Read Poumei Naga PONGAOPEIYU 22 Bible Online

PONGAOPEIYU 22 - Poumei Naga bible

PONGAOPEIYU 22

¹Süthaisü rakivamai sünanou Ramai ea Zhaotuvei vebuh hinou küpayu zhuzhu büa leivavayu ahri dzüvei rei nasü Ahi pongaoe,

²alia rei süsü nuhdu sünavei duva tsüle hinou kükouwe. Rei sünavei pe holo hailova hisü po ali hinou lüh kiahai rashi shiyu ahri süübe paopa-a bue, süsü khou tsühnou rashi shiwe. Alia süübe sünavei sünghoutaosü tahrüh khemaitao vei sounou souvei peire donoue.

³Ramai acha ngaoa buyu hatalia nuhdu sühi sü bulaimoe. Ramai vei ea Zhaotu sünavei vebuh sü nuhdu sühinou bulai, alia puh kilai maitao nou puhye sü tholai.

⁴Puletao nou puh zhusü ngaolai, alia puh zhihsü puletao puvahi rükhailai.

⁵Sühisü khei touyu bupu laimoe, alia sühisü puletaoye donou meibvü moa teinghi vei avasü matsü hae, daiolouzü Ramai Mapaowo nou puletao vei ava soulai, alia puletao nou teisanou ve soua hrülai.

⁶Süthaisü Rakivamai sünanou Ahi paoe, “Chipao haitaosü louchelou veie ea chechewe. Alia rachi paolamaitao hi puhvei rako peiyu Ramai Mapaowo nou thala-a daipa vuzülaisa touyu sü puhvei kilaitaohi pongao peire donou puhvei rakivamai naye sü seipeie.”

⁷Jisu nou paoe, “Zhukhaio! Esü thala-a laire! Larübvü hainavei rachi paopakhai touyu chipaotao zülouyu puhsü rakoveie.”

⁸Johan Enou haitao teiteisü chouloure ea ngaoloure. Alia Enou sütao choulouyu ea ngaolouyu thaisü, haitaoye Ahi pongao peiyu rakivamai süna phihinou kou Esü kaoloure, alia Esü puhye tholoure hinou buloure.

⁹Ana puhnou Ahi paoe, “Nenou süsü souwu laimoe! Esü ne, ne thaihou jürai rachi paolamaitao ea larübvü hainavei chipaotao züa buyu puletaoye koa kilai souzhoyu mai alibaie. Ramaiye tholo!”

¹⁰Alia puhnou Ahi paoe, “Larübvü haina hinou rachi paopakhai touyu chipaotaosü khei-a pokhaiwuso, daiolouzü haitao teitei palaiyu teilesü ngheiteire.

¹¹Ashi soua buyu puhye panou ashi soua bukhaio, sheemoyu puhye panou sheemoa bukhaio, alia cheche-a buyu puhye panou cheche vah soua bukhaio, ea shee-a buyu puhye panou shee-a buloukhaio.”

¹²Alia Jisu nou paoe, “Zhukhaio, Esü thala-a laire! Enou Avei buusü maikhemai hrülai hi lah lahnou souyu thaifüa peire donou Eye koa povewe.

¹³Ewo Alpha ea Omega, Araikhana ea Nakhana, alia Shuraiwo ea Akhaiwo nasüe.”

¹⁴Puletao nou ahri süübe süna hinou rashi touloure ea romü sütao hinou nuhdu sühi talou loure donou puletao vei zaoduna soushee louyu maitaosü rakoveie.

¹⁵Ana nuhdu vakouhi buyu maitaosü seitao, khei-khupado souyu maitao, khulou vah souyu ea maiye southeayu, alia basharaye thoyu ea chi-la hinou ea sou-pfüyu hinou madayu sükhe maitaoe.

¹⁶“Jisu Enou lüloumaime taoye donou zhopaoh hainasü neletao hi peiloure Avei Rakivamai naye seivewe. Ehai David vei Ma ea Taonah, alia vavei shoyu Shona Teivuh nasüe.”

¹⁷Rako ea Nghire painou paoe, “Tavelo!” Alia chipao haina choua buyu puhnou, “Tavelo!” tea paokhaio. Alia rei-a buyu maitalinou tave loukhaio, züpa-a buyu maitalinou ahri dzü sü sa-a küloukhaio.

¹⁸Larübvü haina vei rachi paopakhai touyu chipaotao choua buyu maikhemai hrülaihi Johan Enou tukha-a paowe: maitalinou hatali chi sütaohi thoupure toulouzü, Ramai nou puh hisü larübvü haina hinou paokhai touyu veahoyu taosü thoupu peilai.

¹⁹Alia maitalinou larübvü hainavei rachi paopayu chipaotao hinou hatali popare toulouzü, Ramai nou larübvü haina hinou paokhai touyu Ahri süübe ea mashee nuhdu hinou puhvei zhasü potawulai.

²⁰Chi haitao teiteihi zhopaoh pei-a buyu puhnou paoe, “Ovai chechenou! Esü thala-a laire!” Amen. Vepeio, Mapao Jisu!

²¹Eletao Mapao Jisu Khrista vei zhuvea nou neletao hrülaiye koa buyu sü souloutheo. Amen.