Read Poumei Naga RUTH 4 Bible Online

RUTH 4 - Poumei Naga bible

RUTH 4

¹Boaz nou nuh mainou chikuyu robomü hisü ve buloure, alia Boaz nou paoyu Elimelech kityarai tao-a sühisü ve bure. Süthai Boaz nou puletao yesü kure, “Asamai taore, hailo kou bulouo.”

²Alia puhnou nuh hi tsüsoua buyu mai kirou kuloua, “Haihi kouh bulouo” teanou paoe. Puhnou kuyu thaifüa puletao nou sühisü kouhbu loure.

³Süthai puhnou kityarai taohi paoe, “Moab mai teidei hinou dakhai veyu Naomi nou chuo puhvei ludou nasü Elimelech tyaraitao hi zonüa bure.

⁴Südonou Enou neletao hi paongaolai teanou cho-a buyu nasü veloua buyu maitao alia nuh hi tsüsoua buyu maitao nghoujünou süsü hülouo teanou paowe. Neletao nou süsü hüloulai toulouzü hrü dakhailouo; ana hülouhoe toulouzü, Ahi paopeio, süsü nenou hülai moe toulouzü nethai mai kukhe hae, E moa nou.” Süthai puhnou paoe, “Süsü Enou hüdakhai loulai.”

⁵Süthaisü Boaz nou paoe, “Nenou Naomi vei dei hülouyu teithe nou, meamai pfü soua buyu paiye sü panou thaitayu mai zhih kuhriloure donou Moab pfüpai Ruth noupu koa süsü hüdakhailai.”

⁶Süthaisü kaa ngaozüa buyu nanou paoe, “Sünahaio Eye donou hüdakhailou hore, daiolouzü avei kaalo-a koa nou hashulai. Enou ngaozü doua buyu kaa nasü ne polouo, daiolouzü E hai süna hüdakhai louhore.”

⁷Na hülaiyuma mokhai lealaiyuma daorai kinou Israel mainou haibüa souyu zhai bue, hüloure mokhaia lealoure touyu shee soure donou puh phikha phaloua mai hi peiyu thaie. Sübüa Israel mainou süna hai sousheewure touyu shee souyu bue.

⁸Südonou kaa thaozüa buyu nanou Boaz hi “Nenou sünasü hüloua baio” teanou paowua puh phikhasü phapeiwure.

⁹Süthaisü Boaz nou tsümai taohi alia mai hrülai hisü paoe, “Neletao hrülainou Enou zhou Naomi hinou Elimelech vei na teitei, alia Chilion ae Mahlon vei kaa teitei hüloure touyu shakidao.

¹⁰Alia Mahlon khapfü Ruth, Moab meamaipfü paia akhapfü soure donou Enou hülure dao, süsü panou thaimai kikha maivei natao alia puletao zhih hamoa nuh mai hi puh zhih sü panou buloure donoue. Sühai neletao nou zhou lahpeire dao.”

¹¹Süthaisü sühi buyu tsümaitao ae mai hrülai nou paoe, Ovai Etaonou süsü lapeiwe. MAPAO ye panou ne khapfü soure napai hisü Israel maiye soushu peiyu Jakob ye nahmai taoli hrüpeiyu Rachel ae Leah büloutheo. Neye panou Ephrathah hinou hangia hrütheo alia Bethlehem hinou zhih tayu maili souloutheo.

¹²Nahle pfüpai va hinou MAPAO nou neye peire nahmaitao yesü panou Judah ae Tamor nahpoutu Perez kihikhamai büa souloutheo.

¹³Südonou Boaz nou Ruth yesü saloure alia puh khapfü soure; MAPAO nou honapaiye sü hapeie, südonou honapainou poupfüloua nahpoutu ali naloue.

¹⁴Süthaisü nuh hi naotu maitao nou Naomi hisü paoe, “MAPAO ye sholouo! Puhnou zhou neye kipeire donou tyaotou ali peie. Puhye panou Israel mai hi zhih tayu maili souloutheo.

¹⁵Ne mou nou neye leshiyu hai nahpoutu mai anai jünoua koupu hie. Alia honapai nou zhou neye donou nahpoutu ali naloure, alia ne tsüpayu phaki puhnou neye kiko peilai.”

¹⁶Süthaisü Naomi nou nahpoutuye daopoloua nou pokhe puh khao hisü khailoue, alia puhvei nasa soure.

¹⁷Puh kinapamai pfütaonou puh zhih sü sapeie, alia “Naomi nou nahpoutu ali naloure” teanou paopeie. Puletao nou puh zhih hai Obed teanou sapeie; puh hai Jesse puo-e, alia Jesse nou David puoe.

¹⁸Perez tyaonatao hai haitaoe: Perez hai Hezron puoe,

¹⁹Hezron hai Ram puoe, Ram nou Amminadab puoe,

²⁰Ammi-nadab nou Nahshon puoe, Nahshon nou Salmon puoe,

²¹Salmon nou Boaz puoe, Boaz nou Obed puoe,

²²Obed nou Jesse puoe, alia Jesse nou David puoe.