Read Poumei Naga PONGAOPEIYU 1 Bible Online

PONGAOPEIYU 1 - Poumei Naga bible

PONGAOPEIYU 1

¹Larübvü haina hai Jisu Khrista nou pongao peiyutao shoshonou rüthouyu larübvü nasüe. Pongao peiyu haina hai Ramai nou Khristahi dai thala-a pavuzü lairesa touyu sü puhvei kilai taohi pongao peire donou peikhaitoue. Khrista nou sütaosü puhvei rakivamaiye puh kilai Johan hi seivepei-a puh hi panou süngaopeie,

²alia Johan nou puhnou ngaoyu teiteisü paongao peie. Puhnou zhopaoh souyu sünawo louzü Ramai vei chipao ea Jisu Khrista nou pongaoyu cheche zhopaoh süna vanoue.

³Paosüyu rachi hainavei chipaotao phouyu puhsü rakoveie, alia chipao süsü keiloua larübvü hainahi rüthoukhai touyu sütao zülouyu puletaosü rakoveie! Daiolouzü sütao teitei palaiyu phasü ngheire.

⁴Johan nou Asia teideihi buyu lüloumaime anaihi rüe. Chuchu buyu raikinou buyu ea thaikhai hi velaiyu Ramai puh hinou, alia puhvei vebuh nghojünou buyu rako anaitao hinou,

⁵alia cheche zhopaoh, athaimai hrohinou rairaikaia hrishu louyu ea deiphao vemaitao pei hi akhona Jisu Khrista hi nou zhuvea ea kaonayu sü neletao hi buyu souloutheo. Puhnou Eletaoye leshie, alia puhvei posheelayu athai nanou puhnou Eletaoye Eletao vei mah hinou do soupeire,

⁶alia Puo ea puh Ramaiye kuvah soure donou puhnou Eletaoye sü panou napaomai taovei vedei ali souloure. Jisu Khrista hisü teisanou adusho ea khouko buyu sü souloutheo! Amen.

⁷Zhukhaio, puhsü teihao peinou laire! Mai hrülainou ea puhye heung nou khüyu maitao koute nou puhye sü ngaolai. Puh vanou deiphao hi maikhemai hrülainou do-a kralai. Südonou süsü sübüa pavu zülai! Amen.

⁸Chuchu buyu, raikinou buyu, alia thaikhaihi velaiyu khoukhoulai Ramai Mapaowo nou paoe, “Esü Alpha ea Omega süe.”

⁹Jisu hinou neletaoye koa veayuhi-a, vedeihi-a ea shameayuhi-a zha ngaozhoa buyu neletao thaihou jürai Johan Esü Ramai vei chipao ea Jisu nou pongao peiyu chechena paodouyu vanou Patmos zaipeidei hinou bue.

¹⁰Mapaowo teithe kisü Esü Rako hinou bue, alia bekho büyu kushoyu paili Enou Athailo vanou choue.

¹¹Pai sünanou haibüa paoe, “Nenou ngaoyu taosü larübvü ali hi rüthoukhaio, alia larübvü süsü nuhdu anai haitao hi buyu lüloumaime hi süolouzü Ephesa, Smurna, Pergamam, Thuatira, Sardis, Philadelphia ea Laodikia haitaohi seive peikhaio.”

¹²Sükisü ahi chipao-a buyu pai sünaye zhure donou Enou reive, alia reiveyu kisü sananou soukhai touyu meibvü dzükhaiyu buh anai Enou ngaoe,

¹³alia meibvü dzükhaiyu buh sütao hrohisü Mainah Poutu büyu mailisü puhvei zaodu nanou puh phipha hi chakou-a alia sana khyakho alinou puhkhao hi khokhai tou-a bue.

¹⁴Puh peishu sü kaathou zhaotumai moa vüra kue, alia puh nghithousü meikei kue;

¹⁵puh phisü mei hinou pothou deiloua kukhai touyu peiva vayu hu baosa zhu kue, alia puh paisü dzü alaovei pairao kue.

¹⁶Puhbah zhoulo vahinou teivuh anai keipoa bue, alia puhmü hinou thai-jü hri pfüyu khoche ali pae, alia puh zhusü vavei shoyu heako hi teinghi va kue.

¹⁷Enou puhye ngaolouyu kisü, Esü thaimai libüa puhphi hinou kou kaotare, ana puhnou puh bah zhoulonou Ava hi pokhailoua haibüa paoe, “Pikhaiso! Esü araikhana ea nakhana süe.

¹⁸Esü hria buyu nasüe; Esü thaire, alia zhukhaio Esü teisanou hriwe, alia athai ea thaimai deiphao pei hi khore khoukosü ahi bue.

¹⁹Südonou nenou ngaolouyu, süolouzü chuchu pa-a buyu ea thaikhaihi palaiyu sütaosü rükhaio.

²⁰Nenou Abah zhoulo vahinou teivuh anai ea meibvü dzü khaiyu buhtao ngaoyu sütaovei kukhaiyu kona louzü teivuh anaitaosü lüloumaime anai vei rakiva maitaoe, alia meibvü dzükhaiyu buh anaitao nou lülou maime anaitaoe.