Read Poumei Naga PONGAOPEIYU 15 Bible Online

PONGAOPEIYU 15 - Poumei Naga bible

PONGAOPEIYU 15

¹Süthaisü kukhe dushoyu ea khupa shoyu sheeli süolouzü veahoyu anai poa buyu rakivamai anaitaoye sü rakivanou Enou ngaoe. Sütaosü veahoyu akhai taoe, daiolouzü sütaosü akhaisoua Ramai rarouyu pongaoyu taoe.

²Sükisü Enou meinou hükhai touyu zhuzhu kuyu zai ali ngaoe. Alia khaosou süna ea sünavei zhu raiyu bashara sünaye, alia puh zhihvei chahpei sünaye kolouyu maitaoye-a ngaoe. Puletao sü Ramai nou puletao hi peikhai touyu lanabvü aduna sütao poa zhuzhu kuyu zai süna pehinou la-a bue,

³alia puletao sü Ramai kilai Moses vei lou ea Zhaotu süna vei lousü soua bue: “Khoukhoulai Ramai Mapao, nevei vahtaosü daizhozhou dusa ea khupasa! Oh tahrüh khemaitaopei Veo, nevei ludutaosü daizhohou kaozüsa ea chechesa!

⁴Oh Mapao, thaohnou neye pimolai? Nezhih dushosü thaohnou paosho balai? Daiolouzü ne likhei mashee baie. Tahrüh khemai hrülainou taveloua neye tholai, daiolouzü nevei cheche vahtaosü mai hrülai nou ngaokhai loure.”

⁵Haithaisü Enou raki hinou Ratho kisü houpa khaitoua sühisü zhopaohvei sahpaona bua ngaoe.

⁶Rathoki süna hinou veahoyu anai poa buyu rakivamai anai taosü tapae. Puletao sü sheetoua peivavayu jüyu sahnou bahnoue ea puletao khaohisü sana khyakho nou phusühao khaitoue.

⁷Sükisü hrikhaona adai hrohinou alinou teisa nou hria buyu Ramai vei rarou nou phoutsü poa buyu sana pai anaitao sü popa rakivamai anaitao hi peie.

⁸Alia Rathoki süsü Ramai vei khouko ava ea puhvei khouko hinou khaopayu meikhao sünanou phoutsü loure, alia rakivamai anaitao nou poveyu veahoyu anaitao pache loumo koute sü maitalia Rathoki süna hi taloulou hore.