Read Poumei Naga PONGAOPEIYU 20 Bible Online

PONGAOPEIYU 20 - Poumei Naga bible

PONGAOPEIYU 20

¹Süthaisü rakivamai alinou puhbah hinou akhai hayu raobvüvei khareih ea hurai aduli poa rakivanou takouyu sü Enou ngaoe.

²Alia puhnou zai nghoudu, nghou tsüna, süolouzü Rashina moa Saitan sünaye niloua puhye sü po theli donou phibao phukhaire.

³Rakivamai sünanou puhye sü akhai hayu raobvü hi polaithoure, alia haibüa puhye panou po theli chemosa koutesü tahrüh khemaitaoye lalou more donou buh sühinou khareih thoungiwu-a süna phaovanou paoshee nore. Süthaisü phajü donou puhye sü phapei-vuzü khailai.

⁴Süthaisü Enou vebuhtaosü ngaoe, alia sütao vahinou buyu puletao hisü chikupeire khoukosü peire. Alia Jisu nou pongao peiyu cheche ea Ramai vei chipao paodouyu vanou peideyu maitao vei rakotaosü Enou ngaoe. Puletao nou khaosou sünaye moa puhvei zhu raiyu bashara naye thomoe, alia puletao puva hi moa puletao bah hi khaosou sünavei shee nasü pfülai moe. Puletao nou hrishuloua Khristaye koa po theli sü ve-a hrüe.

⁵(Kukhe thaimaitaosü po theli nasü chemo koutesü hrishumoe.) Haina hai hrishuyu raikha nasüe.

⁶Hrishuyu raikhanahi lou zha ngaozho louyu puletaosü rako veishoyu ea sheeyu maitaoe! Athai ahai chenanou sübüyu maitao pei hisü khouko hare, ana puletaosü Ramai vei ea Khrista vei napaomaitao soulai, alia puletao nou puhye koa po theli ve-a bulai.

⁷Alia po thelina cheyu kisü, Saitan ye puhvei hukha hinou phapeilai,

⁸alia deiphao kainghou adai hinou raroua buyu tahrüh khemaitao, süolouzü Gog ea Magog ye lare donou puhnou tapalai. Sübüa Saitan nou puletao hrülaiye sü zai pei hi vünai zhou poua reih soure donou pove dzülai.

⁹Alia puletao nou deiphao teiteihi tarao veloua sheeyumaitao vei fühao ea leshiyu nuhdu nasü sühaorü loure. Ana rakivanou mei kouloua puletaoye sü souhare.

¹⁰Sükisü puletaoye layu Rashinaye sü raiki khaosou süna ea madayu rachi paolawo naye polai thouyu buh mei ea meichuh vei zai hi polai thoure, alia puletaoye sü teisa khei-heanou souvea peilai.

¹¹Süthaisü dushoyu vebuh kaali ea süvanou chobuyu puhye sü Enou ngaoe. Deiphao ea rakisü puh nghojünou tutare, alia sühaiye sü ngaopukhai more.

¹²Alia thaimaitao taidu veishi kheihao-a vebuh süna nghojünou la-a buyu sü Enou ngaoe. Sühisü larübvütao hapa khaitoue, alia süthai-a kukhe larübvüli hapa khaitoue, süsü ahri larübvü nasüe.

¹³Sühinou zainou puh lekhe hi buyu thaimaitaoye sü phapeire. Alia Athai ea Thaimai Deiphao nou-a puhai nou poa buyu thaimaitaoye sü phapa peire, alia puletao hrülaiye sü puletao nou souyu thaifüa chiku loure.

¹⁴Süthaisü Athai ea Thaimai Deiphaoye sü meizaihi polai thoure. (Meizaibuh hai nasü athai ahai chenasüe.)

¹⁵Ahri larübvü nahi zhih phouhayu maitaliye sü meizaihi polai thouwure.