Read Poumei Naga PONGAOPEIYU 6 Bible Online

PONGAOPEIYU 6 - Poumei Naga bible

PONGAOPEIYU 6

¹Süthaisü Zhaotu sünanou paoshee anaitao hronou raikhana hapayu sü Enou ngaoe, alia hrikhaona adai hrohinou alinou teisüyu kho büa, “Tavelo!” tea paoyu pailisü Enou choue.

²Alia Enou zhuyu kisü Anghojü hinou rhei kaali buyu sü ngaoe. Süna phaovahi buyu puhsü louli powe, alia puh hisü veo peirü ali peikhaitoue. Puhnou reih koloure donou reih koloumai ali büa rhei nasü pfüa tapare.

³Alia Zhaotu sünanou paoshee ahai chena hapayu kisü hrikhaona ahai chenanou, “Tavelo!” tea paoyu sü Enou choue.

⁴Sükisü sühisü meibüa horoyu kukhe rhei ali tapae. Süna phaova hi buyu puh hisü deiphao hinou kaonayu sü pota loure ea maikhemai alinou liye panou southea loure khoukosü peiwure; alia puh hisü khoche aduli peire.

⁵Alia Zhaotu sünanou paoshee asü chena hapayu kisü hrikhaona asü chenanou, “Tavelo!” tea paoyu sü Enou choue. Alia Enou zhuyu kisü Anghojü hinou rhei teili buyu sü Enou ngaoe. Süna phaovahi buyu puh bah hisü sühchokhao ali poe.

⁶Sükisü ha kholi hrikhaona adai sütao hrohinou paipayu büa süolouzü, “Southou sühcho ali muhsü naizho, alia shithou sühcho asü muhsü naizhoe. Ana Oliv süübetao ea darkha kipeitaowo louzü hakonou souhawuso!” tea paoyu sü Enou choue.

⁷Alia Zhaotu sünanou paoshee adai chena hapayu kisü hrikhaona adai chenanou, “Tavelo!” tea paoyu sü Enou choue.

⁸Alia Enou zhuyu kisü Anghojü hinou rhei papayuli buyu sü Enou ngaoe, süna phaovahi buyu puh zhihsü Athaina tea kuwe, alia thaimai deiphao nou puh thaisü fütei poa laiwe, alia deiphao zha adai hinou zha aliye sü khoche, tokaayu, sounou ea deiphao hi rekhaotaoye panou southea loure donou puhai hi khouko thoupeire.

⁹Alia Zhaotu sünanou paoshee angou chena hapayu kisü Ramai vei chipao paodouyu vanou ea puletao nou cheche-a zhopaoh souyu donou southeawuyu rako sütaoye sü sheelabuh khehinou Enou ngaoe.

¹⁰Puletao nou shusou shaloua, “Mashee ea acheche, Khoukhoulai Mapao! Deiphao hinou hrüa buyu maikhe maitao pei hi nenou chikumojü ea Akhemai zhevei khü phoumojü teile kasho doua bulaihie?”

¹¹Sükisü puletao mailili hisü zaokaa adu chekhei peie, alia puletaoye southeayu büa southea laiyu puletaoye koa kilai souyutao ea puletao vei thaihou jürai maitaoye-a dathea chekhoumo koutesü phajü sopuloulaiwo tea puletao hi paopeie.

¹²Alia Zhaotu sünanou paoshee arou chena hapayu sü Enou ngaoe. Sükisü sühisü chihshoyu nü süloure, alia teinghisü teithou soumai sah kuloure, alia khousü teiteinou hothou zhe bü baire.

¹³Alia chihshoyu teikhainou doushibe vahi hüshoyu ki sühinou liche moyu doushitao raikouyu kua rateihi teivuhtao-a deiphao hi dekoure.

¹⁴Rateisü larükhu zükhaiyu kua hazhei tare, alia deichi ea zaipeidei teitei-a puletao buh hinou podare.

¹⁵Sükisü deiphao hi vemaitao, teideikho maitao, reihmai peicha maitao, hani maitao, khouko bumaitao, alia mai kukhe qilatao ea mado souyumai hrülai sü lahlah dei qulutao hinou ea deichitao hi chuhleaphi khonou tutsü tare.

¹⁶Puletao nou deichitao ea chuhlea taohi paoe, “Eletao pei hi pokouloua Ehye sü vebuh hi buyu puh nghojünou ea Zhaotu sünavei rarouyu hinou pokupeio!

¹⁷Daiolouzü ngaopi shoyu puhai vei rarouyu teithesü veloure, alia süna vei nghojü hisü thaohnou la-a buloulai?”