Read Poumei Naga PONGAOPEIYU 16 Bible Online

PONGAOPEIYU 16 - Poumei Naga bible

PONGAOPEIYU 16

¹Süthaisü Rathoki hinou kushoyu pai alinou rakivamai anaitao hi haibüa paoyu sü Enou choue: “Neletao taloua Ramai vei rarouyu pai anaitaosü deiphao hi lakoukhaio!”

²Südonou rakivamai araina nou taloua puh vei paisü deiphao lakoure, alia khaosou süna vei shee buyu ea puhvei zhu raiyu basharaye thoyu maikhe maitao vahisü ngaopiyu ea soushoyu chükütao paloure.

³Süthaisü rakivamai ahai chenanou puh paisü zai hi lathoue. Sühinou zai dzü sü thaimai vei zhe büloure, alia zai hi buyu hrikhaona hrülai sü thaire.

⁴Süthaisü rakivamai asü chenanou puhvei paisü, reitao ea dzühoungtao hi lathoue, alia sütaosü zhe datare.

⁵Sühinou dzütao pei hi khoyu rakivamai sünanou haibüa paoyu sü Enou choue, Oh Chuchu buyu ea raikinou buyu masheeo, nenou chiku kouyu haitao sü kaozüe!

⁶Daiolouzü puletao nou nevei sheeyu maitao ea rachi paolamai taovei zhesü soupare, alia südonou nenou puletao hisü zhe küloure donou peire. Haisü puletao nou ngaozüe!

⁷Sühinou sheelabuh hinou pai alinou haibüa paoyu sü Enou choue, “Ovai Khoukhoulai Ramai Mapao nevei chikuyu taosü chechewe ea kaozüe!”

⁸Süthaisü rakivamai adai chenanou puh paisü teinghi hi lakhaire, alia sünaye panou maikhe maiye puhvei meisounou chathyayu sü aetou peire.

⁹Puletaoye sü soushoyu meisounou chapeire, alia veahoyu haitao pei hi khouko buyu Ramai puh zhihsü puletao nou paoshi paokha peire, alia puletao nou le daloua puhvei dushosü paosho peibae.

¹⁰Süthaisü rakivamai angou chenanou puhvei paisü khaosou sünavei vebuh vahi lakhaire. Sühinou khaosou sünavei vebuh sü maitei loure, alia maikhe mainou soushoyu donou puletao vei malisü tutsütsü loure.

¹¹Sübüa puletao vei souyu ea chükü paopayu sütao donou puletao nou rakibu Ramaiye chaloure. Ana puletao vei ashi vah hinou puletao lesü daloubae.

¹²Süthaisü rakivamai arou chenanou puh paisü Euphratis reidu nahi lakouthoue. Sühinou teinghi palovanou veyu vemaitao vei ludu souda loure donou reidzü süsü there.

¹³Süthaisü Enou vaokü zhu raiyu sheemoyu rako asü ngaoe. Sütaosü zai nghouduna, khaosouna ea madayu rachipaola maina mü hinou pae

¹⁴Sütaosü khupa vah soua laiyu rashitaovei rakotaoe. Rako asü hai taonou deiphao hi vemaitao hrülai hi Khoukhoulai Ramai vei teithe Adunaki reih süna donou puletaoye pove dzüloure tapare.

¹⁵“Zhukhaio! Ewo avaomai ali büa vewe! Maitalinou baitoua talou more ea maiye panou puhvei ahrao buh sü ngaolou more donou zhaihe poa ea puhvei sabanühsü tupoa buyu puhsü rakoveie!”

¹⁶Süthaisü rako sütaonou vemai sütao ye Ebria la hinou Armageddon touyu buh sünahi save dzüloure.

¹⁷Süthaisü rakivamai anai chenanou puh paisü teikhai hi lakhaire. Alia Rathoki hi vebuh süna hinou kushoyu pai alinou paipaloua haibüa paoe, “Haisü souloure!”

¹⁸Alia sühisü teipei vavayu, pairaotao, tei süyu pai, alia nü süshisho loure. Emaiye soushu rainou haibüa nüsüyu hai pakhai mohie; hainanou kukhe teitei jünou shikae!

¹⁹Dushoyu nuhdu nasü zhasüsoua soukhore, alia tahrüh khemaitao teiteivei nuhdu taosü souhare. Alia Ramai nou dushoyu Babilon ye sü licholoua puhye panou puhvei lekha-rarouyu zhaohnou phoupfüa buyu pai nasü küloure.

²⁰Zaipeidei veishisü ngaokhai more ea deichi veishisü hazheih tare.

²¹Rateivanou maikhemai pei hisü reithou alilinou sühcho raingoupha süyu dushoyu reithoutao rükou loure. Alia reithou vanou veahoyu süna donou maikhemai nou Ramaiye chaloure, daiolouzü veahoyu süsü ngaopi zhulere.