Read Poumei Naga CHIKUAPEI MAITAO 9 Bible Online

CHIKUAPEI MAITAO 9 - Poumei Naga bible

CHIKUAPEI MAITAO 9

¹Gideon nahpoutu Abimelek nou Shekem nuhdu hisü ve puh pfü prou maitao ae tyarai maitao hisü paoe,

²“Shekem nuhdu hinou hrüyu maitao hisü noukhaio, ‘Gideon nahpoutu rainai taonou neletaoye khasa-a hrüyu nou veiho, mai alikhei nou khasa-a hrüyu nou veie?’ Alia E hai neletao vei vasou ali baie touyu sü ngaipeiso.”

³Puh pfü tyarai maitao nou puh thaosoua taho Shekem maitao hisü paoe, ae Shekem hinou hrüa buyu maitao nou Abimelek thaisü fülai tea chilah loure, daiolouzü puhsü puletao vei kityarai mai ali baie.

⁴Puletao nou Baal-berith rathoki hinou shahu rainai popaloua puhye peie, alia shahu sütao nou poa Abimelek nou dou loumoyu mai ae vah ashi soua laiyu mai meli ngaloua panou puh thaifü mai soue.

⁵Süthaisü puhnou puh puo nou hrüyu Ophrah nuhdu hisü ve puh thaihou-jürai maitao, Gideon nahpoutu mai rainai taosü chuh ali phao hinou southa khaiwure, ana Gideon nahpoutu nakhana Jotham hai southa loumore, daiolouzü puhnou tutsü loure.

⁶Süthaisü Shekem ae Beth-millo nuh mai hrülai nou tave jüloua Shekem nuhdu vei phüsüübe phi hinou Abimelek ye panou veo soure donou dopeiwure.

⁷Jotham nou ko sünasü süloukhaie, puhnou Gerizim deichiva taopaloua shusoua puletao hisü paoe, “Oh Shekem hinou hrüa buyu maitaore, achi keipeio, sükulouzü Ramai-a neletao chi keipeilai.

⁸Daoh bakhali süübetao nou tave jüloua puletao vei veo dolai toushe. Puletao nou Oliv süübe hisü paoe, ‘Etao vei veo soupeio.’

⁹Ana oliv süübe nou ‘Deiphao mainou ae rah khenou jüpashoa buyu avei theadzü sü thaokhaiwua neletao vei veo soure donou E takhai laiho?’ tea chila peie.

¹⁰Süthaisü süübetao nou doushibe hisü paoe, ‘Etao pei hi nenou tave veo soupeia baio.’

¹¹Ana doushibe nou puletao hisü ‘Avei veishoyu rashithou sü thaokhaiwua taho neletao pei hi veo soukhai laiho?’ tea chila peie.

¹²Südonou süübetao nou tave darkhabe hisü paoe, ‘Nenou Etao pei hi veo soupeio.’

¹³Ana darkhabe nou puletao hisü paoe, ‘Rah kheye ae maiye sousava peiyu avei rashidzü sü thaowua neletao pei hi tave veo soukhai laiho.’

¹⁴Süthaisü süübe teitei nou tave shube hisü paoe, ‘Etao pei hi nenou veo soupeio.’

¹⁵Shube nou puletao hisü haibüa chila peie, ‘Chechevujü hinou neletao nou Eye panou neletao pei hi veo soulai toulouzü, tave avei teikhu hinou bailo; ana neletao nou sübüa soumolouzü, avei shubetao hinou mei taopaloua Lebanon hi sedar süübe khesü panou deithawulai.’

¹⁶“Südonou chuo, neletao nou Abimelek ye panou veo soulouyu hai neletao le sheesha-a panou souwu? Alia Gideon nou neletao hi vah soupei khaitouyu thaifüa neletao nou puhvei kikhamai hi cheche-a soupeiwu?

¹⁷Licho peikhaio, apuo nou puhvei hrümai pamoa neletaoye donou reih soupeie, ae Midian mai bah hinou neletaoye khailupa peie.

¹⁸Ana neletao nou zhou teithe apuo kikhamaiye haitare, ae puh nahpoutu rainai taoye sü chuh ali phaonou southa khaiwure, alia puh kilai nahpoutu Abimelek panou Shekem maitao pei hi veo souloure, daiolouzü puhsü neletao vei kityarai mai aliyu donou.

¹⁹Zhou teithe neletao nou le shee chechea Gideon ae puhvei kikhamaiye tsükhou louzü, neletao-a Abimelek ye koa asalo alia puh-a panou neletaoye koa asalo.

²⁰Ana sükumolouzü, Abimelek hinou mei taopaloua Shekem ae Beth-millo maiye panou deithawo; alia Shekem ae Beth-millo maitao hinou mei taopaloua Abimelek ye sü panou deipeio.”

²¹Süthaisü Jotham nou puh jürai Abimelek ye ngaopiyu donou tutare ae Beer hinou ve hrütare.

²²Abimelek nou Israel maiye khasa-a hrüyu hai po asüe.

²³Süthaisü Ramai nou Abimelek ae Shekem maitao kohisü rahshi seive thoupeia Shekem hi mainou Abimelek ye dure donou vah soutare.

²⁴Haibüa payu hai Gideon nahpoutu rainaiye southayu Abimelek ae puh thaihou-jürai maitaoye southayu hi soukha peiyu Shekem maiye khüphoure donoue.

²⁵Shekem hi mainou puhye haiyu donou deichi kinou tutsüa maiye da-a maivei nangi saoloue. Haibüyu ko khesü Abimelek hi ve paopeie.

²⁶Süthaisü Ebed nahpoutu Gaal nou puh thaihou-jürai maiye sa-a Shekem hi velou bure, alia Shekem nuh mainou puhye louche loure.

²⁷Puletao nou darkha peida hinou ho darkhashi hailoua pove darkhadzü süloure alia nüh nüre. Puletao nou puletao vei rathoki hinou touso zhiloua tave Abimelek ko sü paoshia konü peie.

²⁸Gaal nou paoe, “Abimelek sü thaoro? Alia Shekem hi maitao, daisounou neletao puh vah souwe? Gideon nahpoutu, alia Zebul puhai louzü puhvei kharochi züwe, ana Etao louzü daisounou puh chi zülai? Neletao khü soushu peiyu Hamor ye sü tsükhoua buloua baio!

²⁹Mai haitao hai abah hi buyu thaio, Enou Abimelek ye hulai peilai. Enou Abimelek hi haibüa paolai, ‘Nevei reihmai thoupuloua tapakhaio.’ ”

³⁰Nuh khowo Zebul nou Ebed nahpoutu Gaal nou paoyu chipaotao süloua rarou shore.

³¹Puhnou ko pomaiye seiho Arumah hi buyu Abimelek hi haibüa paopeio tea seitae, “Ebed nahpoutu Gaal nou puh thaihou-jürai maiye saloua Shekem hi ve neye paoshia bure.

³²Südonou nevei reihmaiye saloua khei nou tave dou hinou tuchüa bulo.

³³Süthaisü thainesho shohna teinghi palouzü kushuloua nuhdu hisü huloukhaio, alia puh ae puhvei maitao nou neye tashu dulouzü, nenou puletao hisü daie sounüyu sü soupei lousüe.”

³⁴Südonou Abimelek nou puhvei reihmai teitei sü saloua khei nou tave Shekem nuhdu hi reih huloure donou me adai souloua daloure.

³⁵Ebed nahpoutu Gaal nou robomü hi takou la-a buyu sü ngaolou khaie, Abimelek ae puhye salaiyu reihmaitao nou tuchüa buyu buh hinou tashu loure.

³⁶Gaal nou puletaoye ngaolou khaie, puhnou Zebul hi paoe, “Zhukhaio, deichi hinou maikhesü laire!” Zebul nou puh hi chila peie, “Nenou zhingaoyu sü mai moe, deichi hinou khungu ngaoa baie.”

³⁷Gaal nou paopue, “Zhukhaio hona! Dei touchü hinou maikhesü takoure, alia me ali nou teinghu maivei phüsüübe hilo nou laire!”

³⁸Süthaisü Zebul nou puh hi paoe, “Chidu ladu paoa ‘Daisounou Abimelek kuvah soulai, puhsü thaoe?’ tea paoyu sü chuo daisou tare? Nenou ngaophou moa paoyu sü haimaitao mowu? Chuo talou puletaoye reih soukhaio.”

³⁹Gaal nou Shekem maiye saloua talou Abimelekye reih soue.

⁴⁰Abimelekye reih dulouhoa Gaal sü tutare. Abimelek nou reih hupoa robomü hi koute peie alia mai alaosou zhipeie.

⁴¹Südonou Abimelek nou Arumah nuhdu hinou ve hrüe, alia Zebul nou Gaal ae puhvei maitao hrülaiye sü hulaire, sübüa puletao sü Shekem hinou hrülou hoa tare.

⁴²Thainesho sü Shekem hi mainou dou hi holaishe touyu ko süloukhaie,

⁴³Abimelek nou puhvei reihmai hai me asü soua dade loure alia tuchüa daloure. Puhnou nuhdu hinou mai tapayu ngaolou khaie, puletao nou tuchüa buyu buh hinou tapaloua puletaoye southawure.

⁴⁴Abimelek alia puhye koa salaiyu me nanou nuhdu vei robomü hisü tukou daloure ae me kukhe ahai nou dou hi hoyu maitaoye sü southare.

⁴⁵Süzhou teithe sasa Abimelek alia puhye salaiyu maitao hai nuhdu süna pei hi reih soue. Puhnou reih soulou nuhdu nasü poloure, alia sühi hrüa buyu mai hrülaiye sü southare, ae nuhdu sünasü tai nou poa raopeire.

⁴⁶Haibüyu ko sü Shekem hi buyu mainou süloukhaie, puletao nou veishoa soukhai touyu Elberith rathoki hinou ve tuchü tare.

⁴⁷Shekem hi buyu maitao hai ve füli hinou züa bure touyu ko sü ve Abimelek hi paopeie.

⁴⁸Südonou Abimelek nou Zalmon Deichiva puhvei reihmai saloua patare, alia puhnou marei poloua süübo ali daode loure ae süsü puh phaova kaloure. Puhye koa laiyu reihmaitao hisü “Enou souyu büa neletao-a soulo” tea puhnou kharochi peie.

⁴⁹Sübüa puhye salaiyu mai hrülai nou süübo che daodeloure, alia süsü poa Abimelekye thaifü ve Shekem mainou tuchüa buyu robomü hisü khokhai loua mei deipeie, buh sühi tuchüa buyu Shekem mai naotu poutu buh sühinou thaiyu hai mai theli phae.

⁵⁰Süthaisü Abimelek nou tave Thebez nuhdu nasü haoloua poloure.

⁵¹Ana nuhdu sühisü kushoyu kipeitaoh ali bue, alia nuhdu sühi hrüa buyu mai hrülai nou sühi sü tuve bailoure ae sükhevai nou kikhu sü khawure, alia kipeitaoh hisü ngaopa buloure.

⁵²Abimelek nou kipeitaoh sünasü mei deire donou sühi talouyu kikhu hisü kou laloure.

⁵³Ana naotumai ali nou thouvei chuh nou laikouh Abimelek peirao sü deiphe peiwure.

⁵⁴Süthaisü puhnou thashoa puhvei reihna pfülaiyu nahlemai nahisü paoe, “Nevei khoche nanou thashoa Eye daotha peio, sükumolouzü mainou Eye ‘Naotumai ali nou southawure’ tea paoshulai.” Südonou nahle mai nanou puhye sü daotha peiwure.

⁵⁵Israel mainou Abimelek thaiyu ngaoloua puletao mai hrülai nou lah ki hi dakhai ve tare.

⁵⁶Haibüa Ramai nou Abimelek ye puh thaihou-jürai mai rainai southayu ae puh puo ki hi mah souyu paoh sü khapeie.

⁵⁷Alia Ramai nou Shekem hi hrüyu maiye vah ashi souyu paoh sü Gideon nahpoutu Jotham nou chaa peiyu büa puletao pei hi ve-e.