Read Poumei Naga CHIKUAPEI MAITAO 6 Bible Online

CHIKUAPEI MAITAO 6 - Poumei Naga bible

CHIKUAPEI MAITAO 6

¹Israel mainou MAPAO nghoujü hinou vah ashi sü souputa khaire, südonou Israel maiye panou Midian mai khakhe hinou po anai hrüe.

²Midian mainou Israel mai jünou khoupu loure, südonou Israel mai hai lyaqulu kinou ae bailou veiyu deichi kinou tuchüa hrütare.

³Israel mainou thoutai vuthou khaie, Midian mainou Amalek mai ae teinghi palova hrüyu tyahrü taoye saloua ve puletaoye hulai baiwe.

⁴Puletao vei chaobuh khesü haohloua teidei hi thoudzü khesü Gaza hi koute soushipei baie, alia Israel mai vei zhaotu, chode, mokhaia rheisüh khesü khaipei moe.

⁵Daiolouzü puletao hai kikhaorü ae sahpao noupu ve-a baiwe, puletao nou veyu hai khazü me aduli nou tayu büe. Puletao ae puletao vei racho hai chosha louho soua ve teidei sü soushi baiwe.

⁶Sübüa Israel maiye sü Midian mainou souvea shore, südonou Israel mainou MAPAO hinou soukha khore.

⁷Israel mainou MAPAO hi Midian maiye reih soure donou soukha khoyu phaki,

⁸MAPAO nou Israel mai hisü rachipaola peiyu mai ali seive peie, alia puhnou puletao hisü haibüa paoe, “Israel mai Ramai MAPAO nou haibüa paoe, Enou neletao ye mai qila souyu vahbuh hinou sapa peie.

⁹Enou neletao ye Ejipt mai bah hinou vupapeie, ae neletaoye souveayu mai bah hinou popa peie, ae puletaoye neletao nghoujü hinou hulai peie, alia puletao vei teidei sü neletaoye peie.

¹⁰Enou neletao hisü paoe, ‘E neletao vei Ramai MAPAO nasüe, neletao nou hrüa buyu Amor mai teidei hi rah khesü neletao nou tholai moe. Ana neletao nou achi zübare.’ ”

¹¹MAPAO vei rakivamai ali nou ve Ophrah nuh hi Abiezer khü hinou veyu Joash vei phüsüübe ali phi hinou chobu loure. Puh nahpoutu Gideon hai sühi sünou Midian mainou ngaoloure pia tutsüa nou darkhadzü süyu buh ali hinou southou da-a bue.

¹²MAPAO vei rakivamai nanou puh hi zhungao peia paoe, “Soureih sou avei puona, MAPAO nou neye salai peilai.”

¹³Gideon nou puh hi paoe, “Aduwo, MAPAO nou Etaoye salai peilouzü, daisounou haibüyu teitei hai Etao pei hi panou ve daowe? Etao puopaoh nou khupayu ko ‘MAPAO nou Etaoye Ejipt teidei hinou sapapei she’ tea paoyu khesü daisou tare? Chuo MAPAO nou Eye thaowure, alia Etaoye Midian mai bah hi thaothou peire.”

¹⁴Süthaisü MAPAO nou puh hi haibüa kharochi peie, “Nevei khouko buyu teitei nou thoua Israel maiye sü Midian mai bah hinou vupapeio. Enou neye seitawe.”

¹⁵Gideon nou chila peie, “Ana MAPAO, Enou kabüa Israel maiye sü khailu palou khailai? Avei pfümounah sü Manasseh khü hinou taikayu natou baido, ae Esü akikha hinou lelou hokha natou baie.”

¹⁶MAPAO nou puh hi paoe, “Enou neye salai peilai, alia nenou Midian maiye talapa-a mai aliye dakhao louyu büa dathalou bailai.”

¹⁷Gideon nou paoe, “Nenou Eye zhuvea peilouzü, ne hai MAPAO vuzüe touyu shee ali ahi soungao peio.

¹⁸Enou neye posheelayu touso pove peimo koute hai hinou zhuvea tapeiso.” Puhnou paoe, “Ne dakhai vemo koute E buh hai hinou bupeilai.”

¹⁹Südonou Gideon nou puh ki hi vetare, alia nghitu ali dathaloua kholoure, ae sou sühcho kirou phali khei thoumoa raokhao khaoloure. Puhnou nghitu sou nasü sülai ali hi thouloure ae khaovudzü sü khaosao ali hinou poloua phüsüübe phi hisü pove posheela peie.

²⁰Rakivamai nanou puh hi paoe, “Nghitu sou ae khei thoumoyu raokhao nasü chuhphao haihi khaikhaio, alia sühai phao hisü khaovudzü lazü peio.” Puhnou paoyu büa soupeie.

²¹Süthaisü MAPAO vei rakivamai navei bah hi buyu süpo nanou thaikou sou ae raokhao sü deipei khaie raki hinou kouh mei taopaloua sou ae khei thoumoyu raokhao nasü deihawure; süthaisü rakivamai nasü hatare.

²²Süthaisü Gideon nou MAPAO vei rakivamai ye ngaore touyu süloukhaie, puh hai ngaopi sholoua haibüa paoe, “Oh Ramai MAPAO, Eye soukha peio, daiolouzü chuo Enou MAPAO vei rakivamaiye zhuche vuzü hinou ve ngaore.”

²³Ana MAPAO nou puh hi paoe, “Kaonayu sü ne hi bulo; ngaopiso, ne thailai moe.”

²⁴Süthaisü Gideon nou buh sühisü MAPAO ye donou rathoki ali soupeie, alia süna zhih sü “MAPAO hai kaonayu Nasüe” tea sapeie. Sünasü zhou koute Ophrah tea kuyu buh hi bue, süsü Abiezer puonah maiveie.

²⁵Süzhou khei MAPAO nou Gideon hi paoe, “Ne puo vei chode polo, ae po anai payu chode kukhe lia polo, alia ne puo nou Baal rahye thoyu buh soukhai touyu nasü halaio, ae sühi Asherah razhai daokhai touyu nasü daodelaio.

²⁶Alia sünavei deichi hisü neletao vei Ramai MAPAO ye thoyu rathobuh aveihli soushulo. Süthaisü chode ahai nasü poloua nenou daodekhai touyu Asherah bashara vei süütao nou mei deiloua posheela peio.”

²⁷Südonou Gideon nou puh vei kilai mai kirou saloua MAPAO nou puh hi paopeiyu büa soue. Puhnou puh kikhamai ae nuhdu hi hrüa buyu khemaiye ngaopiyu donou süsü hea nou soumoa khei nou soue.

²⁸Thainaisho shona kushuyu phaki, nuhdu hinou hrüa buyu mainou Baal rathobuh nasü hakao kouwua ae süpehao hinou buyu Asherah vei bashara nasü daodewua alia soukhai touyu rathobuh phao hisü chode ali posheela khaitoua ngaoloue.

²⁹Puletao hai maili nou maili hi noue, “Thaonou haisü souwe?” Puletao nou haisü thaonou sousa tea phoutayu phaki, “Joash nahpoutu Gideon nou soue” touyu süloure.

³⁰Süthaisü puletao nou Joash hisü ve paoe, “Ne nahpoutu sü haihi sapakhaio, puhye southalai, daiolouzü puhnou Baal rathobuh sü soushire alia Asherah vei bashara nasü daode laiwure.”

³¹Ana Joash nou puh hi ve rao-a buyu maitao hisü paoe, “Neletao Baal ye donou lalaiwu? Neletao nou puhye vupei laiwu? Puhye donou lalaiyu mai hrülaiye sü dosho shona jünou southalai. Puh hai Ramai ali-e toulouzü puhla puhye vuloulai, daiolouzü soukoukhai touyu rathobuh nasü puh vei baie.”

³²Süzhou teithe hinou Gideon zhih sü “Jerubabaal” tea kuloure, süsü daitouwe toulouzü “Baal sü la panou puhye vulo” toue, daiolouzü soushi khaitouyu rathobuh nasü puhvei baie.

³³Süthaisü Midian mai, Amalek mai, ae teinghi palova nou hrüyu tyahrü taonou ve züloua Jordan rei talapa Jezreel deikho hisü sahpao haoloua buloure.

³⁴Ana MAPAO vei rako nou Gideon hisü louloua puhnou shabe sü houpoa Abiezer khüye puh thaifü peio tea kuloure.

³⁵Puhnou Manasseh mai teidei teitei hisü kopomaiye seitae; alia puletaoye puh thaifü peio tea kue. Puhnou Asher, Zebulun ae Naphtali maitao-a kuloue, ae puletao mai hrülai nou ve me souloue.

³⁶Süthaisü Gideon nou Ramai hi paoe, “Nenou paoyu büa Eye panou Israel maiye vupa loulai toulouzü, ahi shee ali soupeio.

³⁷Enou soumaisah ali southou dayu thai hi khai peilai, ae sünasü shona kushu dei teitei hi thekei-a soumaisah hisü panou vidzü kouh cha-a bulouzü, nenou paoyu büa Eye panou Israel maiye vupa loulai touyu sü Enou süloulai.”

³⁸Süsü puhnou paoyu bütou-a soupeie. Shona sü puhnou kushu zhuyu phaki, soumaisah hisü vidzü kouh chata toure, puhnou soumaisah hinou dzü süpa louyu hai khaosao ali phoue.

³⁹Süthaisü Gideon nou Ramai hi paoe, “Ahi rarou peiso, chipao ali paopu laihie; Eye panou soumaisah hinou vu ali shee zhupu louraio. Zhou louzü soumaisah nasü panou thekei-a deiphi teitei hi vidzü nou kouh cha-o.”

⁴⁰Ramai nou süzhou khei sü sübütoua soupeie, soumaisah nasü panou thekei-a dei hisü vidzü nou kouh chata toure.