Read Poumei Naga PONGAOPEIYU 7 Bible Online

PONGAOPEIYU 7 - Poumei Naga bible

PONGAOPEIYU 7

¹Haina thaisü rakivamai adainou teikhaiye panou deiphao hi, zai hi moa süübe tali vahi hükhai more donou deiphao kaihoung adai hinou la-a deiphao vei teikhai adaiye keipoa buyu sü Enou ngaoe.

²Süthaisü kukhe rakivamai alinou hriyu Ramai vei paoshee nasü poa teinghi palovanou takheyu sü Enou ngaoe. Puhnou pai kushoa deiphao ea zaiye soushi loure donou Ramai nou khouko peikhai touyu rakivamaitao adaihi paoe,

³“Ehnou Eletao Ramai kilaitao puva hi paoshee nomo koutesü deiphao, zai moa süübetaoye sü soushiwu khaiso.”

⁴Alia Ramai vei paoshee nowuyu puletao vei mai peisü zzü ali-a the raidaidaiwe (144,000) touyu sü Enou chouwe. Puletao sü Israel maitao khü kiahai hinoue,

⁵süolouzü khüche hinou mai the kiahai-hai (12,000) we: sütaosü Judah, Reuben, Gad, Asher, Naphtali, Manasseh, Simeon, Levi, Issakhar, Zebulun, Josef alia Benjamin haitaoe.

⁹Haina thaisü Enou zhue, alia zhukhaio, Anghojü hisü maitalinou a phoushalou hoyu maisou khemaisü bue. Puletao sü maitya, khü, tahrüh ea la tyali hinou taveloua zaokaa adutao noupoa ea puletao bah hi hashi botao poa vebuh ea zhaotu nghojünou la-a bue.

¹⁰Puletao nou pai kusholoua shapae: “Khailu peiyuhai vebuh hi buyu Eletao Ramai ea Zhaotu hinou ve!”

¹¹Alia rakivamaitao hrülainou vebuh süna tsümaitao ea hrikhaona adai sütao pe hinou lasühao-a bue, alia puletao pahsü vebuh süna nghojü hi pfüshou kouloua Ramaiye tho-a,

¹²haibüa paoe, “Amen! Paoshoyu, adusho, ratsü, kalo paoyu, tsükhouyu, khouko ea khou-chihyu sü teisanou Eletao Ramai veie, teisanou! Amen!”

¹³Sükisü tsümaitao hronou alinou Ahi noue, “Zaokaa adutao noua buyu mai haitaosü thaoh-thaohmaie? Alia puletaosü daikinou ve-e?”

¹⁴Enou puh hi chila peie, “Dou-apeio, nenou süwe.” Alia puhnou Ahi paoe, “Mai haitaosü ngaopishoyu veahoyu hinou palouyu maitaoe. Puletao nou puletao vei zao aduna taosü shaowu-a sütaosü zhaotu zhenou soukaare.

¹⁵Südonou puletaosü Ramai vei vebuh nghojünou la-a bue ea kheihea nou puletao nou puhye sü puhvei rathoki hinou kuvah sou a bue. Vebuh hi buyu puhnou puh bahnou puletaoye sü hopeilai.

¹⁶Puletao sü hakia reizü pukhai laimoe; alia puletao pei hisü teinghinou-a moa meisou hatalinou-a chakhai laimoe.

¹⁷Daiolouzü vebuh tsüle hinou buyu Zhaotu puhnou puletao vei Zhao-akhowo soulai, alia puhnou puletaoye hriyu dzühoung hi süthai save thoupeilai. Alia Ramai nou puletao nghithou hinou nghidzü teiteisü southe peiwulai.”