Read Poumei Naga PONGAOPEIYU 2 Bible Online

PONGAOPEIYU 2 - Poumei Naga bible

PONGAOPEIYU 2

¹“Ephesa hi buyu lüloumaime vei rakivamai nahi rükhaio: “Chi haitaosü bah zhoulo vanou teivuh anai keipoa buyu ea sana meibvü dzükhaiyu buh anaitao hronou talaia buyu maisüna vei chipao nasüe.

²Enou nevah ea nenou kazhou koute te-a ea shamea-a vah sousa touyu sü süwe; alia nenou maishimai taoye koa shamea zholouhoe touyu süolouzü puletaohai sei-atamai mokhaia sei-atamai baie tea paoyu sümaitao zhaisü nenou zhuloua puletao vei amadasü phoupaloue touyu sü Enou süwe.

³Nenou shamealoue ea Azhih donou veahoyu sü daoloue, alia ne sü chathai takhaimoe.

⁴Ana Enou nepei hi motouyu sü hainae: nenou raiki Eye leshiyu büa chuwo leshi peikhai more.

⁵Südonou ne daizhozhou kaadoua dekouresa touyu sü lichokhaio! Nemah hinou le dalouwo ea nenou raiki souyu vahtaosü souloukhaio. Nenou nemah hinou le daluomo louzü, Enou ne hi taveloua nevei meibvü dzükhaiyu buh nasü süna buh hinou potalou bailai.

⁶Ana Enou paoshonüyu haina hai nehi bue süolouzü Enou Nikolaitan mainou soupfüyu vahtao ngaorayu süzhou ne-a ngaorawe.

⁷“Nou pfüa buyu puhnou Rakonou lüloumaime taohi pao-a buyu nasü keiloukhaio! “Reih ko louyu puh hisü Ramai vei Shofü hinou paopayu ahri süübe vei rashithouna touloure zü nasü Enou peilai.

⁸“Smurna hi buyu lüloumaimevei rakivamai nahi rükhaio: “Chi haitaosü araikha ea nakhana soua buyu, thailoua hripulou khaiyu puh chipaoe.

⁹Enou nevei veahoyu ea toure hayu sü süwe, ana newo chechenou haniwe! alia lah puletao münou puletaohai Jihudimaie tea paokhaia chechemoyu ea Saitanme hinou vebaiyu puletao nou nepei hi chishi paoyutaosü Enou süwe!

¹⁰Nenou thala-a veahoyu daore süvanou pikhaiso. Zhukhaio rashinanou neletao kamaiye zhai zhure donou hukhahi laithoulai, alia neletaosü teithe kiruopha veaholai. Athai koute Ahinou cheche-a bulo, alia ahri Veo peirüsü peilai.

¹¹“Nou pfüa buyu puhnou Rakonou lüloumaime taohi pao-a buyu nasü keiloukhaio! “Reih kolouyu puhye sü athai ahai chenanou hakia souzhuwu laimoe.

¹²“Pergamam hi buyu lüloumaime vei rakivamai nahi rükhaio: “Chi haisü thai-jü hri pfüyu haivei shoyu khoche süna buyu puh chipaoe.

¹³Nenou hrüa buyu buh sü Enou süwe, sühisü Saitan vei vebuh bue. Newo Azhih hinou cheche-a bue, alia Avei cheche zhopaoh sou-apeio Antipas ye Saitan nou buyu buh sühinou southeayu ki koutea newo Ahi lüa buyu hai hakia thaokhai moe.

¹⁴Ana Enou nepei hi motouyu daotu bue, süolouzü neletao hrohinou kamaisü Balaam nou doupeiyu thaifüyu mai bue. Puhnou Israel maitaoye panou bashara hi posheelayu touso touloure ea khulou vah souloua mah hi louloure donou puletao nghojühi do ashi laithou peire sü Balak hi doupeie.

¹⁵Sübüa nehi-a Nikolaitan mainou doupeiyu thaifüa laiyu mai kamai bue.

¹⁶Südonou ledalo! Sükumo louzü Enou nehi thala taveloua Amü hi buyu khoche sünanou puletao pei hisü reih zülai.

¹⁷“Nou pfüa buyu puhnou Rako nou lüloumaime taohi pao-a buyu nasü keiloukhaio! “Reih kolouyu puh hisü pokukhai touyu manna sü Enou peilai, alia ngaolouyu puh likheinou sübaiyu zhih ashu rüthoukhai touyu chuh kaali Enou puh hi peilai.

¹⁸“Thuatira hi buyu lüloumaime vei rakivamai na hi rükhaio: “Chi haitaosü meikei büa keivavayu nghithou pfüyu ea puh phisü mei hinou pothou deiloua kukhai touyu peivavayu hu baosa kuyu Ramainah Poutu chipaoe.

¹⁹Enou ne vah taosü süwe. Nevei leshi ea lü, nevei kuvah ea shameayu, alia nenou chu soua buyu sünanou raiki souyu jünou veikoure touyu sü Enou süe.

²⁰Ana Enou nepei hi motouyu haitao bue: Nenou lah puhye nou rachi paolapai tea kuyu naotupai Jezebel ye koa shamea peiwe. Puhnou Akilaitaoye khulou vah soure ea bashara hi posheelayu tousotao toure donou doupeia sümah peiwe.

²¹Enou puhye puh mah hinou le daloure teile peiwe ana puhnou puhvei khulou vah souyu hinou le daloure sü bae.

²²Alia zhukhaio, Enou puhye sü veahoyu züh hi polai khailai, alia puhye koa khulou souyu maitaoye sü puhvei vah ashitao hinou puletao ledalou molouzü puletaoye sü panou ngaopishoa veaholai.

²³Enou puh nahmai taoye sü southealai, alia sükisü lüloumaime hrülainou Esü maikhemai hrülai tsüle süyu mai nasüe touyu sü sülai, alia Enou neletao mai aliliye lah lahnou soukhai touyu vah thaifüa ngaozü nasü peilai.

²⁴“Ana Thuatira hi buyu kukhe neletaowo louzü ashi doupeiyu haina thaifüa tamoe; neletaowo, thoushoyu Saitan vei kheitsü tea kamainou kua buyu nasü doulou moe. Enou neletao hi paowe süolouzü Enou neletao pei hi kou süyu halia pokhai laimoe.

²⁵Ana E vemo koute sü neletao hi buyu nasü potoulo.

²⁶Reih kolouyu ea akhai koute Azüpa vah soua buyu puh hisü tahrü khemaitao pei hi khore khouko sü Enou peilai,

²⁷alia lah E-a Apuo hinou khouko ngaolouyu sübüa puhnou puletaoye sü hu südanou poa tukha sahrülai ea puletaoye sü nai lee soukho sasayu kua soukhowulai,

²⁸alia Enou puh hisü shona teivuh-a peilai.

²⁹“Nou pfüa buyu puhnou Rako nou lüloumaime taohi pao-a buyu nasü keiloukhaio!