Read Poumei Naga PONGAOPEIYU 14 Bible Online

PONGAOPEIYU 14 - Poumei Naga bible

PONGAOPEIYU 14

¹Süthaisü Enou zhue, alia zhukhaio, Zion deichi hinou Zhaotu sünasü la-a bue; alia puhye koa puhzhih ea puh puo zhih puletao puhi rüthou khaitouyu maikhemai 144,000 sü bue.

²Alia Enou raki vanou dzü dukho kuyu ea teisüyu pai kuyu paili choue. Pai süsü lou souyu mainou puletao vei lanabvü aduna kayu loukho süna büe.

³Mai 144,000 sütaonou vebuh, hrikhaona adai sütao, alia tsümai sütao nghojünou laloua maitalinoua doulou hoyu lou ashu nasü puletao nou souwe. Deiphao maikhemai hrülai hinou khailu palouyu sü puletao likhei baie.

⁴Mai haitaowo louzü puletao lah naotumai hinou souzhaiwu moyu maitaoe, daiolouzü puletao lahnou shee-a buloure. Puletao nou Zhaotu sünanou tayu buh tali hisü thaifüa laiwe. Puletaoye sü deiphao maikhemai hrohinou khailu paloua raikaiyu rashi thoutao kua Ramai hi ea Zhaotu sünahi popeire.

⁵Puletao mü hinou dayu halia ngaoloumoe. Puletaowo ha kao-zümoyu alia hae.

⁶Süthaisü kukhe rakivamai alinou deiphao hi hrüa buyu maikhe maitao, süolouzü maitya, khü, la ea tahrüh hrülaihi paongao peire donou teisa vei ko avei nasü poa ratei tsüle hinou kushoa zhao-a buyu sü Enou ngaoe.

⁷Puhnou haibüa pai kushoa paoe, “Ramaiye piloukhaio ea puhvei adushosü paoshokhaio! Daiolouzü puhvei chikulaiyu phasü veloure. Raki, deiphao, zai alia dzünghoutao soupeiyu puhye sü tholo.”

⁸Kukhe rakivamai ahai chenanou araina thaisü füa haibüa paoe, “Puhsü kaotare! Dushoyu Babilon sü kaotare! Puhnou tahrüh khemai hrülaiye puhvei khulou souyu vei souvoyu zhaoh nasü panou sholoure!”

⁹Alia kukhe rakivamai asü chenanou araina hai thaifüa haibüa paikushoa paoe, “Maitalinou khaosou sünaye ea puh zhu raiyu bashara naye tholouzü, alia sünavei paoshee nasü puhi moa puh bah hi nokhaiwu louzü,

¹⁰puh-a Ramai nou puhvei rouyu pai nahi dzü chokhaimoa lathoukhai touyu puhvei rarouyu zhaoh nasü sholai! Sübüa souyu puletao hrülaiye sü mashee rakivamai ea Zhaotu süna nghojünou mei ea meichuh hinou souvea peilai.

¹¹Puletaoye souveayu mei sünavei meikhao nasü teisanou khaopa-a bue. Khaosou süna ea puhvei zhuraiyu bashara naye thoyu, alia sünavei zhihvei shee ngaolouyu maitalisü khei-hea soyu ngaolai moe.”

¹²Haihisü Ramai chikha züa buyu ea Jisu hinou cheche-a buyu sheeyu maitaoye donou shamea loure ku-a bue.

¹³Süthaisü raki vanou pai alinou haibüa paoyu Enou choue; “Haisü rükhaio: chu shonou Mapaowo vei kuvah souyu hinou thaiyu maisü rakoveie!” Rakonou chila peie, “Ovai achechenou! Puletao nou puletao vei te-a vah souyu hinou soloulai, daiolouzü puletao vahnou puletao thaifüwe!”

¹⁴Süthaisü Enou zhue, alia zhukhaio, sühisü teihao kaali bue, alia süva hisü sana vepeirü ali rüpfüyu ea puh bah hi haishoyu kairao ali poa buyu, Mainah Poutu büyu alinou chobua bue.

¹⁵Sükisü kukhe rakivamai alinou Rathoki hinou tapaloua teihao vahinou buyu puh hisü shusoua sha-a paoe, “Nevei kairaosü poloua cha chikhaio, daiolouzü chachire phasü veloure; deiphao hai chachire donou meire!”

¹⁶Südonou teihao peinou chobuyu puhnou puhvei kairaosü deiphao hi thaikouloua deiphaosü chiloure,

¹⁷Sükisü kukhe rakivamai alinou rakihi Rathoki hinou tapayu sü Enou ngaoe, alia puh hi-a haishoyu kairao ali bue.

¹⁸Sühinou meipei hi khouko buyu kukhe rakivamai alinou sheelabuh hinou tapaloua haishoyu kairao poa buyu puh hisü haibüa paikushoa paoe, “Nevei kairaosü poloua deiphao hi darkha kipeivei darkha rashibo taosü tave dzüloukhaio, daiolouzü darkha rashitaosü meire!”

¹⁹Südonou rakivamai sünanou puhvei kairaosü deiphao hi thaikouloua deiphao hi darkha kipeivei darkha rashi taosü podzüloua, Ramai vei rarouyu darkha dzü süyubuh hi polai thoure.

²⁰Darkha rashi taosü nuhdu vakou darkha dzü süyubuh hinou süloure, alia rhei mükha khete pha ku-a darkha dzü süyubuh hinou zhesü dzüdu kua küpaloua kaacho kaih ahaipha doua kütare.