Read Poumei Naga PONGAOPEIYU 17 Bible Online

PONGAOPEIYU 17 - Poumei Naga bible

PONGAOPEIYU 17

¹Süthaisü pai anai poa buyu rakivamai anaitao hrohinou alinou Ahi taveloua paoe, “Tavelo, rei alao ngheiki hinou soupakhai touyu nuhdu aduna, süolouzü zhih tashoyu khakha paiye chikuyu sü Enou ne hi pongaolai.

²Deiphao hi vemaitao nou puhye koa khulou vah souwe, deiphao hi maikhe maitao nou puhvei khulou vah souyu zhaoh süsü sholoua zhitei tare.”

³Sühinou rakivamai sünanou Eye rako hilonou sataloua rekouhi saho khaipeie. Sühinou Enou naotumai aliye Ramaiye paoshiyu zhihtaonou rüthou phoukhai touyu horoyu khaosou ali phaova hinou chobua ngaoe, alia khaosou süsü pei anai ea kai kiruo pfüe.

⁴Naotu süpaisü maomüyu ea horoyu sabanüh nou bah nouwe, alia puhsü sana touhtao, chuh muhtei ea mukta chuhvei nataonou tupfüa bue. Puhbah hisü puhvei khulou souyu vei ngaorayu ea sheemoyu nataonou phoua buyu sana paili poa bue.

⁵Puh puhisü haibüyu, “Dushoyu Babilon, deiphao hi khakha maitao ea ngaorayu hrülai vei pfü, touyu khei zhih ali rüthou pfülaie.”

⁶Alia sheeyu maitao vei zhe ea Jisu hinou cheche-a buyu vanou southeayu maitao vei zhenou shozhia buyu naotupai sünaye sü Enou ngaoe. Enou puhye ngaolouyu kisü, Esü khupasho loure.

⁷Ana rakivamai sünanou Ahi noue, “Ne daidonou khupawe? Naotu süpaivei, alia pei anai ea kai kiruo pfüa puhye pfütayu khaosou sünavei khei kosü Enou nehi paongao peilai.

⁸Nenou ngaoyu khaosou sünasü teile alihi hria bue, ana chuwo hrikhai more, alia sünasü akhai hayu raobvü hinou tapare hinou bure ea puhvei hakayuhi tawe. Teideiphao soushurai hinou ahri larübvühi zhih rüthoulou moyu deiphao hinou hria buyu maitao nou khaosou sünaye ngaolouyu kisü khupalai, daiolouzü puhsü teile lihi hrie, chuwo hrikhai more, ana puhsü vepukhailai.

⁹“Hai nanou ratsü pfüloure ea sütouloure kuwe. Pei anaitaosü naotupai sünanou chobua buyu deichitaoe. Alia sütaosü vemai anaitaoe.

¹⁰Puletao angousü kaotare, aliwo buhie, alia kukhe aliwo velai hie; ana puhnou velouzü, puhsü phajü donou likhei vesoua buvuzü bailai.

¹¹Alia teile alihi hria buyu khaosou sünasü chuwo hrikhai more ea sünasü veo acha chenasüe. Puhsü anaitao hrohinoue ea puhsü hakayu hilo tawe.

¹²“Alia nenou ngaoyu kai kiruo taosü chu vedei ngaoloumoa buyu veo kiruotaoe, ana puletaosü khaosou sünaye koa teilecho alikhei vemaitao soua hrüre khouko ngaobailai.

¹³Puletao lesü ali khei soubaie, alia puletao vei khouko ea soulousü zü nasü khaosou sünahi peire.

¹⁴Puletao nou Zhaotu süna pei hisü reih soulai; ana Zhaotu sünanou puhvei kulouyu, dolouyu, alia cheche-a puhthai fülaimaitaoye koa puletaoye sü koloulai, daiolouzü puhsü paopumaitao pei hi Mapaoe ea vemaitao pei hi Veo nasüe.”

¹⁵Süthaisü rakivamai sünanou Ahi paoe, “Naotu khakhapai sünanou chobua nenou ngaoyu dzü alao sütaosü tahrühtao, maikhe maitao, maitya khemaitao ea lataoe.

¹⁶Nenou ngaoyu kai kiruotao ea khaosou sünanou khakhapfüpai sünaye ngaoralai. Puletao nou honapaihi buyu ha teiteisü potaloulai ea puhye sü baitoua thaowulai. Puletao nou puhvei vasousü touloulai ea puhye sü meinou deiwulai.

¹⁷Daiolouzü Ramai vei chipaotao vetemo koutesü puletaoye panou tsüle ali souloua ea puletao vei tukha-sahrü loure khouko sü khaosou sünahi thoupeiwu-a Ramai puhvei lichoyu sü souloure tsü nasü Ramai nou puletao lehi thoupeire.

¹⁸“Alia nenou ngaoyu naotupai sünasü deiphao hi vemaitao pei hi tukha sahrüyu dushoyu nuhdu sünasüe.”