Read Poumei Naga CHIKUAPEI MAITAO 4 Bible Online

CHIKUAPEI MAITAO 4 - Poumei Naga bible

CHIKUAPEI MAITAO 4

¹Ehud thaiyu thai, Israel mainou MAPAO nghoujü nou vah ashi sü soupu takhaire.

²Südonou MAPAO nou puletaoye sü Hazor hinou hrüa buyu Kanaan mai veo Jabin bah hi zhothou peiwure. Puhvei reihmai peikhowo zhih sü Sisera touwe. Puhnou Harosheth-ha-goiim hinou hrüe.

³Süthaisü Israel mainou MAPAO hinou kra-a soukha khoe, daiolouzü veo Jabin vei rheiluki, hunou souyu kaihkü (900) bue, ae Israel maiye po kai puhnou souvea nou khasa-a hrüe.

⁴Süphaki rachipaola-apei pai Deborah, Lappidoth chapfü nou Israel maiye chikupeia khosa-a hrüe.

⁵Honapai nou Ephraim mai vei deichi hinou buyu Ramah ae Bethel kohi habe ali phinou chobua Israel mainou tave honapai hinou kabüyu kao-e touyu sü chikuwe.

⁶Honapai nou teithe ali Naphtali maivei teidei, Kadesh nuhdu hinou hrüa buyu Abinoam nahpoutu Barak hisü haibüa chi seiho paoe, “Israel maivei Ramai MAPAO nou neye kharochi haibüa peiwe, ‘Ne Naphtali ae Zebulun mai thekirou saloua Tabor deichi hi tapawo.

⁷Enou veo Jabin vei reihmai peikhowo Sisera ye panou puhvei rheiluki ae reihmai sü saloua neye Kishon rei hinou reih soulai, ana Enou puhye sü ne bah hi thou peilai.’”

⁸Barak nou honapai hi chila peie, “Nenou Eye sa-a talouzü, talai; ana ne Eye sa-a tamo louzü E-a talai moe.”

⁹Honapai nou paoe, “E neye sa-a tapei-a bailai; ana taho reih soua veilouma süsü nevei kathe soulai moe, daiolouzü MAPAO nou Sisera ye sü naotumai bah hi thoupei-a bailai.” Süthaisü Deborah nou kushuloua Barak ye sa-a Kadesh hi hore donou tare.

¹⁰Barak nou Zebulun ae Naphtali maitaoye sü Kedesh buh hi kupoa ve-e, ae mai thekirou nou puh thaisü fütae, ae Deborah nou puhye satae.

¹¹Chuo Ken puona Heber nou Ken maitya kukhe zhomoa buh kua butare, puh hai thao-e toulouzü Hoba tyaosholea hinou veyu Moses vei paoh mai moo maie, puhnou buh doushoa Kedesh nghiyu Za-anannim hi buyu phüsüübe phi hinou sahpao haoloua bure.

¹²Süthaisü Sisera nou Abinoam nahpoutu Barak hai Tabor deichi hi bure touyu süloukhaie,

¹³puhnou puhvei rheiluki kaihkü ae reihmai hrülaiye sü kuve jüloure, alia Harosheth-hagoiim hinou Kishon rei hisü seitare.

¹⁴Süthaisü Deborah nou Barak hi paoe, “Tashulo, MAPAO nou neye süthai sa-a tapeilai! Alia zhou teithe MAPAO nou Siseraye sü ne bah hi thou peiyu teithe soulai.” Südonou Barak nou Tabor deichi hinou puhvei reihmai thekirou sa-a takoure.

¹⁵Barak nou puhvei reihmai sa-a reih soukouyu phaki, MAPAO nou Sisera vei rheilukitao ae reihmai hrülaiye sü khumah soupa peiwure, alia Sisera nou rheilukiphao hinou dei hi ngaokouloua phinou tutare.

¹⁶Barak nou rheilukitao ae reihmai hrülaiye sü Harosheth-hagoiim koute hupoa tae, ae Sisera vei reihmai hrülai sü southakhai toure; mai ali koute-a panou tupalou moa southa khai touwure.

¹⁷Ana Sisera hai phinou tupoa Ken puona Heber chapfü Jael sahpao hisü tuvere; daiolouzü Hazor hi veo Jabin ae Ken puona Heber kikhamai louzü chaveia bubaie.

¹⁸Jael nou Sisera hisü tapaloua paoe, “Taloulo, apaopuo, kikha taloulo, ngaopiso.” Südonou puhnou honapai sahpao khevai louloure, ae honapai nou puhye haosa nou hoku peie.

¹⁹Puhnou honapai hisü paoe, “Zhuvea nou Eye dzü paili khaipeio, E rei sore.” Südonou honapai nou lah (souhee dzübvü) hinou chonaodzü lapaloua puhye panou keloue, ae honapai nou puhye sü pokupu peie.

²⁰Süthaisü puhnou honapai hi paoe, “Kikhu hinou la-a Eye khopeio, alia mai tarali nou ve ne hi ‘Mai ali-a haihi buhae’ tea noulouzü ‘Mai lia hae’ tea paopeio,”

²¹Sisera hai veashoa tuveyu donou puhsü zhitei toutare. Süthaisü Jael nou hubao ae hushu sü poloure, alia honapai nou chocholou puhye sü hushu nou nousü hi veathou peie, sübüa puhsü thaire.

²²Barak nou Sisera ye hupoa veyu phaki, Jael nou kijü paloua puh hi paoe, “Haihi loukhaio, nenou phoua laiyu mai nasü Enou ngaopeilai.” Südonou puhnou honapai sahpao hisü takoure, alia Sisera sü sühinou thai-a bure, puh pei hisü hushu ali veathou khaitoua ngaoloue.

²³Süzhou teithe Ramai nou Israel maiye Kanaan hi veo Jabin jünou reih veilouyu peie.

²⁴Israel mainou soutaosou reih sü sousoukou Jabin veo-a southawure.