Read Poumei Naga 1 SAMUEL 14 Bible Online

1 SAMUEL 14 - Poumei Naga bible

1 SAMUEL 14

¹Teitheli Jonathan nou puhvei reihna pfülaiyu nahle puona hisü paoe, “She, ahai koa nou Philistin maivei fühao hisü koulai khe.” Ana Jonathan nou haisü puh puo hi paomoe.

²Süphaki Saul hai Gibeah nuhdu nghia buyu Migron hinou vajüshibe phi hinou fühao soua bue. Puhnou mai kaihrou phali koa nou sabue.

³(Shiloh hinou MAPAO vei napao Eli nahpoutu Phinehas nahpoutu Ikhabod thaihou Ahitub nahpoutu Ahijah nou Ramai vei leli poa zhuyu ephod nasü poa bue.) Jonathan nou puletao hinou tare touyu hai mai ali-a sümoe.

⁴Jonathan nou Philistin mainou fühao soua buyu hi tapare Mikmash ludu hisü dushoyu chuhlya ahai bue, chuhlya ali zhih nou Bozer toue, ae ali nanou Senah toua kuwe.

⁵Chuhlya ali nou ludu reilova nou Mikmash hilova reipoa nou bue, ae ali nanou ludu khelova nou Geba hilova reipoa bue.

⁶Jonathan nou puhvei reihna pfülaiyu nahlepu hisü haibüa paoe, “Khe, ahai koa nou heebi moyu Philistin maivei fühao hisü koulai. MAPAO nou ahaiye soukha peishulai, hakinou puhnou soukha peilouzü, ahai mai poumoa buyuma puhnou ahai hisü kolouyu nasü peilai.”

⁷Nahle pouna nou chila peie, “Nenou jüpayu nasü soukhaio, E-a koa neye sa-a nou soulai.”

⁸Jonathan nou paoe, “Sükulouzü veire, Philistin mainou ahaiye zhingaolou süyu buh hisü ahai nou takoulai.

⁹Puletao nou ahai hi takoulai kho-a nou buwo tea paolouzü, ahai nou tamoa la-a nou kho-a bulai.

¹⁰Ana puletao hi takoulo tea ahai hi paolouzü, ahai nou puletao hi takoulai, daiolouzü sünasü MAPAO nou ahai hi veilouyu nasü peiwure touyu shee soua poloulai.”

¹¹Südonou puhai nou Philistin maiye panou zhingao loure donou tapa ngaopeie, ae Philistin mainou puhaiye zhingao loukhaie, haibüa paoe, “Zhukhaio, dei qulu hinou tutsüa buyu Hebrew mai sü tapare!”

¹²Süthaisü puletao nou Jonathan ae nahle pounaye kure, “Hai hi takoulo, Etao nou ne hai hi chi paongaolai.” Jonathan nou nahle pouna hisü paoe, “Athaifülo, MAPAO nou puletao jünou veilouyu nasü Israel mai hi peiwure.”

¹³Jonathan nou lyaqulu nasü phibah nou ngaopoa tapa loure, ae nahle pouna-a puh thaifü poa ngaopa loure. Jonathan nou takou puletaoye sü dakhao peiwure, ae puh thailo nou nahle pouna nou puletaoye sü southawure.

¹⁴Jonathan ae nahlepouna nou takou Philistin maiye reih sourai khayu buh hisünou mai kai phali hai southa loue.

¹⁵Süpehao hinou buyu Philistin mai hrülai, reih soutayu reihmaitao, ae fühao hinou buyu reihmai hrülai hai ngaopi shopoa ngua nou bure; alia teidei teitei sü ngaopiyu nou lütu ture.

¹⁶Benjamin maivei Gibeah nuhdu hinou reihkhaoyu Saul vei maitao nou Philistin maivei reihmaitao hai choha-a nou tuphoraroua laiyu sü zhingao loure.

¹⁷Südonou Saul nou puhvei maitao hi paoe, “Eye salaiyu avei maitao bucheho buchemosa phoukhaio.” Puletao nou maipei phouyu phaki Jonathan ae puhvei reihna pfüyu nahlepouna sü ha-a nou ngaoloure.

¹⁸Saul nou napao Ahijah hisü paoe, “Ramai vei Vo Sübvü nasü haihi pokou.” (Süzhou teithe hai Ahijah nou sünasü Israel mai jünou rai-a kaopoa tawe.)

¹⁹Saul nou napao hi chi pao-a buyu phaki, Philistin maivei fühao hi buyu reihmaitao hai choha-a nou büraroua tupho rarou shilailai pare, südonou Saul nou puh hi paoe, “Ramai hi noua bure teile sü hare!”

²⁰Süthaisü Saul ae puhye koa salaiyu maitao nou Philistin maiye reih soure donou tare, ae puletao nou reihbu hi talouyu phaki Philistin mai hai lah puletao haohao nou reih soua bure.

²¹Raichoki nou Israel mai kamai-a Philistin mai hi louta-a fühao sü hi buyu maitao-a Saul ae Jonathan vei reihme hi loutare.

²²Ephraim maivei deichi hinou tutsüa buyu maitao-a Philistin mai raopoa tutare touyu ko sülou khaie, puletao-a Saul vei reihme hi velou zholoua Philistin maiye reih soutare.

²³Puletao nou Philistin maiye Bethaven hi koute hai reih hukou peie. Süzhou teithe hai MAPAO nou Israel maiye khailupa peie.

²⁴Süzhou teithe hai Israel mai hai lelou hore, daiolouzü Saul nou chaachou souloua haibüa kharochi peiwure: “Zhou teithe Eye ngaobayu maitao hi khüngu phoulou mokoute touso taralia tousoyu mai sü chaa panou ngaotheo.” Südonou süzhou teithe hai mailia halia toumore.

²⁵Puletao nou vaohro hi talouyu phaki, laivoudzü alao bua nou ngaoe.

²⁶Puletao nou vaohro hi talouyu phaki, süübe liki hai laivoudzü khaitoua ngaoe, ana mai ali koute-a süsü toumore, daiolouzü puletao nou Saul nou chaachou soukhai touyu nasü ngaopi loure.

²⁷Ana Jonathan hai puh puo nou maikhe mai hi chaachou thoukhai touyu sülou moe, südonou puhnou poa laiyu süüpo nanou laivoudzü phe hisü thaithou shaoloua laivoudzü daotu tou loure, ae süthaisü puh hai chahriva touloure.

²⁸Ana mai ali nou haibüa paoe, “Etao mai hrülai hai veashore ae houzüre, ana ne puo nou Etao hi khoushoa haibüa kharochi peiwure, ‘Zhou teithe ha touyu mai sü chaa ngaolai.’”

²⁹Süthaisü Jonathan nou chila peie, “Apuo nou maikhe maiye sü souvea showure! Zhukhaio, Enou laivoudzü daotu tou louyu thai, vapu shore!

³⁰Zhou teithe maikhe mainou puletaoye ngaobayu maitao hinou polouyu touso khesü tou louyu thaio, daizhou koute veilaisa. Neletao-a tsücho khaio, Philistin maiye daizhou koute southapu loulaisa!”

³¹Süzhou teithe Israel mainou Mikmash hinou Aijalon koute hai Philistin maiye reih hupoa kouloue. Süphaki Israel mai hai houyu nou lülou holoure.

³²Ae maikhe mainou ngaobamai hinou polouyu kikhaorü, zhaotu, nghitu, chode, ae chotoutu ngaodao hai dathaloua buh sühinou souzhe noupu koa khotoure.

³³Süthaisü Saul hi mainou haibüa paoe, “Zhukhaio, maikhe mainou souzhe noupu koa sou khotouyu donou MAPAO hinou mah souwure.” Saul nou lekha soua nou maikhe mai hi paoe, “Neletao nou mah dushoa nou souwure! Chuh dushoyu ali ahi pove peio.”

³⁴Süthaisü Saul nou haibüa kharochi peie, “Maikhe mai hisü taho haibüa paopeio: Maitaralia kikhaorü moa zhaotu sü hai hinou pove datha toulai; souzhe noupu koa khotoua nou MAPAO vei nghingao hinou mah souso.” Südonou süzhou khei hai mai hrülai nou puletao vei kihaorü khesü pove buh sühinou datha loure.

³⁵Saul nou MAPAO vei posheelabu ali buh sühinou soupeie, ae süna hai puhnou MAPAO hi posheelabu soupei raikayu nasüe.

³⁶Süthaisü Saul nou puhvei maitao hi paoe, “She, Etao zhou khei nou taho Philistin maiye reih souta laikhe, sübüa puletaoye sü tei thepayu koute southawua puletao vei nangi khesü polou laikhe.” Maikhe mainou chila peie, “Nenou kaowe tea choyu nasü Etao-a aetou baie.” Ana napao nou puh hi paoe, “Etao rai-a Ramai hinou noulou railai she.”

³⁷Südonou Saul nou Ramai hinou noue, “Philistin maiye reih souyu veiho moe? Nenou Etaoye veilouyu sü peilaiho peilai moge?” Ana süzhou hai Ramai nou chila pei more.

³⁸Südonou Saul nou süthai-apei maitaoye kuloua paoe, “Zhou teithe Etao nou dai mah soudesa touyu phoupare donou hai hi takoulo.

³⁹Hriyu MAPAO, Israel maiye veilouyu peipu zhih hinou E chaachou souwe, süolouzü maitaralia mah souyu nasü, puh hai anahpoutu Jonathan yuma southawulai.” Ana mai ali koute-a chi lia paomore.

⁴⁰Süthaisü Saul nou puletao hi paoe, “Neletao mai hrülai nou tailova lalo, ae Jonatha ahai puonah nou hailova bulai.” “Nenou kao-e tea souyu nasü Etao-a aetouwe,” tea maikhe mainou chila peie.

⁴¹Saul nou Israel maivei Ramai MAPAO hi paoe, “MAPAOwo, zhou teithe ne daisounou Eye chila peimowe? Israel maivei Ramai MAPAOwo, Eye sheeyu chuh haitao hinou chila peio. Jonathan ahai puonah nou mah souwure toulouzü Urim chuh nou shee soua chila peio, ana Israel maisou hinou mah soukhai touyu bue toulouzü Thummim chuh nou shee soungao peio.” Chuh nasü Jonathan ae Saul puonah nou mahwure tea shee soungao peire, ae maisou hai mah hare.

⁴²Süthaisü Saul nou “Ahai puonah hi thaonou mahwe touyu shee soupeio,” tea nouyu phaki, Jonathan nou mah souwure tea shee soungao peie.

⁴³Süthaisü Saul nou Jonathan hi noue, “Ne dai mah souwure?” Jonathan nou chila peie, “Abah hinou polaiyu süüpo nanou laivoudzü shaoloua laivoudzü sü Enou daotu tou loure. Eye southawo, E hai hi bue.”

⁴⁴Saul nou puh hi paoe, “Neye southa moyu thaio, Ramai ye panou Eye southawo.”

⁴⁵Ana maisou nou Saul hi paoe, “Israel maiye panou soureih veilouyu pove apeio Jonathan ye sü southa laiwu? Sübüa soulai moe! Hriyu MAPAO zhih hinou Etao nou chaachou souwe, süolouzü puhvei peishupo ali koute-a panou deiphi hi raikoulai moe; daiolouzü puhnou zhou teithe souyu vah haso hai Ramai nou koa soukha peie.” Südonou maikhe mainou Jonathan ye sü khailupa peie, sübüa puhye sü southa more.

⁴⁶Süthaisü Saul nou Philistin maiye thaihupu tamore, ae puletao hai lahkuku vei ki hi dakhai tare.

⁴⁷Saul nou Israel mai hi veo soulouyu thai, puhnou puhye ngaobayu mai hrülai hisü reih souta-e: Moab mai, Ammon mai, Edom mai, Zobah hi buyu veo maitao pei hi, ae Philistin maipei hi soureih souta-e. Puhnou soureih souyu teitei hinou ngalouyu sü ngaoloue.

⁴⁸Puhnou khuveishoa reih soue, ae Amalek mai jünoua reih veiloue, ae Israel maiye souchoro-a reih huveyu teitei hi sünou puhnou vupa peie.

⁴⁹Saul nahpoutu maitao zhih sü: Jonathan, Ishvi, ae Malkhishua haitao-e, ae puh nahnaotu ahai zhih nou Merab ae Mikhal toue.

⁵⁰Saul chapfü zhih nou Ahimaaz nah naotupai Ahinoam toue. Puhvei reihmai peikhowo hai Saul puo thaihou Ner nahpoutu Abner toue.

⁵¹Saul puo zhih nou Kish toue, ae Abner puo zhih nou Ner toue, puhai hai Abiel nahpoutue.

⁵²Saul nou hria bubusa hai Philistin maiye soureih sou-e. Südonou puhnou pfüphao veiyu mai ae khouko buyu mai taralia ngaoyu phaki, puhnou puhvei reihmai me hisü salou thouloue.