupei moe, ae puh thaiyu thaia hulai peimoe.